செய்தியைக் கேட்க / Listen to News
திரைப்படம்: ஒன் மேன் (ONE MAN)
நடிகர்கள், இயக்கம், திரைக்கதை, ஒளிப்பதிவு & பிற துறைகள்: சங்ககிரி ராஜ்குமார்
வகைமை: சயின்ஸ் ஃபிக்ஷன் (Sci-Fi)
ரேட்டிங்: 3.5 / 5
தமிழ் திரையுலகில் புதுமையான பாதையையும் அசாத்தியமான முயற்சிகளையும் முன்னெடுக்கும் படைப்புகளுக்கு என்றும் தனியிடம் உண்டு. அந்த வரிசையில், திரைக்கதை, இயக்கம், ஒளிப்பதிவு, இசை என ஒரு திரைப்படம் உருவாகத் தேவையான 70-க்கும் மேற்பட்ட தொழில்நுட்பத் துறைகளில் ஒரே மனிதராக நின்று அசுர உழைப்பைக் கொட்டி உருவாக்கியிருக்கும் மிக அரிய படைப்புதான் ‘ஒன் மேன்’.
கதையென்றுப் பார்த்தால், தங்களது சாதனைக்காகப் புகழ்பெற்ற சர்வதேச விருதுகளை வெல்லப் பயணிக்கும் நான்கு திறமைமிக்க இளைஞர்களை மையம் கொண்டு நகர்கிறது. பயணத்தின் நடுவே, அவர்கள் எதிர்பாராதவிதமாக மிகவும் பழமையான ஒரு ஆராய்ச்சி மையத்திற்குள் கால் பதிக்கின்றனர். அங்கு அறியாமல் அவர்கள் செய்யும் ஒரு சிறு தவறு, சங்கிலித் தொடர் விபரீதமாக மாறி, ஒட்டுமொத்தப் பூமிப்பந்திலும் மனித இனத்தின் வாழ்வியலையே தலைகீழாகப் புரட்டிப் போடுகிறது.
அந்தப் பேரழிவிற்குப் பிறகு எஞ்சியிருக்கும் இந்த நால்வருக்குள் எழும் மனக்கசப்புகள், உளவியல் போராட்டங்கள் மற்றும் அவர்களின் அடுத்தகட்ட நகர்வுகள் என்ன என்பதை மிகச் சுவாரசியமான அறிவியல் புனைவுக் கதையாக உருவாக்கியிருக்கிறார் படைப்பாளி.
ஒரு சிறிய மனிதத் தவறு எப்படி உலகளாவிய பேரழிவை உண்டாக்கும் என்ற அறிவியல் கருப்பொருளை மிகச் சுவாரசியமான திருப்பங்களுடன் திரையில் கொண்டு வந்திருப்பது படத்தின் மிகப்பெரிய பிளஸ். படத்திற்குப் பின்னால் ஒரு பெரும் பட்டாளமே உழைக்க வேண்டிய சூழலில், உதவி இயக்குநர்கள் கூட இல்லாமல் 70-க்கும் மேற்பட்ட துறைகளைத் தனி ஒருவராகக் கையாண்டு அசத்தியிருக்கும் சங்ககிரி ராஜ்குமாரின் உழைப்பு நம்மை மெய்சிலிர்க்க வைக்கிறது.
திரையில் பலவிதமான பரிமாணங்களில் தோன்றி அசத்துகிறார் சங்ககிரி ராஜ்குமார். உருவத்தில் குள்ளமான மனிதராக மாறுவது, குரல் வளத்தை மாற்றிப் பேசுவது, வித்தியாசமான தோற்றங்களில் வலம் வருவது எனப் பல்வேறு கதாபாத்திரங்களில் மிளிர்கிறார்.
குறிப்பாக, கார் சேஸிங் காட்சிகள், வான்வழி ஹெலிகாப்டர் சாகசங்கள், மூன்று நபர்களுக்கு இடையேயான அதிரடிச் சண்டைக் காட்சிகள் மற்றும் கிளைமாக்ஸ் பகுதியில் அவரது அசாத்தியமான உடல்மொழியும் நடிப்பும் பார்வையாளர்களை வியப்பின் உச்சத்திற்கே கொண்டு செல்கிறது.
தொழில்நுட்ப அம்சங்களிலும் எந்தவிதமான சமரசமும் இல்லாமல் ஒரு தரமான அறிவியல் படத்தை உருவாக்கியுள்ளார். பிரம்மாண்ட பட்ஜெட், முன்னணி நட்சத்திரங்களின் கூட்டணி என வழக்கமான வணிகச் சூத்திரங்களை நம்பாமல், தனது தன்னம்பிக்கை மற்றும் சினிமா மீதான தீராத காதலை மட்டுமே மூலதனமாகக் கொண்டு இந்த உலகத்தரமான முயற்சியை நிகழ்த்தியிருக்கிறார்.
ஒரு தனிமனிதனால் இத்தனை வித்தைகளையும் ஒரே படத்தில் செய்ய முடியுமா என்ற சந்தேகக் கேள்விகளுக்கு, தனது காட்சியமைப்புகளின் மூலமே மிகத் தெள்ளத்தெளிவாகப் பதிலளித்துள்ளார் சங்ககிரி ராஜ்குமார்.
மொத்தத்தில், ‘ஒன் மேன்’ திரைப்படம் வழக்கமான வணிகப் படங்களின் பாதையில் பயணிக்காமல், அறிவியல் புனைகதை விரும்பிகளுக்கும், வித்தியாசமான முயற்சிகளை வரவேற்கும் தீவிர சினிமா ரசிகர்களுக்கும் ஒரு விருந்தாக அமையும் என்பதில் சந்தேகமில்லை.
