‘EMI’ (மாத தவணை)-விமர்சனம்!

இப்போதெல்லாம் EMI என்பது நம் அனைவரின் வாழ்க்கையிலும் பிரிக்க முடியாத ஒரு பகுதியாக மாறிவிட்டது. ஒரு காலத்தில், விஜிபி சகோதரர்கள் போன்றவர்கள் தெரு தெருவாக சைக்கிளில் பொருட்களை விற்று, மாத தவணை என்ற கருத்தை மக்களிடம் கொண்டு சேர்த்த வரலாறு இன்றைய தலைமுறைக்கு தெரிந்திருக்க வாய்ப்பில்லை. ஆனால், இன்று எவர்சில்வர் பாத்திரம் முதல் வீடு வரை அனைத்தையும் எளிதாக வாங்கி விடலாம் என்று மாத தவணை திட்டம் நம்மை ஆகர்ஷிக்கிறது. இதில் சிக்கி, பலர் தங்கள் வாழ்க்கையை சின்னாபின்னமாக்கிக் கொள்கிறார்கள். இந்த சூழலை ஜாலியான தொனியில் சொல்லி, அதே சமயம் ஒரு எச்சரிக்கையாகவும் வெளிப்படுத்தும் விதமாக, ‘EMI’ என்ற தலைப்பில் ஒரு தமிழ் திரைப்படம் வெளியாகியுள்ளது. இப்போது, இப்படத்தின் விமர்சனத்தை விலாவாரியாகப் பார்ப்போமா?.

கதை – எளிமையானது, ஆனால் எதார்த்தமானது

‘EMI’ திரைப்படம் ஒரு நடுத்தர வர்க்க இளைஞனை மையமாக வைத்து நகர்கிறது. அவன் தன் காதலியை கவர வேண்டும் என்பதற்காக ஆடம்பரமான வாழ்க்கையை கனவு காண்கிறான். ஆனால், கையில் பணம் இல்லாததால், கடன் என்ற பாதையை தேர்ந்தெடுக்கிறான்.அதன் மூலம் கார், பைக், காதலியின் செலவுகள் என அனைத்துக்கும் EMI-யால் ஹேண்டில் செய்து காதலித்த பெண்ணையே கல்யாணம் செய்து ஹேப்பியா லைஃப்பை ஓட்டுகிறார். ஒரு கட்டத்தில் எதிர்பாராமல் நாயகன் தன் வேலையை இழக்கிறான். இதனால், அவனது வாழ்க்கை தடம் புரண்டு, நண்பர்களின் துரோகமும் வெளிப்படுகிறது. இறுதியில், இந்த சிக்கல்களில் இருந்து அவன் எப்படி மீள்கிறான் என்பதே கதை. இது ஒரு சாதாரண கதைக்களமாக தோன்றினாலும், நம் அன்றாட வாழ்வில் பலருக்கும் பொருந்தக்கூடிய உண்மையை பிரதிபலிக்கிறது.

நடிப்பு – பளிச்சென்று தெரிகிறது

சதாசிவம் என்ற புதுமுக நடிகர் கதாநாயகனாக நடித்திருக்கிறார். அவரது இயல்பான நடிப்பு, குறிப்பாக காதலுக்காக எல்லாவற்றையும் செய்யும் இளைஞனின் உணர்வுகளை அழகாக வெளிப்படுத்துகிறது. சாய் தன்யா கதாநாயகியாக வருகிறார் – அவரது பாத்திரம் சிறியதாக இருந்தாலும், தேவையான தாக்கத்தை ஏற்படுத்துகிறது. ஆதவன், லொள்ளு சபா மனோகர், செந்தி குமாரி போன்றவர்களின் துணை நடிப்பு படத்துக்கு கூடுதல் சுவாரஸ்யம் சேர்க்கிறது. குறிப்பாக, பிளாக் பாண்டியின் காமெடி காட்சிகள் படத்தின் ஜாலியான தன்மையை உயர்த்துகின்றன.

இயக்கம் – எச்சரிக்கையும், ரசனையும்

சதாசிவம் சின்னராஜ் இயக்கிய இப்படம், EMI-ன் பின்னால் உள்ள ஆபத்தை சொல்லும் அதே வேளையில், பார்வையாளர்களை சிரிக்கவும் வைக்கிறது. கதையை எளிமையாகவும், புரியும்படியும் சொல்லியிருக்கிறார். சில இடங்களில் படம் கொஞ்சம் நீளுகிறது என்று தோன்றினாலும், ஒட்டுமொத்தமாக பார்க்கையில் இயக்குனரின் நோக்கம் தெளிவாகிறது – மக்களுக்கு ஒரு பாடத்தை சொல்ல வேண்டும், ஆனால் போரடிக்காமல்.

தொழில்நுட்பம் – படத்துக்கு பக்க பலம்

ஸ்ரீநாத் பிச்சையின் இசை படத்துக்கு பெரிய பலம். பின்னணி இசை காட்சிகளுக்கு உணர்வை சேர்க்கிறது, பாடல்களும் கேட்கும் படியாக உள்ளன. பிரான்சிஸ் ராஜ்குமாரின் ஒளிப்பதிவு நடுத்தர வர்க்க வாழ்க்கையை அழகாக படம்பிடித்திருக்கிறது. ஆர். ராமரின் படத்தொகுப்பு சற்று இறுக்கமாக இருந்திருக்கலாம், ஆனால் பெரிய பாதிப்பை ஏற்படுத்தவில்லை.

மொத்தத்தில் – ஜாலியும் பாடமும்

‘EMI’ ஒரு பக்கம் சிரிக்க வைக்கும் காமெடி படமாகவும், மறுபக்கம் நிதானமாக யோசிக்க வைக்கும் எச்சரிக்கை கதையாகவும் இருக்கிறது. இது எல்லோரும் பார்க்க வேண்டிய படம் என்று சொல்லலாம், குறிப்பாக இளைஞர்கள் மற்றும் EMI-ல் சிக்கி தவிக்கும் குடும்பங்கள். படம் 126 நிமிடங்கள் ஓடுகிறது, ஆனால் அதற்குள் ஒரு முழுமையான அனுபவத்தை தருகிறது. அதாவது ஒரு சராசரிக்கு மேல் உள்ள படம் – பெரிய ஆச்சர்யங்கள் இல்லை, ஆனால் பார்த்த பிறகு “அட, இதை நாம நினைச்சு பார்க்கணும்” என்ற எண்ணத்தை ஏற்படுத்தும். EMI-ன் மாயையில் சிக்காமல், நிதி திட்டமிடலுடன் வாழ வேண்டும் என்பதை ஜாலியாக சொல்லி செல்கிறது இப்படம்- வி,சேகர் பாணியில்

மார்க்: 3/5