எம்.ஜி.ஆர். சத்துணவு திட்டம்: பசித்த குழந்தைகள் வாழ்வில் ஒளியேற்றிய புரட்சி தொடங்கிய நாள்!

1982 ஜூலை 1 அன்று, தமிழக முன்னாள் முதலமைச்சர் பாரத ரத்னா எம்.ஜி.ராமச்சந்திரன் (M.G.R.) அவர்களால் துவங்கப்பட்ட மதிய சத்துணவு திட்டம் (Midday Meal Scheme), இந்திய வரலாற்றிலேயே ஒரு திருப்புமுனையாக அமைந்த சமூக நலத் திட்டமாகும். இது வெறும் உணவு வழங்கும் திட்டமாக மட்டும் இல்லாமல், கல்வி, சுகாதாரம், சமத்துவம் எனப் பல பரிமாணங்களில் தமிழக மக்களின் வாழ்வில், குறிப்பாக ஏழைக் குழந்தைகளின் வாழ்வில், ஒரு புரட்சியை ஏற்படுத்தியது. ஆனாலும் சமூகத்தில் சாதியின் பெயரால் கல்வி மறுக்கப்பட்ட குழந்தைகளைப் பள்ளிக்கூடங்களுக்கு வரவழைப்பதற்காகவும் கல்வி அளித்து அவர்களை முன்னேற்றும் நோக்கத்துடன் உருவாக்கப்பட்டது சத்துணவுத் திட்டம். இந்தியாவுக்கே முன்னோடியான இந்த மதிய உணவுத் திட்டத்தின் வரலாறு, தமிழ்நாட்டில் ஏறத்தாழ 100 ஆண்டுகளுக்கு முன்பே தொடங்கியது. இந்தத் திட்டத்திற்கான முன்னோடிகளாக விளங்கியது நீதிக்கட்சி. சென்னை மாநகராட்சி பள்ளிகளில் 1925ஆம் ஆண்டு, இந்தத் திட்டத்தை அமல்படுத்தினார் சிங்காரவேலர். பிற்காலத்தில் காமராஜர் ஆட்சிக்காலத்தில் ‘மதிய உணவுத் திட்டம்’ என்று விரிவுபடுத்தப் பட்டு, 1982ஆம் ஆண்டு, எம்.ஜி.ஆர் ஆட்சிக் காலத்தில் ‘சத்துணவுத் திட்டம்’ என்று தனித்துறையாகச் செயல்படத் தொடங்கியது இந்தத் திட்டம். பின்னாள்களில் கருணாநிதி ஆட்சிக் காலத்தில், இந்தத் திட்டத்தில் முட்டை சேர்த்துக் கொள்ளப்பட்டது. ஜெயலலிதாவின் ஆட்சியில், கலவை சாதமாகவும், முட்டையில் வெவ்வேறு வகை உணவாகவும் இது மாற்றம் செய்யப்பட்டது. தற்போது ‘புரட்சித் தலைவர் எம்.ஜி.ஆர் சத்துணவுத் திட்டம்’ என்ற பெயரில் இந்தத் திட்டம் தமிழகம் முழுவதும் உள்ள அரசுப் பள்ளிகளிலும், அரசு உதவிபெறும் பள்ளிகளிலும் பின்பற்றப்பட்டு வருகிறது.

திட்டத்தின் பின்னணி மற்றும் நோக்கம்

எம்.ஜி.ஆர். தனது இளம் வயதில் வறுமையின் பிடியில் சிக்கி உணவின்றி கஷ்டப்பட்டவர். அந்த அனுபவம், பசியின் கொடுமையை நன்கு உணரச் செய்தது. ஆட்சிக்கு வந்த பிறகு, தனது அனுபவங்களின் வெளிச்சத்தில், “பசியோடு இருக்கும் குழந்தையால் படிக்க முடியாது” என்பதை உணர்ந்தார். இந்தக் கருத்தின் அடிப்படையில்தான், “கல்விக்கு முன் உணவு” என்ற உயரிய நோக்கத்துடன் சத்துணவு திட்டத்தை அவர் வகுத்தார்.

லட்சோப லட்சம் பள்ளி மாணவர்களின் பசியை போக்கும் மக்கள் திலகத்தின் கனவு திட்டமாக இது உருவெடுத்தது. திருச்சி மாவட்டம் பாப்பாக்குறிச்சி கிராமத்தில் அவராலேயே இத்திட்டம் தொடங்கி வைக்கப்பட்டது.

திட்டத்தின் முக்கிய நோக்கங்கள்:

• பள்ளி வருகையை அதிகரித்தல்: வறுமையால் பள்ளிக்கு வராத குழந்தைகளை ஈர்த்து, அவர்களின் வருகையை உறுதி செய்தல்.
• ஊட்டச்சத்து குறைபாட்டை நீக்குதல்: ஏழை மாணவர்களுக்குத் தேவையான ஊட்டச்சத்தை வழங்கி, அவர்களின் உடல்நலத்தையும், அறிவாற்றல் வளர்ச்சியையும் மேம்படுத்துதல்.
• கல்வி இடைநிற்றலைக் குறைத்தல்: பசியின் காரணமாகப் பள்ளிப் படிப்பைப் பாதியில் கைவிடும் நிலையைத் தடுத்தல்.
• சமூக சமத்துவத்தை வளர்த்தல்: சாதி, மத, பொருளாதார வேறுபாடுகளைக் கடந்து அனைத்துக் குழந்தைகளும் ஒரே இடத்தில் அமர்ந்து உணவருந்தும் வாய்ப்பை ஏற்படுத்துதல்.

திட்டத்தின் துவக்கம் மற்றும் செயல்பாடு

முதற்கட்டமாக, இத்திட்டம் கிராமப்புறங்களில் உள்ள தொடக்கப் பள்ளிகளில் படிக்கும் ஏழைக் குழந்தைகளுக்கு 1982 ஜூலை 1 அன்று அறிமுகப்படுத்தப்பட்டது. அதன் மகத்தான வெற்றியைத் தொடர்ந்து, 1982 செப்டம்பர் 15 அன்று, எம்.ஜி.ஆரின் 65வது பிறந்தநாளையொட்டி, தமிழகம் முழுவதும் உள்ள அனைத்து ஆரம்பப் பள்ளிகளுக்கும் இத்திட்டம் விரிவுபடுத்தப்பட்டது. பின்னர், ஐந்தாம் வகுப்பு வரையிலான அனைத்து மாணவர்களுக்கும், அத்துடன் சத்துணவு மையங்களில் பணிபுரியும் பணியாளர்களின் குழந்தைகளுக்கும் விரிவுபடுத்தப்பட்டது.

எம்.ஜி.ஆரின் தொலைநோக்கு பார்வையால், சத்துணவுத் திட்டம் வெறும் பெயரளவிற்கானது அல்ல. ஒரு நாளைக்கு மாணவர்களுக்கு 400 கலோரி ஆற்றல் கொடுக்க வேண்டும் என்ற எண்ணத்தோடு முதற்கட்டமாக 56.9 லட்சம் மாணவ மாணவியருக்கு சத்துணவு வழங்கப்பட்டது. இந்த உணவு எங்கேயோ சமைத்துக் கொண்டு வரப்படுவது அல்ல. பள்ளி மாணவ மாணவியர் படிக்கும் இடத்திலேயே தயாரித்து சுடச்சுட சுவையாகப் பரிமாறப்பட்டதுதான் அப்போதைய மதிய சத்துணவு திட்டத்தின் தனிச்சிறப்பு.

இத்திட்டத்தைச் செயல்படுத்த, 52,000 சத்துணவு மையங்கள் திறக்கப்பட்டன. இந்த மையங்களில் உணவு சமைப்பதற்கும் பரிமாறுவதற்கும் 1,80,119 பேருக்குப் பணி உத்தரவு வழங்கப்பட்டது. இப்படி வேலைவாய்ப்பு பெற்றவர்களில் ஆதரவற்ற பெண்களின் எண்ணிக்கை 1,58,387 என்பது நினைத்துப் பார்க்கவே முடியாத ஒரு மாபெரும் சமூகப் புரட்சியாகும். இது லட்சக்கணக்கான பெண்களுக்கு ஒரு மரியாதையான வாழ்வாதாரத்தை வழங்கியது.

திட்டத்தின் செலவும் மிக அதிகம். ஒரு வருட திட்டத்திற்கு மொத்த செலவு 133 கோடி ரூபாய் என்பது, 43 ஆண்டுகளுக்கு முன்பு மிகப்பெரிய தொகையாகும். இது எம்.ஜி.ஆர். தனது திட்டத்தின் மீது கொண்டிருந்த அசைக்க முடியாத நம்பிக்கையையும், அதற்காக அவர் எடுக்கத் துணிந்த உறுதியான முடிவுகளையும் காட்டுகிறது. மேலும், முதியோர் ஓய்வூதியம் பெற்ற சுமார் ஒரு லட்சத்து 50 ஆயிரம் பயனாளிகளும் இந்த மதிய சத்துணவு திட்டத்தின் கீழ் சேர்க்கப்பட்டனர் என்பது இத்திட்டத்தின் பரந்த சமூக நோக்கத்தை உணர்த்துகிறது.

அரசியல் சவால்களும் எம்.ஜி.ஆரின் துணிச்சலும்

இந்த மாபெரும் திட்டத்தை எம்.ஜி.ஆர். கொண்டு வந்தபோது, தமிழகத்தில் அரசியல் எதிரிகள் எந்த அளவுக்குத் தரம் தாழ்ந்து விமர்சித்தார்கள் என்பதும், இத்திட்டம் ஒரு “பண விரயம்” என்றும் “தேவையற்ற செலவு” என்றும் சித்தரித்ததும் இன்றைய தலைமுறைக்குத் தெரியாது.

அத்துடன், மத்திய திட்டக் கமிஷன் துணைத் தலைவராக இருந்த (பின்னாளைய பிரதமர்) மன்மோகன் சிங், சத்துணவு திட்டத்திற்காக எம்.ஜி.ஆரை நேருக்கு நேர் சந்திப்பின்போது நிதி ஒதுக்கீடு குறித்து பல்வேறு கேள்விகளை எழுப்பினார். அப்போது எம்.ஜி.ஆரின் உடனடி, உறுதியான எதிர்வினை, மன்மோகன் சிங்கை எப்படி “மனம் மோகடித்தது” என்பதும் இன்றைய தலைமுறைக்குத் தெரியாது. இத்திட்டத்தின் அவசியம் குறித்தும், அதன் சமூகப் பயன்கள் குறித்தும் எம்.ஜி.ஆர். ஆணித்தரமாக வாதிட்டார். அவரது தொலைநோக்குப் பார்வையையும், மக்களுக்கான அவரது அர்ப்பணிப்பையும் மன்மோகன் சிங் உணர்ந்து, பின்னர் இத்திட்டத்தை தேசிய அளவில் கொண்டு வர ஆதரவு அளித்தார்.

திட்டத்தின் தாக்கம் மற்றும் சாதனைகள்

எம்.ஜி.ஆர். சத்துணவு திட்டம் தமிழகத்தின் சமூக-பொருளாதார நிலப்பரப்பில் பெரும் மாற்றங்களை ஏற்படுத்தியது:

• கல்வி வளர்ச்சி: சத்துணவு திட்டம் பள்ளி சேர்க்கையை கணிசமாக அதிகரித்தது. பசியில்லாமல் படிக்க முடிந்ததால் மாணவர்களின் கற்றல் திறனும் மேம்பட்டது. இது தமிழகத்தின் எழுத்தறிவு விகிதத்தை உயர்த்தியது.
• ஊட்டச்சத்து மேம்பாடு: குழந்தைகளுக்குத் தினசரி ஒரு முழுமையான உணவு கிடைத்ததால், ஊட்டச்சத்து குறைபாடு தொடர்பான நோய்கள் குறைந்தன. இது குழந்தைகளின் ஆரோக்கியமான வளர்ச்சிக்கு வித்திட்டது.
• சமூக நல்லிணக்கம்: பள்ளிகளில் அனைத்துச் சாதி, மத, சமூகப் பிரிவுகளைச் சேர்ந்த குழந்தைகளும் ஒன்றாக அமர்ந்து உணவு அருந்தியது, சமூக நல்லிணக்கத்திற்கும், சமத்துவ உணர்விற்கும் அடித்தளம் அமைத்தது.
• வேலைவாய்ப்பு மற்றும் பெண்கள் முன்னேற்றம்: லட்சக்கணக்கான பெண்கள், குறிப்பாக ஆதரவற்ற பெண்களுக்கு வேலைவாய்ப்பு வழங்கப்பட்டது, இது அவர்களின் பொருளாதார சுதந்திரத்திற்கும் சமூக அங்கீகாரத்திற்கும் வழிவகுத்தது.
• இந்தியாவிற்கே ஒரு முன்மாதிரி: தமிழகத்தில் இத்திட்டத்தின் வெற்றி, இந்திய அரசு மத்திய அளவில் தேசிய மதிய உணவு திட்டத்தை (National Midday Meal Scheme) தொடங்க உத்வேகம் அளித்தது. இன்று இந்தியாவில் உள்ள பல மாநிலங்கள் இதேபோன்ற திட்டங்களைச் செயல்படுத்தி வருகின்றன.

ஒரு மனிதாபிமான செயல்