நரேந்திர மோடி இந்தியாவின் எம்ஜிஆரா? – அஸ்திவாரத்தைச் சிதைக்கிறதா அரசியல் பிழை?
சமீபத்தில் ஒரு தொலைக்காட்சி விவாதத்தில், பாஜக பிரமுகர் ஒருவர் பிரதமர் நரேந்திர மோடியை ‘இந்தியாவின் எம்ஜிஆர்’ என்று குறிப்பிட்டது, பலரையும் புருவம் உயர்த்த வைத்திருக்கிறது. பாஜகவினர் தங்கள் தலைவரைப் புகழ்வதில் யாருக்கும் ஆட்சேபனை இல்லை. ஆனால், அந்தப் புகழ்ச்சி மற்ற கட்சிகளின் உணர்வுகளையும், அவர்களின் நீண்டகால அரசியல் பிம்பங்களையும் கருத்தில் கொள்ளாமல் இருப்பதுதான் இங்கே முக்கியப் பிரச்சனை. குறிப்பாக, அண்ணா திராவிட முன்னேற்றக் கழகத்தின் (அதிமுக) தொண்டர்களுக்கும், அவர்களது தலைவர் எம்ஜிஆருக்கும் இடையே உள்ள ஆழமான உறவை இந்த ஒப்பீடு சிதைப்பதாகவே தோன்றுகிறது.
எம்ஜிஆர் என்ற பிம்பம் தமிழ்நாட்டில் ஒரு சாதாரண அரசியல்வாதி அல்ல. அவர் தமிழ் மக்களின் உணர்வுகளுடன் கலந்த ஒரு அடையாளம். திமுகவினர்கூட அவரைப் பற்றிப் பேசும்போது மிகுந்த மரியாதையுடன்தான் பேசுவார்கள். அப்படிப்பட்ட ஒரு தலைவருடன், வேறொரு மாநிலத்தின் தலைவரை, அதுவும் வட இந்தியத் தலைவரை ஒப்பிடுவது, அதிமுக தொண்டர்களால் எளிதில் ஏற்றுக்கொள்ள முடியாத ஒன்று. அதிமுக ஒரு காலத்தில் பாஜகவின் முக்கியக் கூட்டணி கட்சி. இன்றும் தமிழகத்தில் வலுவான எதிர்க்கட்சியாக அது உள்ளது. இந்தச் சூழலில், மோடியை எம்ஜிஆருடன் ஒப்பிடுவது, அதிமுகவின் தொண்டர்கள் மத்தியில் ஒருவித மனக்கசப்பை ஏற்படுத்தக்கூடும்.
அரசியல் கூட்டணி என்பது இரு கட்சிகளின் பலத்தையும், தொண்டர்களின் ஆதரவையும் ஒன்று சேர்க்கும் ஒரு முயற்சி. ஆனால், இதுபோன்ற கருத்துக்கள், கூட்டணிக் கட்சிகளின் அடிமட்டத் தொண்டர்கள் மத்தியில் பிளவுகளை ஏற்படுத்தும். பாஜகவின் வளர்ச்சியை திமுக போன்ற கட்சிகள் எதிர்க்கலாம். ஆனால், பாஜகவினரே தங்கள் பேச்சின் மூலம், தமிழகத்தில் தங்களுக்கு உள்ள ஆதரவுத்தளத்தைத் தாங்களே பலவீனப்படுத்துவதுதான் ஆச்சரியமாக இருக்கிறது. இது, பாஜகவின் வளர்ச்சியை விரும்பும் பலருக்கும் அதிர்ச்சியாக இருக்கும்.
ஒவ்வொரு கட்சிக்கும் அதன் தனிப்பட்ட வரலாறு, கலாச்சாரம், மற்றும் தொண்டர்களின் உணர்வுகள் உண்டு. தொலைக்காட்சி விவாதங்களில் பங்கேற்கும் பாஜக பிரதிநிதிகள், நாகரிகமாகவும், மற்ற கட்சிகளின் உணர்வுகளைப் புண்படுத்தாமலும் பேசுவதற்குப் பயிற்சி பெற வேண்டும். வெறும் வாதத் திறமை மட்டும் போதாது. எதிராளிகளின் பேச்சைக் குறுக்கிடுவது மட்டுமே அரசியல் வெற்றிக்கு வழி வகுக்காது. அது ஒரு கட்சியின் பிம்பத்தை சிதைத்து, அதன் வளர்ச்சிக்கு பாதகமாகவே அமையும்.
மோடியின் சாதனைகளை அவர் தனிப்பட்ட திறமைகளை வைத்துப் புகழலாம். ஆனால், தமிழ் மக்களின் மனங்களில் ஆழமாகப் பதிந்திருக்கும் எம்ஜிஆர் போன்ற ஒரு பிம்பத்தை வம்புக்கு இழுப்பது, பாஜகவின் அரசியல் பயணத்திற்குப் பெரிய சவாலாகவே இருக்கும். இது போன்ற பிழைகள், தொண்டர்களின் விசுவாசத்தையும், வாக்காளர்களின் நம்பிக்கையையும் பலவீனப்படுத்தக்கூடும். இறுதியில், இவை எல்லாம் கூட்டணி அரசியலுக்கும், தேர்தல் வெற்றிக்கும் பாதகமாகவே முடியும்.
இதுபோன்ற விவாதங்கள், தமிழ்நாட்டில் பாஜகவின் எதிர்காலத்திற்கு நல்லதல்ல என்பதை கட்சி தலைமை உணர வேண்டும்
செ.இளங்கோவன்
