சர்வதேச பாறை தினத்தின் முக்கியத்துவமும் புவியியல் அதிசயங்களும்!

நாம் அன்றாடம் கடந்து செல்லும் மலைகளும், காலடியில் மிதிபடும் கற்களும் ஏதோ சாதாரணமானவை அல்ல; அவை இந்த பூமியின் கோடிக்கணக்கான ஆண்டுகால வரலாற்றைத் தங்களுக்குள் புதைத்து வைத்திருக்கும் காலப் பெட்டகங்கள். ஒவ்வொரு ஆண்டும் ஜூலை 13 அன்று “சர்வதேச பாறை தினம்” (International Rock Day) உலகம் முழுவதும் கடைப்பிடிக்கப்படுகிறது. மனித நாகரிகத்தின் தொடக்கம் முதல் இன்று நாம் வாழும் நவீன டிஜிட்டல் யுகம் வரை பாறைகளின் பங்களிப்பு அளப்பரியது. பூமி உருவான விதம், அதன் உள்ளமைப்பு மற்றும் காலநிலை மாற்றங்களை நமக்கு உணர்த்தும் இந்த இயற்கை அதிசயங்களைக் கொண்டாடுவதற்கும், அவற்றைப் பாதுகாப்பதற்கும் இந்த நாள் ஒரு முக்கிய வாய்ப்பாக அமைகிறது.

பூமியின் டைரி: பாறைகள் சொல்லும் வரலாறு

பாறைகள் என்பவை வெறும் கல்லும் மண்ணும் கலந்த கலவையல்ல; அவை பூமியின் வரலாற்றை எழுதி வைத்துள்ள டைரிகள். புவியியலாளர்கள் ஒரு பாறையின் அமைப்பையும், அதில் உள்ள தாதுக்களையும் (Minerals) ஆய்வு செய்வதன் மூலம், பல மில்லியன் ஆண்டுகளுக்கு முன்பு அந்தப் பகுதியில் நிலவிய காலநிலை, கடல் மட்டம் மற்றும் எரிமலைச் செயல்பாடுகளைத் துல்லியமாகக் கணிக்கிறார்கள். பூமியின் மேலோடு (Earth’s Crust) எவ்வாறு உருவானது மற்றும் கண்டங்களின் நகர்வுகள் எவ்வாறு நிகழ்ந்தன என்பதைக் கண்டறிய பாறைகளே முதன்மை ஆதாரமாக விளங்குகின்றன.

பாறைகளின் மூன்று முகங்கள்: ஒரு புவியியல் பார்வை

பூமியில் உள்ள பாறைகள் அவற்றின் உருவாக்கம் மற்றும் தன்மையின் அடிப்படையில் மூன்று முக்கிய வகைகளாகப் பிரிக்கப்படுகின்றன.

• தீப்பாறைகள் (Igneous Rocks): பூமியின் ஆழத்திலிருந்து வெளிப்படும் உருகிய லாவா அல்லது மாக்மா குளிர்ந்து இறுகுவதால் இவை உருவாகின்றன. கிரானைட் மற்றும் பசால்ட் ஆகியவை இதற்குச் சிறந்த உதாரணங்கள். பூமியின் அடித்தளமே இந்த வகை பாறைகளால் தான் கட்டமைக்கப்பட்டுள்ளது.

• படிவுப் பாறைகள் (Sedimentary Rocks): காற்று, நீர் ஆகியவற்றால் அடித்து வரப்படும் மணல், களிமண் மற்றும் தாவர-விலங்கினங்களின் எச்சங்கள் பல அடுக்குளாகப் படிந்து, அதிக அழுத்தத்தின் காரணமாகப் பாறைகளாக மாறுகின்றன. சுண்ணாம்புக்கல் (Limestone) மற்றும் மணற்கல் (Sandstone) இவ்வகையைச் சேர்ந்தவை. பூமியின் கடந்த கால உயிரினங்களின் புதைபடிவங்கள் (Fossils) மற்றும் நிலக்கரி, கச்சா எண்ணெய் போன்ற எரிபொருட்கள் இந்த படிவுப் பாறைகளில் தான் கிடைக்கின்றன.

• உருமாறிய பாறைகள் (Metamorphic Rocks): கடுமையான வெப்பம் மற்றும் அதிக அழுத்தம் காரணமாகத் தீப்பாறைகளும், படிவுப் பாறைகளும் தங்களின் அசல் தன்மையிலிருந்து மாறி முற்றிலும் புதிய பாறையாக உருவெடுப்பது உருமாறிய பாறைகள் எனப்படும். நாம் வீடுகளில் பயன்படுத்தும் பளிங்குக்கல் (Marble) மற்றும் ஸ்லேட் கற்கள் இதற்கு மிகச் சிறந்த உதாரணங்கள்.

மனித நாகரிகத்தின் முதுகெலும்பு

மனித வரலாற்றின் தொடக்கமே “கற்காலம்” என்ற பாறைகளின் பெயரால் தான் அழைக்கப்படுகிறது. மனிதன் முதன்முதலில் ஆயுதங்களைச் செய்யவும், நெருப்பை உருவாக்கவும் கற்களையே பயன்படுத்தினான். அதன் பிறகு, உலக அதிசயங்களான எகிப்து பிரமிடுகள் முதல் தஞ்சைப் பெரிய கோவில், மாமல்லபுரம் சிற்பங்கள் வரை மனித நாகரிகத்தின் கலை மற்றும் கட்டிடக்கலை சாதனைகள் அனைத்தும் பாறைகளின் மீதே செதுக்கப்பட்டன. இன்றைய நவீன உலகிலும் சிமெண்ட் தயாரிப்பு, சாலைகள் போடுதல், அடுக்குமாடிக் குடியிருப்புகள் மற்றும் கணினிகளில் பயன்படுத்தப்படும் சிலிக்கான் சிப்புகள் வரை அனைத்திற்கும் பாறைகளில் இருந்து எடுக்கப்படும் தாதுக்களே அடிப்படையாக உள்ளன.

சுற்றுச்சூழல் சமநிலையும் பாறைகளின் பாதுகாப்பும்

பாறைகள் பூமியின் தட்பவெப்ப நிலையைச் சமன்படுத்துவதில் முக்கியப் பங்கு வகிக்கின்றன. பல்லாயிரக்கணக்கான ஆண்டுகளாகப் பாறைகள் சிதைவடைவதாலேயே (Weathering) தாவரங்கள் வளர்வதற்குத் தேவையான வளமான மண் உருவாகிறது. மேலும், நிலத்தடி நீரைச் சேமித்து வைக்கும் இயற்கை நீர்த்தேக்கங்களாகவும் பாறைகளின் அடுக்குகள் செயல்படுகின்றன. ஆனால், தற்காலத்தில் கட்டுப்பாடற்ற குவாரித் தொழில்கள், மலைகளை அழித்தல் மற்றும் நவீனக் கட்டிடங்களுக்காகப் பாறைகளை அளவுக்கு அதிகமாக வெட்டி எடுப்பது போன்ற செயல்களால் சுற்றுச்சூழல் சமநிலை பெரிதும் பாதிக்கப்பட்டு வருகிறது. நிலச்சரிவுகள் ஏற்படுவதற்கும், நிலத்தடி நீர்மட்டம் குறைவதற்கும் இதுவே முதன்மைக் காரணமாகிறது.

சர்வதேச பாறை தினத்தின் நோக்கம்

இயற்கையின் இந்த அற்புதம் வெறும் பொருளாதார நோக்கத்திற்காக மட்டும் சுரண்டப்படக் கூடாது என்பதை நினைவூட்டுவதே இந்த நாளின் முக்கிய நோக்கமாகும். பள்ளி மற்றும் கல்லூரி மாணவர்களிடையே புவியியல் (Geology) குறித்த ஆர்வத்தை ஏற்படுத்துவது, உள்ளூர் பகுதிகளில் உள்ள தனித்துவமான பாறை அமைப்புகளைப் பாதுகாப்பது மற்றும் இயற்கையை நேசிக்கக் கற்றுக்கொடுப்பது இந்த நாளின் கடமையாகும். நம்மைச் சுற்றியுள்ள ஒவ்வொரு கல்லும் இந்த பூமியின் பல்லுயிர் சூழலுக்குச் செய்த பங்களிப்பை உணர்ந்து, இயற்கை வளங்களை அடுத்த தலைமுறைக்காகப் பாதுகாத்து வாழப் பழகுவோம்.

நிலவளம் ரெங்கராஜன்