குரோக்பீடியா வருகை – விக்கிப்பீடியா சாம்ராஜ்யத்துக்குப் போட்டியா?

அறிவியல் மற்றும் தொழில்நுட்ப உலகில், சமீபத்திய வரவான ‘குரோக்பீடியா‘ (Groktopedia) ஓர் அதிரடிப் பாய்ச்சலாகப் பார்க்கப்படுகிறது. செயற்கை நுண்ணறிவு (AI/செநு) தொழில்நுட்பத்தைப் பயன்படுத்தி, ஒரு கலைக்களஞ்சியக் கட்டுரையைத் தொகுத்து வழங்கும் இந்தக் களம், விக்கிப்பீடியாவுக்குப் போட்டியாக உருவெடுத்துள்ளதாகப் பரவலாகப் பேசப்படுகிறது. ஆனால், இதன் கட்டமைப்பு மற்றும் மூலத்தைப் பார்க்கும்போது, இது மனிதக் கூட்டு அறிவியக்கத்துக்கு ஒரு சவால் அல்ல, மாறாக ஒரு தொழில்நுட்பச் சான்று என்றே தோன்றுகிறது.

குரோக்பீடியா செயல்படும் விதம்: செநுவின் தொகுப்புக் கலை

குரோக்பீடியாவின் செயல்பாடே இதன் மிகப்பெரிய சிறப்பம்சமாகும். ஒரு கலைக்களஞ்சியக் கட்டுரைக்குத் தேவைப்படும் செய்தித்தளங்களிலிருந்து தகவல்களைத் திரட்டி, அவற்றை எளிமைப்படுத்தி, அறிவியல் கட்டுரைகளுக்கான மேற்கோள்களுடன் (Citations) தொகுத்துக் கொடுக்கிறது.

• ஆரம்பப் பதிப்பு: முதல் பதிப்பிலேயே சுமார் ஒன்பது லட்சம் ஆங்கிலக் கட்டுரைகளுடன் அறிமுகமாகியுள்ளது, இது அதன் பிரம்மாண்டமான தொடக்கத்தைக் காட்டுகிறது.
• தகவல் ஆதாரம்: இது பெரும்பாலும் விக்கிப்பீடியாக் கட்டுரைகளின் அடிப்படைத் தகவல்களை எடுத்துக்கொண்டு, இதர செய்தித் தளங்கள் மற்றும் இணைய ஆதாரங்களிலிருந்து கூடுதல் தரவுகளைத் திரட்டி, சில தகவல்களைத் தணிக்கை (Curate) செய்து வெளியிடுகிறது.
• போலித் தகவல் சவால்: கட்டுரைகளை உருவாக்க இது ஃபேஸ்புக், இன்ஸ்டாகிராம் போன்ற சமூக ஊடகங்களையும் மேற்கோளாகக் கொள்வதால், போலித் தகவல்கள் (Fake News) மற்றும் பக்கச்சார்பு (Bias) கொண்ட செய்திகள் கட்டுரைகளில் இடம்பெற வாய்ப்புள்ளதாகக் கூறப்படுகிறது.

குறைபாடுகளும் சவால்களும்

குரோக்பீடியா ஒரு தொழில்நுட்பச் சாதனை என்றாலும், அதன் தற்போதைய பதிப்பில் பல குறைபாடுகள் உள்ளன:

1. ஆங்கில ஆதிக்கம்: தற்போது ஆங்கிலத்தில் மட்டுமே கட்டுரைகள் உள்ளதால், மற்ற மொழித் தகவல்களும், உலகளாவிய அறிவும் இதில் இடம்பெறவில்லை.
2. வரையறுக்கப்பட்ட தகவல்: இது இணையத்தில் உள்ள தகவல்களை மட்டுமே கருத்தில் கொள்கிறது. புத்தகங்கள் அல்லது இணையத்தில் பதிவேற்றப்படாத தகவல்கள் (Offline Data) கட்டுரைகளில் இடம்பெறாமல் பெரும் தகவல் இடைவெளி உள்ளது.
3. திருத்தும் உரிமை மறுப்பு: விக்கிப்பீடியா போல யாவரும் கட்டுரைகளை நேரடியாகத் திருத்த முடியாது. பயனர்கள் பின்னூட்டங்களை (Feedback) மட்டுமே அளிக்க முடியும். அவற்றின் அடிப்படையில், குரோக்பீடியா நிர்வாகம் தகவல்களைத் திருத்தம் செய்கிறது.

விக்கிப்பீடியாவிற்குப் போட்டியா? 

குரோக்பீடியாவின் வருகை, விக்கிப்பீடியாவின் அசைக்க முடியாத இடத்தை ஆக்கிரமிக்கப் போகிறதா என்ற விவாதம் எழுந்துள்ளது.

குரோக்பீடியா அதன் ஆரம்பப் பதிப்பிலேயே, உலகிலுள்ள தன்னார்வலர்கள் பலர் பல ஆண்டுகளாக உருவாக்கிய விக்கிப்பீடியாவின் தரவுகளை மூலமாக வைத்தே கட்டமைக்கப்பட்டுள்ளது. எனவே, இரண்டும் சமமான போட்டியாளர்கள் இல்லை என்பதே நிதர்சனம். விக்கிப்பீடியா என்பது மனிதனின் கூட்டு அறிவின் உச்சம்; குரோக்பீடியா என்பது செநுவின் தொகுப்புத் திறனின் உச்சம்.

இறுதியில், இந்த இரண்டு அறிவுச் சாம்ராஜ்யங்களும் மனித சமூகம் அறிவைப் பெறுவதற்கும், புரிந்துகொள்வதற்கும் உதவினால் அதுவே அறிவுப் புரட்சிக்கு வித்திடும்.

நீச்சல்காரன் ராஜா