உலகப் பருத்தி தினம்: நாகரிகத்தின் அடிப்படை! 🌱

ஆடை உலகில் முடிசூடா மன்னனாகத் திகழும் பருத்தியின் முக்கியத்துவத்தை உணர்த்தும் விதமாக, ஒவ்வொரு ஆண்டும் அக்டோபர் 7 அன்று உலகப் பருத்தி தினம் கொண்டாடப்படுகிறது. விவசாயிகளுக்கு வாழ்வாதாரம், மக்களுக்கு ஆடை, உலகளாவிய வர்த்தகம் எனப் பன்முகப் பங்கு வகிக்கும் இந்தப் பயிர், மனித நாகரிகத்தின் வளர்ச்சிக்கு அடித்தளமிட்டது எனலாம்.

பருத்தியின் நிலை மற்றும் உலக முக்கியத்துவம்

பருத்தி பல்துறை பயன்பாடு காரணமாக ஃபேஷன் உலகில் நீடித்த இடத்தைப் பிடித்துள்ளது. சாதாரண உடைகள் முதல் உயர்தர ஃபேஷன் பொருட்கள் வரை தயாரிக்கப் பயன்படும் இது, உலகின் ஜவுளித் தேவையில் **27%**ஐப் பூர்த்தி செய்கிறது. உலகெங்கிலும் சுமார் 10 கோடி குடும்பங்களின் வாழ்வாதாரமாகப் பருத்தித் தொழில் விளங்குகிறது. 25 கோடி மக்களின் வயிற்றுப் பிழைப்பைப் பருத்தித் தொழில் காப்பாற்றி வருவது குறிப்பிடத்தக்கது.

பருத்திப் பயிர் வறட்சியைத் தாங்கி வளரும் தன்மை கொண்டது என்பதால், இதன் உற்பத்திச் செலவு குறைவாகவே உள்ளது. ஆண்டுதோறும் உலகம் முழுவதும் சுமார் 25 மில்லியன் டன் (110 மில்லியன் மூட்டைகள்) அளவுக்குப் பருத்தி உற்பத்தியாகிறது.

பருத்தி உற்பத்தியில் முன்னிலையில் உள்ள நாடுகள்:

1. இந்தியா🇮🇳
2. அமெரிக்கா 🇺🇸
3. சீனா 🇨🇳

சீனா தன் உற்பத்தியை உள்நாட்டிலேயே பயன்படுத்திக்கொள்ளும் நிலையில், அமெரிக்கா தான் உலகிலேயே மிக அதிகமாகப் பருத்தியை ஏற்றுமதி செய்யும் நாடாக உள்ளது.

உலகப் பருத்தி தினத்தின் வரலாறு

ஆப்பிரிக்காவின் பெனின், பர்கினோபாஷோ, சாட், மாலி ஆகிய நான்கு நாடுகளின் (Cotton-4 நாடுகள்) வேண்டுகோளை ஏற்று, உலக வர்த்தக அமைப்பு (WTO), 2019 ஆம் ஆண்டு அக்டோபர் 7 ஆம் தேதி உலகப் பருத்தி தினத்தை அதிகாரப்பூர்வமாக அறிவித்தது.

பருத்தியின் சரித்திரம்: 7000 ஆண்டுகாலப் பயணம்

இயற்கையாகக் கிடைக்கும் இழைகளில் பருத்தி மிக முக்கியமானதாகும். இது பருத்திச் செடியின் விதைகளைச் சுற்றியுள்ள மென்மையான, செல்லுலோஸால் ஆன இழைக் கொத்தாகும்.

• 7000 ஆண்டுகளுக்கு முன்பு: மெக்ஸிகோ குகைகளில் பருத்தியால் செய்யப்பட்ட பொருட்கள் கண்டெடுக்கப்பட்டுள்ளன.
• 3000 ஆண்டுகளுக்கு முன்பு: பாகிஸ்தானின் சிந்து சமவெளிப் பள்ளத்தாக்கில் பருத்தி உற்பத்தி செய்யப்பட்டு, ஆடைகள் தயாரிக்கப்பட்டதற்கான ஆதாரங்கள் கிடைத்துள்ளன. எகிப்திலும் அதே காலத்தில் பருத்தி ஆடைகள் புழக்கத்தில் இருந்ததற்கான சான்றுகள் உள்ளன.
• கி.பி. 800-களில்: அரபு நாட்டு வியாபாரிகள் பருத்தியை ஐரோப்பாவுக்கு எடுத்துச் சென்றனர்.
• 1492: கொலம்பஸ் பஹாமா தீவுகளில் பருத்தி விளைந்திருப்பதைக் கண்டார்.
• 1793: அமெரிக்காவின் மஸாச்சுஸெட்ஸில் எலி விட்னி என்பவர் பருத்தியைப் பிரித்தெடுக்கும் ஜின்னிங் இயந்திரத்தைக் கண்டுபிடித்தார். இந்த கண்டுபிடிப்பே பருத்தி உற்பத்தியை மிக அதிக அளவில் வளரச் செய்தது. வெறும் 10 வருடங்களில் அமெரிக்காவின் பருத்தி உற்பத்தி 150,000 டாலரிலிருந்து 8 மில்லியன் டாலர் அளவுக்கு உயர்ந்தது.

பருத்தியின் பயன்களும் அதன் அனைத்துப் பாகங்களும்

பருத்தியின் மென்மைத்தன்மை மற்றும் வியர்வையை உறிஞ்சும் தன்மை காரணமாக இது ஆடை, படுக்கை மற்றும் பிற ஜவுளித் தயாரிப்புகளுக்கு உலகெங்கிலும் ஏற்ற துணி வகையாக உள்ளது.

துணிமணிகள் உற்பத்தி தவிர, பருத்தி பல தொழில்களில் பயன்படுகிறது:

• ஜின்டுகள் (Linters): பருத்திக் கொட்டையின் நுனியில் உள்ள குறுகிய இழைகள். இவை பிளாஸ்டிக், வெடிமருந்துகள் தயாரிப்பில் தேவையான செல்லுலோஸைக் கொடுக்கின்றன. மேலும், உயர் ரக காகிதம் மற்றும் மெத்தை, படுக்கை வகைகளிலும் பயன்படுகின்றன.
• பருத்திக்கொட்டை: இதிலிருந்து எண்ணெய், மாட்டுத் தீவனம், மீன்களுக்கான உணவு, உமி போன்றவை தயாரிக்கப்படுகின்றன.
• செடியின் தண்டு, இலை: இவை உரமாகவும் பயன்படுகின்றன.

மீன் வலை, காஃபி வடிகட்டிகள், கூடாரங்கள் போன்ற மற்ற பொருட்களின் தயாரிப்பிலும் பருத்திக்கு முக்கியப் பங்குண்டு.

பருத்தி பயிரிட ஏற்ற பருவநிலை

பருத்திப் பயிருக்கு நீண்டகால, பனியில்லாத, வறண்ட பருவநிலையும், அதிக அளவு சூரிய வெளிச்சமும், சுமாரான மழை நீரும் தேவைப்படுகிறது. விளைவிக்கும் மண் பொதுவாகக் கனமானதாக இருக்க வேண்டும்.

வறண்ட, பூமியின் வடக்கிலும் தெற்கிலும் உள்ள வெப்பமண்டலப் பகுதிகள் பருத்தி விளைச்சலுக்கு உகந்தவை. இது உப்பையும், வறண்ட பருவநிலைகளையும் தாங்கிக்கொள்வதால், மழை குறைவான பகுதிகளில்கூட நீர்ப்பாசன வசதி மூலமாக உற்பத்தி செய்யப்படுவது வழக்கமாக உள்ளது.

பருத்தி ஒரு வெறும் துணி இழை மட்டுமல்ல, அது உலகின் பொருளாதாரம், வர்த்தகம் மற்றும் மனித வரலாற்றில் ஆழமாகப் பதிந்திருக்கும் ஒரு மகத்தான விவசாயப் பயன் ஆகும். இந்தப் பருத்தி தினத்தில், இந்த வெள்ளைச் செழிப்பின் மகத்துவத்தை நாம் அனைவரும் போற்றுவோம். ✨

நிலவளம் ரெங்கராஜன்