டிஜிட்டல் உலகம் அசுர வேகத்தில் வளர்ந்து வரும் நிலையில், அதற்கு இணையான அச்சுறுத்தல்களும் அதிகரித்து வருகின்றன. குறிப்பாக, மென்பொருள்களில் உள்ள ஓட்டைகளைக் கண்டறிந்து அவற்றின் வழியாக ஊடுருவும் சைபர் குற்றவாளிகளைத் தடுக்க, இந்திய சைபர் பாதுகாப்பு நிறுவனங்கள் தற்போது AI ஏஜென்ட்டுகளை (AI Agents) களம் இறக்கியுள்ளன.
வாரங்கள் அல்ல.. இனி சில மணிநேரங்கள்!
முன்பெல்லாம் ஒரு நிறுவனத்தின் மென்பொருளில் உள்ள பலவீனங்களை (Vulnerabilities) கண்டறிய நிபுணர்களுக்கு 4 முதல் 5 நாட்கள் வரை தேவைப்படும். மென்பொருள் பெரியதாக இருந்தால் 20 நாட்கள் வரை கூட நீடிக்கும். ஆனால், இந்துஸ்பேஸ் (Indusface) மற்றும் அஸ்ட்ரா செக்யூரிட்டி (Astra Security) போன்ற இந்திய நிறுவனங்கள் இப்போது LLM (Large Language Models) அடிப்படையிலான AI அமைப்புகளைப் பயன்படுத்துகின்றன.
“முன்பு பல நாட்கள் எடுத்த வேலை, இப்போது சில மணிநேரங்களிலேயே முடிந்துவிடுகிறது,” என்கிறார் இந்துஸ்பேஸ் நிறுவனத்தின் தலைமை நிர்வாக அதிகாரி ஆஷிஷ் டாண்டன்.
51 நொடிப் போர்: மின்னல் வேகத் தாக்குதல்கள்
சைபர் குற்றவாளிகள் இப்போது முன்னெப்போதையும் விட வேகமாகச் செயல்படுகின்றனர். கிரவுட்ஸ்டிரைக் (CrowdStrike) தரவுகளின்படி, ஒரு மென்பொருள் வலையமைப்பிற்குள் நுழைந்த திருடர்கள், வெறும் 48 நிமிடங்களுக்குள் தகவல்களைக் கையாளத் தொடங்கிவிடுகின்றனர். சில அதிவேகத் தாக்குதல்கள் வெறும் 51 நொடிகளிலேயே அரங்கேறுகின்றன.
2025-இல் சுமார் 2.7 லட்சமாக இருக்கும் சைபர் பாதுகாப்பு ஓட்டைகள், 2030-ஆம் ஆண்டிற்குள் ஆண்டுக்கு 10 லட்சத்தைத் தாண்டும் என கார்ட்னர் (Gartner) நிறுவனம் எச்சரிக்கிறது.
திருடனுக்கும் கையில் AI: ‘கிளாஸ்விங்’ திட்டம்
ஆச்சரியம் என்னவென்றால், மென்பொருள் ஓட்டைகளைக் கண்டறிந்து அதைத் தற்காத்துக் கொள்ள உதவும் அதே AI தொழில்நுட்பம், இப்போது தாக்குதல் நடத்துபவர்களுக்கும் ஆயுதமாக மாறியுள்ளது. ஆந்த்ரோபிக் (Anthropic) நிறுவனத்தின் Claude Mythos Preview போன்ற புதிய AI அமைப்புகள், மென்பொருள் பலவீனங்களை மிக எளிதாகக் கண்டறிந்து அவற்றைச் சுரண்டும் (Exploit) திறன் கொண்டவை.
இந்த ஆபத்தைக் குறைக்க மைக்ரோசாஃப்ட், ஆப்பிள் போன்ற உலகளாவிய ஜாம்பவான்கள் ஒன்றிணைந்து ‘புராஜெக்ட் கிளாஸ்விங்’ (Project Glasswing) என்ற கூட்டு முயற்சியில் ஈடுபட்டுள்ளனர்.
வேகமாக ஓடும் திருடனைப் பிடிக்க, காவலனும் அதிவேகமாக ஓட வேண்டும் என்ற நிலையில், இந்திய சைபர் பாதுகாப்பு நிறுவனங்கள் AI-ஐத் தங்களது ‘டிஜிட்டல் ஆயுதமாக’ மாற்றித் தற்காப்புப் பணியைத் தீவிரப்படுத்தியுள்ளன.
