சிறகு முளைத்த தேசத்தூதர்கள்: தேசிய பறவைகள் தினச் சிறப்பு அறிக்கை

“வானில் பறக்கும் பறவைகள் எல்லாம் நமக்குச் சொல்லும் ஒரே பாடம் – சுதந்திரம்.” ஆனால், இன்று அந்தச் சுதந்திரம் பறிபோய்க் கொண்டிருக்கிறது. இந்தியாவில் ஆயிரத்திற்கும் அதிகமான அரிய வகை பறவை இனங்கள் இருந்தாலும், மனிதனின் பேராசையாலும் மெத்தனத்தாலும் அவை இன்று பெரும் அச்சுறுத்தலைச் சந்தித்து வருகின்றன.

இயற்கையின் துப்புரவுத் தொழிலாளர்கள்

பறவைகள் வெறும் அழகிற்காக மட்டுமல்ல, சுற்றுச்சூழலின் முதுகெலும்பாகச் செயல்படுகின்றன:

• விதை பரவல்: காடுகள் உருவாவதற்கு பறவைகளே முக்கியக் காரணம். அவை உண்ணும் பழங்களின் விதைகள் எச்சம் மூலம் பரவி, புதிய மரங்கள் வளர உதவுகின்றன.

• பூச்சிக் கட்டுப்பாடு: விவசாய நிலங்களில் பயிர்களை அழிக்கும் பூச்சிகளை உண்டு, இயற்கையான ‘பூச்சிக்கொல்லி’யாகப் பறவைகள் செயல்படுகின்றன.

• சுற்றுச்சூழல் குறியீடு: ஒரு பகுதியில் பறவைகளின் எண்ணிக்கை குறைந்தால், அந்த இடத்தின் சுற்றுச்சூழல் (காற்று, நீர்) மாசடைந்துள்ளது என்பதை நாம் உணர்ந்து கொள்ளலாம்.

தமிழகத்தின் பறவை வளமும் இயற்கை வாழ்விடங்களும்

தமிழகம் பறவைகளின் புகலிடமாகத் திகழ்கிறது. குறிப்பாக நமது சதுப்புநிலக் காடுகள், மலைகள் மற்றும் நீர்நிலைகளில் எண்ணற்ற பறவை இனங்கள் வாழ்கின்றன.

• முக்கிய இனங்கள்: கூழைக்கிடா, வண்ண நாரை, கரண்டிவாயன், புள்ளிமூக்கு வாத்து, செந்நீல நாரை, பாம்புதாரா மற்றும் நீர்காகம் போன்றவை தமிழகத்தின் அடையாளங்களாகத் திகழ்கின்றன.

• வாழிடம்: இத்தகைய அரிய வகை பறவைகள் கூடுகட்டி இனப்பெருக்கம் செய்வதற்கு நமது இயற்கை எழில் கொஞ்சும் இடங்களே ஆதாரமாக உள்ளன.

அழிவின் விளிம்பில் 12% பறவை இனங்கள்: அதிர்ச்சித் தரவுகள்

பறவை ஆர்வலர்களின் கூற்றுப்படி, நிலப்பரப்பில் சுமார் 12 சதவீதப் பறவை இனங்கள் தற்போது அழிவின் விளிம்பில் ஊசலாடிக்கொண்டிருக்கின்றன. இதற்கான முதன்மைக் காரணங்கள்:

1. விவசாய ரசாயனங்கள்: மண் வளத்தை அழிக்கும் ரசாயன உரங்கள் மற்றும் பூச்சிக்கொல்லிகளால் பறவைகளின் இயற்கை உணவுச் சங்கிலி அறுந்துபோகிறது. பூச்சிகளைத் தடுக்கத் தெளிக்கப்படும் மருந்துகள், அந்தப் பூச்சிகளையே உணவாகக் கொள்ளும் பறவைகளையும் கொல்கின்றன.

2. வேட்டையாடுதல்: இறைச்சிக்காகப் பறவைகள் சட்டவிரோதமாக வேட்டையாடப்படுவது அரிய இனங்களின் எண்ணிக்கையை வெகுவாகக் குறைக்கிறது.

3. வலசை போவதில் சிக்கல்: இனப்பெருக்கத்திற்காகப் பல்லாயிரம் மைல்கள் கடந்து வரும் ‘வலசை’ (Migration) போகும் பண்பு, காடுகள் அழிப்பு மற்றும் காலநிலை மாற்றத்தால் இன்று பெரும் சவாலாக மாறியுள்ளது.

கூண்டுக்குள் அடைப்பது இயற்கை விரோதம்

பறவைகள் சுதந்திரமாகப் பறக்கப் பிறந்தவை. அவற்றை வீடுகளில் கூண்டில் அடைத்து வளர்ப்பது இயற்கைக்குப் புறம்பான செயல் மட்டுமல்ல, அவை தங்களின் இயல்பான வாழ்க்கையை வாழ முடியாமல் தவிக்கச் செய்யும் கொடுமையாகும். பறவைகளைப் பாதுகாப்பது என்பது அவற்றைச் சிறைப்பிடிப்பது அல்ல; அவற்றுக்கான இயற்கை சூழலை உருவாக்குவதே ஆகும்.

பாதுகாப்பு விழிப்புணர்வு: நம் கடமை

பறவைகள் பாதுகாப்பு குறித்த விழிப்புணர்வு ஒவ்வொரு குடிமகனிடமும் சுயமாகவே ஏற்பட வேண்டும்.

• சுய விழிப்புணர்வு: விளைநிலங்களில் ரசாயனப் பயன்பாட்டைக் குறைத்தல், நீர்நிலைகளைப் பாதுகாத்தல் போன்றவை அவசியம்.

• அரசின் கடமை: பறவைகள் வேட்டையாடப்படுவதைத் தடுப்பதும், சதுப்புநிலங்களைப் பாதுகாப்பதும் இந்தத் தினத்தின் முக்கிய நோக்கமாகும்.

நாம் செய்ய வேண்டியவை:

1. உணவு மற்றும் நீர்: கோடை காலங்களில் மொட்டை மாடிகளிலும், பால்கனிகளிலும் சிறிய பாத்திரங்களில் பறவைகளுக்குத் தண்ணீர் மற்றும் தானியங்களை வைக்கலாம்.

2. கூடுகள் அமைத்தல்: சிட்டுக்குருவிகள் போன்ற பறவைகள் தங்குவதற்குச் சிறிய செயற்கைக் கூடுகளைத் தோட்டங்களில் அமைக்கலாம்.

3. இயற்கைப் பாதுகாப்பு: பூச்சிக்கொல்லிகளின் பயன்பாட்டைக் குறைத்து, அதிக அளவில் மரங்களை நடுவதன் மூலம் அவற்றுக்கான வாழ்விடத்தை உறுதி செய்யலாம்

மொத்தத்தில் பறவைகள் விவசாயிகளின் நண்பர்கள்; சுற்றுச்சூழலின் தூதர்கள். அவை அழிவது என்பது மனித குலம் தன்னைத்தானே அழித்துக்கொள்வதற்குச் சமம். இந்தத் தேசிய பறவைகள் தினத்தில், நம் வானத்தை அலங்கரிக்கும் பறவைகளைச் சிறைப்பிடிக்காமல், அவற்றின் சிறகுகள் உயரே பறக்க வழிவகை செய்வோம்.

தனுஜா