செய்தியைக் கேட்க / Listen to News
‘மில்லியன் டாலர் ஸ்டுடியோஸ்’ மற்றும் ‘நியோ கேசில் கிரியேஷன்ஸ்’ நிறுவனங்களின் கூட்டுத் தயாரிப்பில், ‘ஜமா’ பட புகழ் பாரி இளவழகன் இயக்கி, நடித்துள்ள ‘அன்பே டயானா’ திரைப்படத்தின் பிரம்மாண்ட டிரெய்லர் வெளியீட்டு விழா சென்னையில் நடைபெற்றது. திரைப்பிரபலங்கள் பலர் கலந்துகொண்ட இந்த விழாவில், படத்தின் புதுமையான கதைக்களம் மற்றும் தயாரிப்புப் பணிகள் குறித்த பல சுவாரஸ்யமான தகவல்களைப் படக்குழுவினர் பகிர்ந்துகொண்டனர்.
பெரம்பூர் மண்ணின் மணமும் ஆங்கிலோ-இந்திய வாழ்வியலும்
சென்னையின் வரலாற்றுச் சிறப்புமிக்க பெரம்பூர் பகுதியை மையமாகக் கொண்டு, வெவ்வேறு கலாச்சாரப் பின்னணியைக் கொண்ட இருவருக்குள் மலரும் காதலைப் பேசுகிறது இத்திரைப்படம். படம் குறித்து இசையமைப்பாளர் பரத் சங்கர் பேசுகையில், “நான் சென்னை பையன் என்றாலும், இயக்குநர் பாரி பெரம்பூரை விவரித்த விதம் எனக்குள் ஒரு தனி உலகத்தைக் காட்டியது. இதற்காகப் படப்பிடிப்பு தொடங்கும் முன்பே பெரம்பூரின் ஐசிஎஃப் உள்ளிட்ட இடங்களுக்கு நேரில் சென்று அங்குள்ள உண்மை மனிதர்களின் வாழ்வியலை உள்வாங்கிக் கொண்டேன். இதுவரை யாரும் காட்டாத பெரம்பூரை ஒளிப்பதிவாளர் ஷெல்லி கேலிஸ்ட் தனது கேமராவில் கொண்டு வந்துள்ளார்” என்றார்.
கதாநாயகி ரம்யா ரங்கநாதன் பேசுகையில், “இந்தப் படம் பெரம்பூரின் கலாச்சாரத்தையும், குறிப்பாக அங்கு வாழும் ஆங்கிலோ-இந்திய சமூகத்தின் அன்பான வாழ்க்கை முறையையும் மிகவும் அழகாகப் பதிவு செய்துள்ளது” என்றார்.
நீண்ட இடைவெளிக்குப் பின் கம்பீரமாக மீண்டு வரும் ரோஜா!
தமிழ் சினிமாவின் முன்னணி நடிகையான ரோஜா, நீண்ட இடைவெளிக்குப் பிறகு இப்படத்தில் ஒரு முழுநீள முக்கிய கதாபாத்திரத்தில் நடித்துள்ளார். தன் கதாபாத்திரம் குறித்துப் பேசிய அவர், “ஆந்திராவிலிருந்து தமிழகத்திற்கு வந்து செட்டிலான ஒரு பெண்ணின் வேடத்தில் நடித்துள்ளேன். இது என் நிஜ வாழ்க்கையோடு மிக நெருக்கமாக இருந்ததால் உடனே ஒப்புக்கொண்டேன். குடும்ப பாசம், உறவுகள், காதல், உணர்வுகள் என அனைத்தும் சரியான விகிதத்தில் கலந்த ஒரு நல்ல படமாக இது உருவாகியுள்ளது. குறிப்பாக, இதன் கிளைமாக்ஸ் காட்சி அனைவரின் மனதையும் உருக்கும் வகையில் மிகவும் வித்தியாசமாக இருக்கும்” என்று நெகிழ்ச்சியுடன் குறிப்பிட்டார்.
விருதுகளுக்குப் பின் வணிகக் களத்தில் பாரி இளவழகன்
யதார்த்தமான வாழ்வியலைப் பேசி விமர்சகர்களின் பாராட்டுகளைப் பெற்ற ‘ஜமா’ படத்திற்குப் பிறகு, இயக்குநர் பாரி இளவழகன் கமர்சியல் களத்தில் இறங்கியுள்ளதைச் சிறப்பு விருந்தினராக வந்த இயக்குநர் சசிகுமார் வெகுவாகப் பாராட்டினார். “ஜமா படத்தின் மூலம் தான் ஒரு உண்மையான படைப்பாளி என்பதை நிரூபித்த பாரி, தற்போது முழுமையான பொழுதுபோக்குத் திரைப்படமாக ‘அன்பே டயானா’வை உருவாக்கியிருக்கிறார். இதில் அவர் நிச்சயம் பெரிய வெற்றியைப் பெறுவார்” என்று வாழ்த்தினார்.
கதாபாத்திரங்களின் தேர்வும் நடிகர்களின் அர்ப்பணிப்பும்
படத்தில் ‘யங் ஃபாதர்’ கதாபாத்திரத்தில் நடித்துள்ள நடிகர் சேத்தன், “முதலில் அப்பா வேடம் என்றதும் தயக்கமாக இருந்தது. ஆனால் கதையைக் கேட்ட பிறகு, தேவைப்பட்டால் தாத்தா கதாபாத்திரம்கூட மகிழ்ச்சியாகச் செய்யலாம் என்று தோன்றும் அளவிற்கு ஒவ்வொரு பாத்திரத்தின் பயணமும் நேர்த்தியாக எழுதப்பட்டிருந்தது” என்றார். யூடியூப் பிரபலம் ‘பரிதாபங்கள்’ கோபி, இயக்குநர் பாரி மீது கொண்ட நம்பிக்கையால் கதையைக் கேட்பதற்கு முன்பே நடிக்கச் சம்மதித்ததாகக் கூறி, படக்குழுவினருக்குத் தன் நன்றியைத் தெரிவித்தார். இயக்குநர் சமுத்திரக்கனியும் படக்குழுவினரின் நேர்மறையான கூட்டு உழைப்பிற்குத் தன் வாழ்த்துகளைத் தெரிவித்தார்.
‘மண்டேலா’, ‘மாவீரன்’ படங்களின் இசையமைப்பாளர் பரத் சங்கர் இசையமைப்பில், ரம்யா ரங்கநாதன் டயானா என்ற முதன்மை பாத்திரத்தில் நடித்துள்ள ‘அன்பே டயானா’ திரைப்படம், வரும் ஜூலை 17, 2026 அன்று உலகம் முழுவதும் உள்ள திரையிரங்குகளில் குடும்பங்கள் கொண்டாடும் படமாக வெளியாகவுள்ளது.
