🛑ஓர் உயிர் எச்சரிக்கை! தேசிய வலிப்பு நோய் தினம்: நாம் அறியாத அபாயங்கள் என்னென்ன?

நவம்பர் 17 – இந்நாள், தேசிய வலிப்பு நோய் தினமாக அனுசரிக்கப்படுகிறது. வலிப்பு நோய் (Epilepsy) குறித்த தவறான புரிதல்களை நீக்கி, பாதிக்கப்பட்டவர்களுக்கு உரிய விழிப்புணர்வை ஏற்படுத்துவதே இந்நாளின் தலையாய நோக்கம் ஆகும். மூளை நரம்பு தொடர்பான நோய்களில் தலைவலிக்கு அடுத்தபடியாக அதிகமாகக் காணக்கூடிய இந்த நோய் பற்றிய உண்மைகளை இப்போது தெரிந்துக் கொள்வோமா?

🧠 வலிப்பு நோய்: அது என்ன?

ஆங்கிலத்தில் எபிலெப்சி (Epilepsy) என்று அழைக்கப்படும் இந்தச் சொல், கிரேக்க வார்த்தையான ‘எபிலாம்பானீன்’ (Epilambanein) என்பதிலிருந்து வந்தது. இது மூளையில் ஏற்படும் ஒரு நரம்பு மண்டலக் கோளாறு ஆகும்.

வலிப்பு என்றால் என்ன?

மூளை பாதிக்கப்பட்டுள்ளது அல்லது அதிகக் காய்ச்சல், இரத்தக் கொதிப்பு போன்ற காரணங்களால் உடல்நிலை பாதிக்கப்பட்டுள்ளது என்பதன் அறிகுறியாகவே வலிப்பு ஏற்படுகிறது.

• திடீரெனக் கையும் காலும் வெட்டி வெட்டி இழுக்கும்.

• வாயில் நுரை தள்ளும்; கண்கள் மேலே சுழலும்.

• நாக்கு பற்களுக்கிடையில் சிக்கி கடிபட்டு இரத்தமும் வழியலாம்.

• சில நிமிடங்கள் மட்டுமே நீடிக்கும் இந்த நிகழ்வில், பாதிக்கப்பட்டவர் சுயநினைவை இழந்து தரையில் கிடப்பார்.

இந்த ‘நிகழ்வுக்கு’ப் பெயர் ‘வலிப்பு’. ஒருவருக்கு இரண்டு முறைக்கு மேல் வலிப்பு வந்திருக்குமானால், அவருக்கு அது ‘வலிப்பு நோய்’ ஆகும்.

🌍 பாதிப்பின் அளவு

இந்த நோய் யாருக்கு வேண்டுமானாலும் வரலாம். பிறந்த குழந்தை, இளைய வயதினர், முதியவர் என எல்லா வயதினருக்கும் வலிப்பு நோய் வர வாய்ப்பு உண்டு.

• இந்தியாவில் 100 பேரில் ஒருவருக்கு வலிப்பு நோய் இருக்கிறது.

• ஆண்டுதோறும் 10 லட்சம் பேர் புதிதாக வலிப்பு நோய் வந்து சிகிச்சை பெறுகின்றனர்.

• இது இடம், பொருள், ஏவல் பார்க்காமல் திடீரெனத் தாக்கக்கூடியது.

⚡ வலிப்பு எப்படி ஏற்படுகிறது?

நமது மூளை ஒரு சக்தி வாய்ந்த மின் உற்பத்தி நிலையம் போன்றது. மூளை மற்றும் நரம்பு செல்களில் தகவல் பரிமாற்றத்திற்காக மிகச் சிறிய அளவில் மின்சாரம் இயல்பாகவே உற்பத்தியாகிறது.

ஏதாவது ஒரு காரணத்தால் மூளையில் அதீத அழுத்தம் உண்டாகும்போது, இந்த மின்சாரம் அபரிமிதமாக உற்பத்தியாகி, ஒரு மின்புயல் போலக் கிளம்புகிறது.

பூமியின் உள் அடுக்குகளில் உண்டாகிற அதிர்வுகள் நிலநடுக்கத்தை ஏற்படுத்துவதைப் போல, மூளையில் உண்டாகிற இந்த அதீத மின் அதிர்வுகளே நரம்புகள் வழியாக உடல் உறுப்புகளுக்குக் கடத்தப்பட்டு, உறுப்புகளின் இயக்கத்தை மாற்றி, கை, கால்கள் உதறத் தொடங்கக் காரணமாகின்றன. இதைத்தான் நாம் ‘வலிப்பு’ என்கிறோம்.

⚠️ முக்கிய காரணங்கள் யாவை?

வலிப்பு ஏற்படுவதற்குப் பல காரணங்கள் உள்ளன, ஆனால் 50% பேருக்குக் காரணமே தெரியாது. அறியப்பட்ட காரணங்கள் சில:

சிலருக்கு மன உளைச்சல் காரணமாக ‘பொய் வலிப்பு’ வருவதும் உண்டு. 

🚨 எச்சரிக்கை அறிகுறிகள் மற்றும் முதலுதவி

பொதுவாக வலிப்பு நோய் திடீரென்றுதான் வரும் என்றாலும், வருவதற்குச் சில நிமிடங்களுக்கு முன்னதாக ‘ஆரா’ (Aura) எனப்படும் அறிகுறிகள் தோன்றலாம்.

• திடீர் தலைவலி, குழப்பமான மனநிலை, வியர்த்தல்.

• காதில் மாயக் குரல் கேட்பது, மங்கலான பார்வை, நடை தடுமாற்றம்.

இந்த எச்சரிக்கை அறிகுறிகள் தென்பட்டால், வலிப்பு உள்ளவர்கள் உடனடியாகப் பாதுகாப்பான இடத்துக்குச் சென்று படுத்துக்கொள்வது அவசியம்.

செய்ய வேண்டிய முதலுதவி

1. வலிப்பு வந்தவரைப் பக்கவாட்டில் சாய்த்துப் படுக்கவையுங்கள்.

2. சட்டைப் பொத்தான், இடுப்பு பெல்ட் போன்றவற்றைத் தளர்த்தி, நன்கு சுவாசிக்க வழி செய்யுங்கள்.

3. அருகில் கூர்மையான பொருட்கள் இருந்தால் அவற்றை அப்புறப்படுத்துங்கள்.

4. வலிப்பு 5 நிமிடங்களுக்கு மேல் நீடித்தால், அது ஆபத்து. உடனே ஆம்புலன்ஸை வரவழைத்து மருத்துவமனையில் சேர்க்க வேண்டும்.

செய்யக் கூடாதவை

• வலிப்பைக் கட்டுப்படுத்தக் கை, கால்களை அழுத்திப் பிடிக்கக் கூடாது.

• நினைவு திரும்பும்வரை குடிக்கவோ, சாப்பிடவோ எதுவும் தரக்கூடாது.

• வாய்க்குள், பற்களுக்கு இடையில் எந்தப் பொருளையும் வைக்கக்கூடாது (இரும்புச் சாவி, கரண்டி உட்பட).

• மூக்கில் வெங்காயச் சாற்றை ஊதுவது கூடாது.

குழந்தைகளுக்கு: காய்ச்சல் வலிப்பு வராமல் தடுக்க, காய்ச்சல் வந்தால் உடனே பாராசிட்டமல் மருந்தைக் கொடுத்து, நெற்றி, மார்பு போன்ற பகுதிகளில் ஈரத்துணியைப் போடுவது அவசியம்.

🛡️ வலிப்பு நோய் உள்ளவர்களுக்கான எச்சரிக்கைகள்

வலிப்பு நோயைக் கட்டுக்குள் வைத்திருப்பது, சாதாரண வாழ்க்கை வாழ்வதற்கு மிகவும் அவசியம். இதற்காகப் பின்பற்ற வேண்டிய சில கட்டுப்பாடுகள்:

• வாகனங்களை ஓட்டுவதைத் தவிர்க்க வேண்டும்.

• இயந்திரங்களில் பணிபுரிவது, உயரமான இடங்களில் வேலை செய்வது, நீச்சலடிப்பது போன்றவற்றைத் தவிர்க்க வேண்டும்.

• தொடர்ச்சியாக அதிக நேரம் தொலைக்காட்சி பார்க்கக் கூடாது.

• மது அருந்தக்கூடாது; புகை பிடிக்கக்கூடாது.

• வலிப்பு மாத்திரைகளை ஒருபோதும் மருத்துவரின் ஆலோசனை இல்லாமல் நிறுத்தக் கூடாது அல்லது விட்டுவிட்டுச் சாப்பிடக் கூடாது. ஒரு வேளைக்குச் சாப்பிட மறந்தாலும், அது நினைவுக்கு வந்ததும் உடனே மாத்திரையைச் சாப்பிட்டுவிட வேண்டும்.

தேசிய வலிப்பு நோய் தினத்தில், இந்த நோய் குறித்து அச்சம் கொள்வதைத் தவிர்த்து, சரியான புரிதலையும், சிகிச்சை முறைகளையும் கடைப்பிடித்து, இந்நோயால் பாதிக்கப்பட்டவர்களுக்குச் சமூகத்தில் உரிய மரியாதையையும், ஆதரவையும் வழங்குவோம்.

நிலவளம் ரெங்கராஜன்