தமிழகத்தில் காணாமல் போன ‘பேலியோ’ மவுசு!

ஐந்தாறு ஆண்டுகளுக்கு முன்பு வரை ஃபேஸ்புக் திறந்தாலே “பேலியோ டயட்” (Paleo Diet) குறித்த பதிவுகள் தான் அதிகம். “சர்க்கரை நோயை விரட்டலாம்”, “உடல் எடையை பாதியாகக் குறைக்கலாம்” என்ற கோஷங்களுடன் ஆயிரக்கணக்கானோர் இதில் மூழ்கிக் கிடந்தனர். ஆனால், இன்று நிலைமை தலைகீழ். அந்த ‘பேலியோ அலை’ தமிழகத்தில் இப்போது பெரிய அளவில் ஓய்ந்துவிட்டது. அதற்கான காரணங்கள் என்ன?

1. ‘பணக்கார’ டயட்:

• பேலியோ டயட்டில் முக்கிய பங்கு வகிப்பது பாதாம், பிஸ்தா, வால்நட், பன்னீர், சீஸ், நெய் மற்றும் அசைவ உணவுகள்.

• நடுத்தர வர்க்கத்து மக்களால் தினமும் இவற்றை வாங்கிச் சாப்பிடுவது பொருளாதார ரீதியாகச் சாத்தியமற்றதாகிவிட்டது. மாத பட்ஜெட்டில் இது பெரிய துண்டை விழுங்கியது முக்கிய காரணம்.

2. சோறு முக்கியம் பிகிலு!:

• தமிழர்களின் மரபணுவிலேயே அரிசி உணவு கலந்துள்ளது. காலையில் இட்லி, மதியம் சோறு இல்லாமல் வாழ்வது பலருக்கும் நீண்ட காலத்திற்குச் சாத்தியப்படவில்லை.

• ஆரம்பத்தில் ஆர்வத்தில் செய்தாலும், ஒரு கட்டத்திற்குப் மேல் “நமக்கு பழைய கஞ்சியும், ரசமும் தான் பெஸ்ட்” எனப் பலர் பழைய முறைக்கேத் திரும்பிவிட்டனர்.

3. பக்க விளைவுகள் பயம்:

• அதிகப்படியான கொழுப்பு மற்றும் புரதம் எடுப்பதால் சிலருக்கு பித்தப்பை கற்கள் (Gallbladder stones), யூரிக் ஆசிட் பிரச்சனைகள் மற்றும் முடி கொட்டுதல் போன்றவை ஏற்பட்டதாகப் புகார்கள் எழுந்தன.

• மருத்துவர்கள் பலர், “சீரான உணவு முறையே சிறந்தது; எதையும் முற்றிலுமாகத் தவிர்ப்பது ஆபத்து” என எச்சரித்ததும் மக்கள் பின்வாங்கக் காரணமானது.

4. சிறுதானியங்களின் மறுவருகை:

• இடையில் அரசாங்கமும், மருத்துவத் துறையும் ‘சிறுதானியங்கள்’ (Millets) பக்கம் கவனத்தைத் திருப்பின.

• கேழ்வரகு, சாமை, திணை போன்றவை மலிவாகவும், ஆரோக்கியமாகவும் கிடைத்ததால், மக்கள் பேலியோவை விட்டுவிட்டு சிறுதானியங்களுக்கு மாறத் தொடங்கினர்.

5. இன்டர்மிட்டென்ட் ஃபாஸ்டிங் (Intermittent Fasting):

• இப்போது டிரெண்டிங்கில் இருப்பது ‘விரத முறை’. குறிப்பிட்ட நேரம் மட்டும் சாப்பிட்டுவிட்டு, மீதி நேரம் பட்டினி கிடக்கும் இந்த முறைக்கு செலவு கிடையாது. எனவே, பேலியோவை விட இது சுலபமாகிவிட்டது.

 ஆக எந்த ஒரு விஷயமும் தீவிரமாக இருக்கும்போது அதற்கு மவுசு அதிகம். ஆனால், அது நடைமுறை வாழ்க்கைக்கு ஒத்து வராதபோது காணாமல் போவது இயல்பு. பேலியோவும் அப்படித்தான்… இப்போது அது ஒரு மருத்துவத் தேவையாகச் சுருங்கிவிட்டதே தவிர, வெகுஜன இயக்கமாக இல்லை!

வாத்தீ அகஸ்தீஸ்வரன்