அரசுப் பணிகளில் பணியாற்ற, மத நம்பிக்கை அவசியமில்லை-அமெரிக்க சுப்ரீம் கோர்ட் தீர்ப்பளித்த நாள்!

ஜூன் 19, 1961 அன்று, அமெரிக்க  சுப்ரீம் கோர்ட் ஒரு வரலாற்றுச் சிறப்புமிக்கத் தீர்ப்பை வழங்கியது. இது அரசுப் பணிகளில் சேர்வதற்கு மத நம்பிக்கை அவசியம் இல்லை என்பதை திட்டவட்டமாக உறுதிப்படுத்தியது. இந்தத் தீர்ப்பு, அமெரிக்காவில் மதச் சுதந்திரம் மற்றும் மதச்சார்பற்ற கொள்கையின் ஒரு முக்கிய மைல்கல்லாகப் பார்க்கப்படுகிறது.

வழக்கின் பின்னணி: நாத்திகரின் போராட்டம்

மேரிலாந்து மாநிலத்தில் நோட்டரி பப்ளிக்-ஆக நியமிக்கப்பட்ட ராய் டொர்காஸோ (Roy Torcaso) என்ற நாத்திகர், பதவிப் பிரமாணம் எடுக்கும்போது ‘கடவுள் மீது ஆணையாக’ உறுதிமொழி ஏற்க மறுத்தார். மேரிலாந்து மாநிலச் சட்டத்தின்படி, அரசுப் பணியாளர்கள் கடவுள் மீது நம்பிக்கை கொண்டிருக்க வேண்டும் அல்லது கடவுளின் பெயரால் உறுதிமொழி எடுக்க வேண்டும் என்ற விதி இருந்தது. இதன் காரணமாக டொர்காஸோவுக்கு அப்பணி மறுக்கப்பட்டது.

டொர்காஸோ தனது நாத்திக உரிமை அமெரிக்க அரசியலமைப்பால் பாதுகாக்கப்படுகிறது என்று வாதிட்டு வழக்கு தொடர்ந்தார். அவரது முதல் வழக்கு தள்ளுபடி செய்யப்பட்டது. மேரிலாந்து மேல்முறையீட்டு நீதிமன்றம், கடவுளை நம்பச்சொல்லி யாரும் அவரை வற்புறுத்தவில்லை என்றும், நோட்டரி பப்ளிக் ஆகவும் யாரும் வற்புறுத்தவில்லை என்றும் தீர்ப்பளித்தது.

சுப்ரீம்  கோர்ட்டின் தலையீடு மற்றும் தீர்ப்பு

மேரிலாந்து மேல்முறையீட்டு நீதிமன்றத்தின் தீர்ப்பை எதிர்த்து டொர்காஸோ அமெரிக்க  சுப்ரீம் கோர்ட்டில் மேல்முறையீடு செய்தார். இந்த வழக்கை விசாரித்த சுப்ரீம் கோர்ட், அமெரிக்க அரசியலமைப்பின் முதல் திருத்தம் (First Amendment) மற்றும் ஆறாவது பிரிவு (Article VI) ஆகியவற்றைச் சுட்டிக்காட்டியது.

முக்கிய வாதங்கள்:

• முதல் திருத்தம்: “அமெரிக்கக் கூட்டரசோ, மாநில அரசுகளோ தேவாலயத்தை நிறுவ உரிமையில்லை. அவை ஒரு மதத்திற்கோ, அனைத்து மதங்களுக்குமோ உதவவோ, ஒன்றைவிட மற்றொரு மதத்திற்கு முன்னுரிமையளிக்கவோ கூடாது. ஒருவரை தேவாலயத்திற்குப் போகுமாறோ, போகக்கூடாதென்றோ, எந்த மதத்தையும் நம்புமாறோ, நம்பக்கூடாதென்றோ, நேரடியாகவோ, மறைமுகமாகவோ வற்புறுத்தக்கூடாது.” இந்த விதி, மத அமைப்புகளின் பள்ளிகளுக்குச் செல்லும் மாணவர்களுக்கு பயணக்கட்டணம் திரும்ப வழங்குவது சட்டவிரோதம் என்று 1947இல் தொடுக்கப்பட்ட ஒரு வழக்கில் அமெரிக்க உச்ச நீதிமன்றத்தால் சுட்டிக்காட்டப்பட்டது.
• ஆறாவது பிரிவு: அமெரிக்க அரசியல் சட்டத்தின் ஆறாவது பிரிவு, அரசுப் பதவிகளுக்கு மதச் சோதனை (religious test) கூடாது என்று தெளிவாகக் குறிப்பிட்டது.

சுப்ரீம் கோர்ட், ‘கடவுள்மீது ஆணையாக’ உறுதிமொழி ஏற்கச் சொல்வது அமெரிக்க அரசியல் சட்டத்திற்கு விரோதமானது என்று தீர்ப்பளித்தது. ரோமப் பேரரசின் காலத்திலேயே உருவான யூத எதிர்ப்புணர்வே, ஐரோப்பாவில் அரசப் பதவிகளுக்கு வருபவர்கள் (கிறித்துவ) கடவுளின் பெயரால் உறுதிமொழியேற்கும் பழக்கத்தைத் தோற்றுவித்தது. அமெரிக்காவிலும் இங்கிலாந்துக் குடியேற்றங்களில் கடைப்பிடிக்கப்பட்ட இம்முறை, கூட்டரசுக்கு (Federal government) பொருந்தாது என்று அரசியல் சட்டம் ஏற்கனவே கூறியது. இருப்பினும், சில மாநில அரசுகள் தங்கள் சட்டங்களில் இந்த நடைமுறைகளைத் தொடர்ந்தன. இந்தத் தீர்ப்புக்குப் பின்னரே அத்தகைய மாநிலச் சட்டங்கள் செல்லாதவையாயின.

தாக்கமும் இன்றைய நிலையும்

இந்த Torcaso v. Watkins தீர்ப்பு, ஒரு குடிமகன் தனது மத நம்பிக்கையின்மையால் அரசுப் பணியில் இருந்து விலக்கப்படக் கூடாது என்பதை உறுதிப்படுத்தியது. இது அமெரிக்காவின் மதச் சுதந்திரம் மற்றும் மதச்சார்பற்ற அரசாங்கக் கொள்கையை வலுப்படுத்திய ஒரு முக்கியத் தீர்ப்பாகும். ஆனாலும், இன்றும் 8 மாநிலங்களின் சட்டங்களில், அரசுப் பணிகளுக்கு மத நம்பிக்கை குறித்த இந்த பழைய நடைமுறைகள் ஏட்டளவில் தொடர்வது குறிப்பிடத்தக்கது.

வாத்தீ அகஸ்தீஸ்வரன்