டெஸ்ட் கிரிக்கெட் போட்டியில் இருந்து விராட் கோலி ஓய்வு!
விராட் கோலி டெஸ்ட் கிரிக்கெட் போட்டியில் இருந்து ஓய்வு பெறுவதாக இன்று அறிவித்துள்ளார். இது இந்திய கிரிக்கெட் அணிக்கும், அவரது ரசிகர்களுக்கும் ஒரு பெரிய அதிர்ச்சியாகும். கடந்த சில நாட்களாக ரோகித் சர்மா டெஸ்ட் போட்டிகளில் இருந்து ஓய்வு பெறப்போவதாக செய்திகள் வந்த நிலையில், தற்போது விராட் கோலியும் ஓய்வை அறிவித்துள்ளது இந்திய அணியின் எதிர்காலம் குறித்து பல கேள்விகளை எழுப்பியுள்ளது.
விராட் கோலி தனது சமூக வலைத்தள பக்கத்தில் இதுகுறித்து உருக்கமான பதிவு ஒன்றை வெளியிட்டுள்ளார். அதில், “14 வருடங்களுக்கு முன்பு நான் டெஸ்ட் கிரிக்கெட்டில் இந்திய அணியின் தொப்பியை அணிந்தது முதல் இன்று வரை இந்த பயணம் என்னை பல்வேறு விதமாக சோதித்துள்ளது, வடிவமைத்துள்ளது. வெள்ளை உடையில் களமிறங்குவது ஒரு தனித்துவமான உணர்வு. அமைதியான பயிற்சி, நீண்ட நாட்கள், யாரும் பார்க்காத சிறிய தருணங்கள் எல்லாம் என் நினைவில் என்றென்றும் இருக்கும். இந்த வடிவத்திலிருந்து நான் விலகும்போது, அது எளிதானது அல்ல – ஆனால் இது சரியானதாகத் தோன்றுகிறது. நான் என்னிடம் இருந்த அனைத்தையும் கொடுத்தேன், அதற்குப் பதிலாக நான் எதிர்பார்த்ததை விட அதிகமாகவே எனக்குக் கிடைத்துள்ளது. இந்த விளையாட்டுக்காகவும், நான் களத்தில் யாருடன் விளையாடினேனோ அவர்களுக்காகவும், என்னை அங்கீகரித்த ஒவ்வொரு தனி நபருக்காகவும் என் இதயம் நன்றியால் நிறைந்துள்ளது. எனது டெஸ்ட் கிரிக்கெட் வாழ்க்கையை நான் எப்போதும் ஒரு புன்னகையுடன் திரும்பிப் பார்ப்பேன். #269 கையெழுத்திடுகிறது” என்று குறிப்பிட்டுள்ளார்.
விராட் கோலியின் டெஸ்ட் கிரிக்கெட் சாதனை புள்ளி விவரங்கள் மிகவும் சிறப்பாக உள்ளன. அவர் 123 டெஸ்ட் போட்டிகளில் விளையாடி 46.85 சராசரியுடன் 9230 ரன்கள் குவித்துள்ளார். இதில் 30 சதங்களும், 31 அரை சதங்களும் அடங்கும். டெஸ்ட் கிரிக்கெட்டில் அதிக ரன்கள் எடுத்த இந்திய வீரர்களில் இவர் நான்காவது இடத்தில் உள்ளார். மேலும், இந்திய டெஸ்ட் அணியின் வெற்றிகரமான கேப்டனாகவும் அவர் திகழ்ந்துள்ளார். அவரது தலைமையில் இந்திய அணி பல வரலாற்று வெற்றிகளைப் பெற்றுள்ளது.
விராட் கோலியின் இந்த திடீர் முடிவு இந்திய அணியின் மிடில் ஆர்டருக்கு ஒரு பெரிய இழப்பாக பார்க்கப்படுகிறது. அடுத்த மாதம் இங்கிலாந்தில் நடைபெற உள்ள டெஸ்ட் தொடருக்கு முன்னதாக அவர் ஓய்வை அறிவித்துள்ளது அணியின் கலவையில் மாற்றங்களை ஏற்படுத்தும். ஏற்கனவே ரோகித் சர்மா ஓய்வு பெற்றுள்ள நிலையில், விராட் கோலியின் அனுபவமும் இனி அணிக்கு கிடைக்காது.
கிரிக்கெட் ரசிகர்கள் மற்றும் முன்னாள் வீரர்கள் விராட் கோலியின் இந்த முடிவுக்கு வருத்தம் தெரிவித்து வருகின்றனர். அவர் இன்னும் சில காலம் டெஸ்ட் கிரிக்கெட்டில் விளையாடி இருக்க வேண்டும் என்று பலரும் கருத்து தெரிவித்து வருகின்றனர். இருப்பினும், விராட் கோலியின் தனிப்பட்ட முடிவை அனைவரும் மதிக்க வேண்டியுள்ளது.
விராட் கோலி ஒருநாள் மற்றும் டி20 போட்டிகளில் தொடர்ந்து விளையாடுவார் என்று எதிர்பார்க்கப்படுகிறது. 2027ல் நடைபெற உள்ள ஒருநாள் உலகக் கோப்பையில் அவர் இந்திய அணிக்காக விளையாடுவதை ரசிகர்கள் ஆவலுடன் எதிர்பார்த்துள்ளனர்.
விராட் கோலியின் டெஸ்ட் கிரிக்கெட் வாழ்க்கை ஒரு பொற்காலம். அவரது சாதனைகள் என்றென்றும் கிரிக்கெட் வரலாற்றில் நிலைத்து நிற்கும்.
