தமிழ்நாடு பெண்கள் ஊதியக் குறைவு:ஆய்வின் முக்கிய அதிர்வுகள்!

தமிழ்நாட்டில் பெண்களின் வேலைவாய்ப்புப் பங்களிப்பு (Female Labour Force Participation) இந்தியாவிலேயே மிக உயர்ந்த நிலையில் தனித்துவத்துடன் விளங்கி வருகிறது. தொழிற்சாலைகளில் உற்பத்திப் பிரிவில் நேரடியாகப் பணியாற்றும் இந்தியப் பெண்களில் சுமார் 40% பேர் தமிழ்நாட்டைச் சேர்ந்தவர்கள் என்பதோடு, மின்னணுவியல், ஜவுளி மற்றும் ஆயத்த ஆடைத் துறைகளில் பெண்களின் பங்கேற்பு மிக அதிகமாக உள்ளது. உயர்கல்வி சேர்க்கையில் பெண்களின் முன்னிலை, கிராமப்புறங்களில் ‘மகளிர் சுயஉதவிக் குழுக்கள்’ மற்றும் 100 நாள் வேலைத் திட்டம் (MGNREGS), பாதுகாப்பான தங்குமிட வசதிகள் (‘தோழி’ விடுதிகள்) மற்றும் இலவசப் பேருந்துப் பயணம் (விடியல் பயணம்) போன்ற அரசின் சமூக நலச் திட்டங்கள் பெண்களின் வேலைவாய்ப்புப் பங்கேற்பை வெகுவாக உயர்த்தியுள்ளன. எனினும், ஆண்களுடன் ஒப்பிடுகையில் நிலவும் ஊதிய இடைவெளி, வீட்டுப் பராமரிப்புப் பணிகளில் பெண்களின் அதிகப்படியான நேரம் செலவிடப்படுவது மற்றும் உயர்நிலை மேலாண்மைப் பதவிகளில் இன்னும் முழுமையான சமநிலை எட்டப்படாதது போன்ற சவால்களும் தொடர்ந்து நீடிக்கின்றன. இப்படி தமிழகத்தில் வேலைவாய்ப்பில் பெண்களின் பங்களிப்பு ஒப்பீட்டளவில் அதிகமாக இருந்தபோதிலும், ஊதியம், வேலைத் தரம் மற்றும் ஊதியமில்லாத வீட்டு வேலைகளில் பெரும் பாலின ஏற்றத்தாழ்வு நிலவுவதாக மெட்ராஸ் வளர்ச்சி ஆய்வுக் கழகத்தின் (MIDS) புதிய ஆய்வு சுட்டிக்காட்டுகிறது. ஆண்களுடன் ஒப்பிடும்போது பெண்கள் கணிசமாகக் குறைவான ஊதியத்தையே பெறுகின்றனர்.

ஆண்களின் ஊதியத்தில் 74 சதவீதம் மட்டுமே பெறும் பெண்கள்

மெட்ராஸ் வளர்ச்சி ஆய்வுக் கழகம் வெளியிட்டுள்ள ஆய்வறிக்கையின்படி, தமிழ்நாட்டில் ஆண்களின் ஊதியத்தோடு ஒப்பிடுகையில் பெண்கள் வெறும் 74 சதவீத ஊதியத்தையே வருமானமாகப் பெறுகின்றனர். பெண்களின் வேலைவாய்ப்பு எண்ணிக்கை அதிகமாகத் தெரிந்தாலும், நடைமுறையில் அவர்களுக்கான வருமான இடைவெளி பெருமளவில் நீடிக்கிறது.

தலித் பெண்களுக்குக் கூடுதல் ஊதிய இழப்பு

வேலைவாய்ப்பு மற்றும் ஊதிய ஏற்றத்தாழ்வில் சாதியக் காரணியும் முக்கியப் பங்காற்றுகிறது. பொதுப் பிரிவைச் சேர்ந்த பெண்களை விடவும், ஆண்களை விடவும் தலித் சமூகத்தைச் சேர்ந்த பெண்கள் கூடுதல் ஊதியக் குறைவையும் பொருளாதாரப் பின் தங்கிய நிலையையும் சந்திக்க வேண்டியுள்ளது என்று இந்த ஆய்வு விளக்குகிறது.

வேலைத் தரம் மற்றும் ஊதியமில்லாத வீட்டுப் பொறுப்புகள்

வேலை செய்யும் இடங்களில் பெண்களுக்கு வழங்கப்படும் பணிகளின் தரம் மற்றும் பாதுகாப்பு கேள்விக்குறியாகவே உள்ளது. இதுமட்டுமன்றி, வேலைக்குச் செல்லும் பெண்கள் வீடுகளிலும் சமையல், பராமரிப்பு போன்ற ஊதியமில்லாத வீட்டுப் பொறுப்புகளை அதிகளவில் சுமக்க வேண்டிய கட்டாயத்திற்குத் தள்ளப்படுகிறார்கள்.

சமூகப் பாதுகாப்பு மற்றும் கொள்கை மாற்றத்தின் அவசியம்

பணியிடங்களில் நிலவும் இந்த மறைமுக ஏற்றத்தாழ்வுகளைக் களையவும், பாலின ஊதிய இடைவெளியைக் குறைக்கவும் அரசு விரைந்து கொள்கை ரீதியான நடவடிக்கைகளை எடுக்க வேண்டும். சம வேலைக்குச் சம ஊதியம் என்பதை உறுதி செய்வதோடு, விளிம்புநிலைச் சமூகப் பெண்களுக்கான பொருளாதாரப் பாதுகாப்பை மேம்படுத்துவது காலத்தின் அவசியமாகும்.

மணிவண்ணன்