என்ன விலை= விமர்சனம்!

தமிழ் சினிமா வரலாற்றை உற்று நோக்கினால், பிரம்மாண்டமான செட் அமைப்புகளும், ஆயிரம் கோடி வசூலை இலக்காகக் கொண்ட அதிரடிச் சண்டை காட்சிகளும் ஒருபுறம் ரசிக்கப்பட்டாலும், ரசிகனின் மனதை ஆழமாகத் தொட்டு நிலைத்து நிற்பவை எப்போதும் எளிய மனிதர்களின் வாழ்வியலைப் பேசும் கதைகளாகவே இருந்து வந்துள்ளன. அன்றாட வாழ்வின் சுமையோடு போராடும் ஒரு சாமானியனின் கண்ணீர், அவனது நேர்மைக்குக் கிடைக்கும் சோதனை, அதிகார வர்க்கத்தின் முன் அவன் நடத்தும் தனி மனிதப் போராட்டம் இவை யாவும் திரையில் அரங்கேறும் போது, அது வெறும் கதையாக இல்லாமல் அரங்கில் அமர்ந்திருக்கும் ஒவ்வொரு பார்வையாளனின் பிரதிபலிப்பாக மாறிவிடுகிறது. எந்தவொரு சினிமாத்தனமும் இன்றி, மண்ணின் மணத்தோடு, எளிய மக்களின் நிஜ வாழ்க்கையின் வலியையும், அவர்களது குரலற்ற தவிப்பையும் மையமாகக் கொண்டு எந்தப் படம்களம் இறங்குகிறதோ, அந்தப் படம் தமிழ்த்திரை உலகில் என்றும் தனித்துவமான இடத்தைப் பெற்றுவிடும். அப்படியொரு எளியவனின் வாழ்வியலை முன்னிலைப்படுத்தி, சட்டத்தின் ஓட்டைகளையும் அதிகாரத்தின் பிடியையும் மிக விறுவிறுப்பான திரைக்கதையோடு கேள்விக்குள்ளாக்கி வந்துள்ள ஒரு அழுத்தமான படைப்பு தான் ‘என்ன விலை’.

கதைக்களம்

ராமேஸ்வரம் புனிதத் தீர்த்தக்கரையில் பக்தர்கள் காணிக்கையாகச் செலுத்தும் நாணயங்களையும், துணிகளையும் சேகரித்துத் தனது ஏழ்மையான நாளை ஓட்டும் எளிய மீனவன் தவசிமுத்துவின் (கருணாஸ்) வாழ்க்கைதான் இக்கதையின் மையம். அவனுக்குத் துணையாக மனைவி பாலம்மாளும் (விஜயலக்ஷ்மி வீரமணி), தங்கையும் இருக்கிறார்கள். தங்கையின் காதலும், அதனை எதிர்த்து நிற்கும் சொந்தச் சாதி வெறியர்களின் மிரட்டல்களும் அவனது அன்றாட வாழ்க்கையைச் சிக்கலாக்குகின்றன.இந்தக் குடும்பச் சுமையோடும் போராட்டங்களோடும் வாழ்ந்துவரும் தவசிமுத்துவுக்கு ஒருநாள் கடலுக்குள் கிடைக்கும் ஒரு சிறிய பதக்கம் அவனது ஒட்டுமொத்த வாழ்க்கையையும் தலைகீழாக மாற்றுகிறது. அது விலைமதிப்பற்ற பொருள் என்று அஞ்சி, நேர்மையின் அடையாளமாக அதனை ஒரு காவலரிடம் (மோகன்ராம்) அவன் ஒப்படைக்கச் செல்ல, அங்கிருந்து தொடங்குகிறது அதிகார வர்க்கத்தின் வஞ்சக விளையாட்டு. அந்தப் பதக்கத்தில் இருந்த ஒரு கல்லை மட்டும் கந்துவட்டியாகப் பிடுங்கிக் கொண்டு, அது சாதாரண பித்தளைப் பொருள் என்று அவனை ஏமாற்றித் திருப்பி அனுப்புகிறார் அந்த அதிகாரி.ஆனால், அந்தத் துண்டுக்கல்லின் உண்மையான மதிப்பு சில லட்சங்கள் என்பது தெரியவர, தவசிமுத்துவும் உண்மையை உணர்ந்து காவல் நிலையம் செல்கிறான். அங்கே அவனுக்கு நேர்வது கொடூரமான ஒடுக்குமுறை; உண்மை வெளிவந்துவிடும் என்ற பயத்தில், அவனைக் கொடூரமாக அடித்துத் திருடனாகச் சித்திரிக்கிறது காவல்துறை. பீகாரைச் சேர்ந்த ஒருவரின் காணாமல்போன பொருள் அதுவென்றும், அதனைத் தவசிமுத்துதான் திருடினான் என்றும் புனையப்பட்ட பொய் வழக்குகள் அவன் மீது பாய்கின்றன. நொந்துபோன அந்த எளிய குடும்பத்தின் கண்ணீரைத் துடைக்கக் களமிறங்குகிறாள், தவசிமுத்துவிடம் தினமும் பூ வாங்கும் வழக்கறிஞர் காஞ்சனா (நிமிஷா சஜயன்). தவசிமுத்துவைச் சட்டத்தின் பிடியிலிருந்து மீட்கக் காஞ்சனா நடத்தும் சட்டப் போராட்டம் ஒருபுறம் இருக்க, காவல்துறையின் திருட்டை மூடிமறைக்க அரசு இயந்திரம் மறுபுறம் படாதபாடு படுகிறது. பீகாரைச் சேர்ந்த அந்த நபரைத் தேடி எல்லை தாண்டி ஆள் அனுப்பி அதனைப் பொய்யெனக் காஞ்சனா நிரூபிக்கும் போது, கிணறு வெட்டப் பூதங்கள் கிளம்பிய கதையாகத் தொல்பொருள் சட்டம், புதையல் சட்டம் எனப் பல சிக்கலான திருப்பங்கள் அடுத்தடுத்து அரங்கேறுவதே ‘என்ன விலை’ படத்தின் கதைக்களம்.

நடிகர்களின் பங்களிப்பு மற்றும் நடிப்புத் திறன்

தவசிமுத்து என்ற எளிய மீனவக் கதாபாத்திரத்திற்கு உயிர் கொடுத்திருக்கிறார் நடிகர் கருணாஸ். குடும்பத்திற்காகப் போராடும் ஒரு சாதாரண மனிதன் மீது விழும் வீண் பழி ஏற்படுத்தும் வலியை, தனது இயல்பான மற்றும் அழுகைக் காட்சிகளின் மூலம் மிக ஆழமாக வெளிப்படுத்தியுள்ளார்.

வழக்கறிஞராகக் களம் கண்டுள்ள நிமிஷா சஜயன், சொந்தக் குரலில் பேசி நடித்திருப்பதுடன், நீதிமன்ற விவாதங்கள் மூலம் படத்தின் வேகத்தைத் தாங்கிப் பிடிக்கிறார். கருணாஸின் மனைவியாக விஜயலக்‌ஷ்மி வீரமணி மற்றும் தங்கையாக சாஷா ஆகியோரின் எதார்த்தமான நடிப்பும் கதைக்கு வலு சேர்க்கிறது. சுவாமிநாதன், கவிதாலயா கிருஷ்ணன், நிழல்கள் ரவி, பூர்ணிமா பாக்யராஜ் உள்ளிட்ட பலரும் தங்களது கதாபாத்திரங்களின் வழியே படத்தின் தரத்தை உயர்த்தியுள்ளனர்.

தொழில்நுட்பக் கலைஞர்களின் பங்களிப்பு

ஒளிப்பதிவாளர் ஆல்பி ஆண்டனி செயற்கையான ஒளிகளைத் தவிர்த்து, இயற்கை வெளிச்சத்திலேயே காட்சிகளைப் பதிவு செய்து கதைக்களத்திற்குரிய நம்பகத்தன்மையைக் கொண்டு சேர்த்துள்ளார். சாம்.சி.எஸ்-ன் பின்னணி இசை வழக்கமான பாணியில் இருந்து விலகி, படத்திற்குத் தேவையான அழுத்தமான உணர்வைத் தருகிறது. படத்தொகுப்பாளர் ஸ்ரீஜித் சாரங், நீதிமன்ற விவாதங்களையும் திருப்பங்களையும் எந்த இடத்திலும் தொய்வில்லாமல் தொகுத்து படத்தை விறுவிறுப்பாக நகர்த்தியுள்ளார்.

இயக்குநரின் வெற்றியும் சில குறைகளும்

தவறே செய்யாத ஒருவன் மீது விழுந்த வீண் பழியைப் போக்குவது அரசின் கடமை என்பதைப் பேசும் இயக்குநர் சஜீவ் பழவூர், இதுவரை தமிழ் சினிமாவில் எவரும் தொட்டிராத சட்டக் கேள்விகளை நீதிமன்றத்தில் எழுப்பியுள்ளார். பாதிக்கப்பட்டவருக்காக வழக்கறிஞர் கேட்கும் இழப்பீடு அரசுத் தரப்புக்குச் சவாலாக இருந்தாலும், அது சமூகத்தில் பெரும் அதிர்வுகளை உருவாக்குகிறது.

எனினும், இன்றைய நவீன காலக்கட்டத்திலும் மீனவக் கிராமங்களில் ஓலைத் தட்டிகளால் ஆன வீடுகள் இருப்பது போன்ற சில காட்சிகள் சற்று செயற்கைத்தனமாகத் தெரிவதைத் தவிர்த்திருக்கலாம்.

இறுதிப் பார்வை

 ஒரு எளிய மனிதன், தான் எந்தத் தவறும் செய்யாத குற்றத்தில் தான் குற்றவாளி அல்ல என்பதை நிரூபிக்க வேண்டி தனது வாழ்நாளின் அத்தனை மூலைமுடுக்குகளிலும் போராட வேண்டிய கொடூரமான சட்டச் சூழலை மிகச் சிறிய புள்ளியில் தொடங்கி அசாத்தியமான விவரிப்புடன் கண்முன்னே நிறுத்துகிறது இப்படம். அதிகார வர்க்கத்தின் மிரட்டல்களையும், சட்டத்தின் கண்ணாமூச்சி விதிகளையும் ஒருசேரக் கேள்விக்குள்ளாக்கும் சுவாரஸ்யமான திரைக்கதையும், நீதிமன்ற அறைகளில் அனல் பறக்கும் அதிரடி வாதங்களும் பார்வையாளர்களை நாற்காலியின் நுனிக்கே கொண்டு வந்து விடுகின்றன. சமூகம் கண்டு கொள்ளாத சாமானியனின் உச்சகட்ட வலியையும், நீதி வழங்கும் அமைப்புகளில் நிலவும் அத்தனை பலவீனங்களையும் எந்தவித சமரசமும் இன்றித் துணிச்சலாகப் பதிவு செய்திருக்கும் ‘என்ன விலை’ திரைப்படம், தமிழ் சினிமாத் துறையில் தவிர்க்கவே முடியாத ஒரு சமூகப் பிரகடனம் என்றே சொல்லலாம்

ரேட்டிங்: 3.75 / 5