தொல்லியல் ஆராய்ச்சி நிகழ்வு ஒன்றை ஆவணப்படுத்தி வருகிறோம் – ஹிப் ஆப் ஆதி பெருமிதம்!

உலகம் முழுவதுமே தொல்லியல் ஆய்வு நடைபெற்று வருகிறது. ஒட்டுமொத்த மனித பரிணாம் குறித்து உலகமே ஆய்வு செய்துகொண்டிருக்கிறது. அரபு, ஆஃப்ரிக்கா, ஐரோப்பிய, ஆஸ்திரேலிய நாடுகளில் மனித இனம் தோன்றிய வரலாறைத் தேடிக்கொண்டிருக்கிறார்கள். ஒவ்வொரு இனமும் எவ்வாறு தன் வரலாற்றை பெற்றிருக்கிறது என்பது தொடர்பான ஆய்வுகள் நம் இந்தியா முழுவதும் நடைபெற்று வருகிறது. இச்சமூகம் எப்படி உருப்பெற்றது? எப்படி வாழ்ந்தது, எப்படி நிலைத்தது, என்ன மாதிரியான விழுமியங்கள் அவர்களிடம் இருந்தது என்பது தொடர்பாக 3ஆயிரம் 4 ஆயிரம் ஆண்டுகள் பழமையான விஷயங்கள் கிடைத்துக் கொண்டேயிருக்கின்றன. இந்நிலையில் இசையமைப்பாளர் மற்றும் நடிகர் ஹிப்ஹாப் ஆதி 2019ஆம் ஆண்டு தமிழ் எழுத்து வடிவத்தின் பரிணாமம் குறித்து ‘தமிழி’ என்ற ஆவணப்பட தொடரை வெளியிட்டிருந்தார். இதனை தொடர்ந்து தற்போது தொல்லியல் அகழ்வாராய்ச்சி தொடர்பாக ஒரு ஆவணப்படத்தை உருவாக்கி வருகிறார்.

சர்வதேச அளவில் முதன் முறையாக தொல்லியல் ஆராய்ச்சியை ஆவணப்படமாக்கும் தயாரிப்பு செய்து வருவது குறித்த ஹிப் ஆப் ஆதி பேட்டி விபரம்:

”கடந்த 2016 இல் தொடங்கி 2019 வரை நான்கு வருடம் தமிழ் எழுத்துக்கள் எவ்வாறு உருவானது என்பது பற்றிய ஒரு வரலாற்று ஆவணப்படத்தை உருவாக்கினோம். அது எல்லா தரப்பிலும் வரவேற்பு பெற்று தந்தது. இந்த ஆவணப்படம் முடியும் தருவாயில் பொருநை என்ற தமிழ் தொல்லியல் ஆராய்ச்சி ஆவண படம் உருவாக்குவது பற்றி முடிவு செய்து அதற்கான பணிகளை மேற்கொண்டோம். 2021ம் ஆண்டில் தமிழக அரசு சார்பில் தொல்லியல் ஆராய்ச்சியாளர்கள் தமிழர்களின் தொல்லியல் ஆராய்ச்சியை கண்டறிய பல்வேறு இடங்களை தேர்வு செய்து ஆராய்ச்சிகளை மேற்கொள்ள பணிகள் தொடங்கிய போது அவர்களது அனுமதியுடன் அந்த பணிகளை ஆவண படமாக்க 2021 முதல் படபபிடிப்பை தொடர்கினோம். இந்த ஆராய்ச்சியில் நிச்சயம் பெரிய கண்டுபிடிப்புகள் இருக்கும் என்று ஆராய்ச்சியாளர்கள் கருத்து கூறி வந்தனர். எங்களுக்கும் அந்த நம்பிக்கை இருந்தது. அந்த நம்பிக்கை இந்த ஆராய்ச்சியில் உண்மையானது.

கடந்த இரண்டு மாதத்திற்கு முன்பு தமிழக முதல்வர் மு. க.ஸ்டாலின் ஒரு அறிவிப்பை வெளியிட்டார். அதில். உலக அளவில் பழமை வாய்ந்த இரும்பு கலாச்சாரம் தொடங்கியது தமிழ் மண்ணில் இருந்து தான் என்ற கண்டுபிடிப்பு நிகழ்த்தப்பட்டது குறித்து அறிவித்தார். இந்த அறிவிப்பு உலகையே தமிழகம் பக்கம் திரும்பி பார்க்க வைத்தது. ஆனால் இதற்கு முன்பு இரும்பு கண்டுபிடிக்கப்பட்டது துருக்கி நாட்டில் உள்ள ஒரு பகுதியில் என்று குறிப்பிடப்பட்டு வந்தது. தற்போது அந்த வரலாறு மாறி இருக்கிறது. இரும்பு கண்டுபிடிக்கப்பட்டது அதாவது பழமையான இரும்பு காலாச்சாரம் தமிழகத்தில் தான் தோன்றியது என்ற வரலாற்று உண்மை வெளியாகி இருப்பது சரித்திர முக்கியத்துவம் வாய்ந்ததாக கருதப்படுகிறது.

உலகிலேயே தொல்லியல் ஆராய்ச்சி நிகழ்வு ஒன்றை ஆவணப்படுத்துவது இதுவே முதன்முறை. நான்கு வருடமாக நடந்து வந்த இந்த பணியில் எவ்வளவோ மணிக்கணக்கில் படப்பிடிப்புகள் நடத்தப்பட்டுள்ளன. அதில் தேர்வு செய்து இரண்டு மணி 30 நிமிடம் அளவுக்கு ஆவணப்படமாக சுருக்கி கொண்டுவர முயற்சி செய்திருக்கிறோம். முற்றிலுமாக இது இரண்டு மாதத்தில் முடிக்கப்பட்டு பிறகு உலக முழுவதும் கொண்டு செல்லும் வகையில் பல்வேறு உலக திரைப்பட விழாக்களில் திரையிட முடிவு செய்திருக்கிறோம். அதன் பிறகு இதனை தமிழக மக்களுக்கு கொண்டு செல்லும் வகையில் என்ன முயற்சி எல்லாம் மேற்கொள்ள முடியுமோ அதை எல்லாம் மேற்கொண்டு தமிழக மக்களுக்கு எப்படி தமிழ் எழுத்துக்கள் வரலாற்று ஆவணப்படம் தமிழியை பொதுவுடமையாக வழங்கினோமோ அதுபோல் பொருநை ஆவணப் படத்தையும் உலகின் பழமையான இரும்பு கலாச்சாரம் என்ற ஆவண படத்தை பொதுவுடமையாக வழங்க தயாராக இருக்கிறோம்.

சினிமா, இசை தவிர இந்த தமிழ் ஆர்வம் உங்களுக்கு எப்படி வந்தது என்று சிலர் கேட்கிறார்கள். இது நாங்கள் திரை உலகுக்கு வருவதற்கு முன்பே மாணவர்களாக இருந்தபோதே உள்ளுக்குள் பொங்கி எழுந்த உணர்வாகும். ரத்தத்தில் ஊறிய இந்த உணர்வு. ஜல்லிக்கட்டு போராட்ட காலத்திலிருந்து எங்களது தமிழ் உணர்வு வெளிப்பட்டு கொண்டுதான் இருக்கிறது. அப்போது நாங்கள் உணர்வுபூர்வமாக அந்த பணிகளை செய்து கொண்டிருந்தோம். இப்போது உணர்வுபூர்வத்துடன் மட்டுமல்லாமல் ஆதாரத்துடன் சொல்ல வேண்டும் என்ற பக்குவத்தையும் பெற்று அதன்படி பணியாற்றி வருகிறோம். டக்கரு டக்கர், தமிழன்டா, ஹிப் ஹாப் அமைப்புகள் மூலம் எங்களது இந்த பணிகள் தொடர்ந்து நடக்கும்.”இவ்வாறு ஹிப் ஹாப் ஆதி கூறினார்.