தி டார்க் ஹெவன்- விமர்சனம்!

திரையுலகில் ஹாரர் மற்றும் சஸ்பென்ஸ் ஜானர் படங்களுக்கு எப்போதுமே தனி வரவேற்பும், ரசிகர்களின் மத்தியில் அலாதியான மவுசும் உண்டு. மனிதனின் அடிப்படை உணர்வுகளில் ஒன்றான பயத்தையும், அடுத்தது என்ன நடக்கும் என்ற திக்கென்ற எதிர்பார்ப்பையும் திரையில் ஒளிரச் செய்யும் இந்த வகை படங்கள், பார்வையாளர்களை இருக்கையின் நுனிக்கே வரவழைக்கும் மாயம் கொண்டவை. பொதுவாக, ஆவிகள், பேய்கள் மற்றும் மாந்திரீகம் சார்ந்த ஹாரர் படங்களும், துப்பறிதல், குற்றப் பின்னணி, திருப்பங்கள் நிறைந்த சஸ்பென்ஸ்-த்ரில்லர் படங்களும் எந்தவித மொழி எல்லைகளையும் தாண்டி உலகளாவிய ரசிகர்களை ஈர்க்கின்றன. லாஜிக் மீறாத திரைக்கதை, எதிர்பாராத திருப்பங்கள் (Twists & Turns), பிரம்மாண்டமான பின்னணி இசை மற்றும் தரம் வாய்ந்த ஒளிப்பதிவு ஆகியவை இப்படங்களின் வெற்றிக்கு முக்கிய தூண்களாக விளங்குகின்றன. குடும்பங்களாக வந்து தியேட்டர்களில் ரசிக்கும் பாரம்பரியத்திற்கு மாறாக, தற்போதைய டிஜிட்டல் மற்றும் ஓடிடி (OTT) யுகத்தில் இந்த ஜானர் படங்கள் கோலோச்சி வரும் சூழலில் காலத்தை வென்ற ஒரு விசித்திரமான புத்தகம், ஏழு ஆண்டுகளுக்கு ஒருமுறை சாபத்தால் துடிக்கும் ஒரு மலைக்கிராமம், மற்றும் அடுத்தடுத்து அரங்கேறும் கொடூரமான கொலைகளை மையமாகக் கொண்டு இயக்குநர் எஸ்.பாலாஜி இயக்கத்தில் வெளியாகியுள்ள திரைப்படம் ‘தி டார்க் ஹெவன்’. பெரிய நட்சத்திர பட்டங்கள் ஏதுமின்றி, நேர்த்தியான திரைக்கதையாலும் விறுவிறுப்பான காட்சிகளாலும் ரசிகர்களைக் கட்டிப்போடும் இந்தத் திரைப்படம் தமிழ் சினிமா வட்டாரத்தில் பெரும் கவனத்தை ஈர்த்துள்ளது. வழக்கமான பேய் படங்களின் பார்முலாவிலிருந்து விலகி, மர்மமும் அறிவியல் புனைக்கதையும் கலந்த ஒரு புதிய உலகத்தை இந்தத் தி டார்க் ஹெவன் நமக்குத் திறந்துள்ளது.

எதிர்காலத்தைக் கணிக்கும் புத்தகமும் அதிர்ச்சியான தொடக்கமும்

படத்தின் தொடக்கமே நம்மை ஒரு அமானுஷ்ய உலகத்திற்கு அழைத்துச் செல்கிறது. 1970-களில் தொடங்கும் கதை, ஒரு நூலகருக்குக் கிடைக்கும் ஒரு விசித்திரமான புத்தகத்தை மையமாக வைத்து நகர்கிறது. பிரெஞ்சு ஆராய்ச்சியாளர் ஒருவரால் எழுதப்பட்டதாகக் கூறப்படும் அந்தப் புத்தகம், எதிர்காலத்தில் நடக்கவிருக்கும் சம்பவங்களை அப்படியே துல்லியமாகப் படம்பிடித்துக் காட்டுகிறது. அந்தப் புத்தகத்தைப் படிக்கும் எவரும் தங்களது சொந்த மரணத்தையோ அல்லது பேரழிவையோ முன்கூட்டியே அறிந்து கொள்ளும் விசித்திரமான சாபம் அதில் அடங்கியுள்ளது. நூலகர் ஒருவர் அதைத் தடுத்து நிறுத்த முயன்று தானும் பலியாக, அங்கிருந்து கதை வெவ்வேறு காலக்கட்டங்களுக்கு நகர்ந்து இன்றைய நவீன உலகிற்கு வந்து சேருகிறது. ஒவ்வொரு முறையும் அந்தப் புத்தகம் வேறு ஒருவரின் கையில் மாறும் போதெல்லாம், கிராமத்தில் புதிய ஆபத்துகள் அரங்கேறுகின்றன.

மேக்கரை கிராமத்தின் சாபமும் வனமங்கையின் கதையும்

அதாவது படத்தின் முக்கியக் களமாக விளங்குவது மேக்கரை என்னும் ஒரு மலைக்கிராமம் ஆகும். இந்தப் பகுதியில் ஒவ்வொரு ஏழு ஆண்டுகளுக்கு ஒருமுறையும் ஜூன் மாதத்தில் விவரிக்க முடியாத விபத்துகளிலும் கொலைகளிலும் ஆண்கள் உயிரிழப்பது வாடிக்கையாக உள்ளது. கிராம மக்கள் இதனை வனமங்கை மற்றும் தசரதன் ஆகியோரின் புராண வரலாற்றுடன் இணைத்து, அவர்களின் சாபமே இதற்குக் காரணம் என்று கண்மூடித்தனமாக நம்புகின்றனர். இந்த வரலாற்றை இயக்குநர் பாலாஜி பயன்படுத்தியிருக்கும் கிராபிக்ஸ் அனிமேஷன் காட்சிகள் எந்த இடத்திலும் படத்தின் வேகத்தைக் குறைக்காமல், மாறாக கதையின் ஆழத்தை பார்வையாளர்களுக்கு ஆழமாகப் பதிவு செய்கின்றன. கிராமத்தின் பாரம்பரிய நம்பிக்கைகளுக்கும் நடக்கும் குற்றங்களுக்கும் இடையே உள்ள தொடர்பை இந்த கிராமத்து பின்னணி மிகச் சிறப்பாகக் கட்டமைத்துள்ளது.

புதிய காவல் அதிகாரியின் அதிரடி புலனாய்வுப் பயணம்

இந்தச் சூழலில்தான் கதைக்குள் நுழைகிறார் காவல் அதிகாரியாக நடித்துள்ள சித்து. கிராமத்து மூடநம்பிக்கைகளையும் சாபங்களையும் துளியளவும் நம்பாத ஒரு பகுத்தறிவுவாதியான அவர், மேக்கரை கிராமத்தில் தொடர்ச்சியாக நடக்கும் மர்மமான கொலைகளின் பின்னணியை விசாரிக்க நியமிக்கப்படுகிறார். அவர் காவல் அதிகாரியாகப் பொறுப்பேற்றது முதல் அடுத்தடுத்த கொலைகள் அரங்கேறுகின்றன. கேரளா பகுதியிலிருந்து எல்லை தாண்டி வந்த ஒரு சைக்கோ கொலையாளிதான் இதற்குப் பின்னணியில் இருக்கிறானா அல்லது கிராமத்தின் சாபம் உண்மையாகவே வேலை செய்கிறதா என்ற கோணத்தில் அவரது புலனாய்வுப் பயணம் விறுவிறுப்பாக நகர்கிறது. சித்து தனது கதாபாத்திரத்திற்குத் தேவையான தீவிரத்தையையும் நடிப்பையும் குறைவின்றி வழங்கியுள்ளார்.

நடிகர்களின் பங்களிப்பும் பாத்திர வார்ப்புகளும்

படத்தின் பலம் அதன் கதாபாத்திரத் தெரிவு. காவல் அதிகாரியின் ஜோடியாக பிக்பாஸ் புகழ் தார்ஷிகா நவரத்தினராஜா அளவான நடிப்பை வெளிப்படுத்தி கதையோடு பொருந்திப் போகிறார். இதுவரை பார்த்திராத முற்றிலும் மாறுபட்ட ஒரு அழுத்தமான கதாபாத்திரத்தில் ரித்விகா தோன்றி தனது மிரட்டலான நடிப்பால் படத்தைத் தாங்கிப் பிடிக்கிறார். மர்மமான கிராமத்துப் பின்னணியில் நிழல்கள் ரவி, வேல ராமமூர்த்தி போன்ற அனுபவமிக்க நடிகர்களின் பங்களிப்பு கதையின் சந்தேக வலையை பல இடங்களுக்குத் திருப்பி விடுகின்றது. யார் மீதும் எளிதில் சந்தேகம் கொள்ள முடியாத வகையில் ஒவ்வொரு கதாபாத்திரமும் செதுக்கப்பட்டுள்ளது படத்திற்கு மிகப்பெரிய பிளஸ் ஆகும்.

தொழில்நுட்பப் பரிமாணமும் ஒளிப்பதிவும் திகிலும்

படத்தில் மேக்கரை கிராமத்தின் மூடுபனி சூழ்ந்த மலைப்பகுதிகள், இரவு நேரக் காட்சிகள் மற்றும் கிராமத்துப் பாரம்பரியச் சடங்குகளை மணிிகண்டன் பி.கே. தனது கேமரா மூலம் அச்சு அசலாகப் பதிவு செய்துள்ளார். ஒரு நடுத்தர பட்ஜெட் படமாக இருந்தாலும், இதன் காட்சியமைப்புகள் பல இடங்களில் பெரிய படங்களின் பிரம்மாண்டத்தைத் தருகின்றன. சக்தி பாலாஜியின் பின்னணி இசையும் சவுண்ட் டிசைனும் த்ரில்லர் காட்சிகளில் பார்வையாளர்களை இருக்கையின் நுனிக்கு அழைத்துச் செல்கின்றன. படத்தின் முதல் பாதியில் இருக்கும் விறுவிறுப்பும், கிளைமாக்ஸ் காட்சிகளை நெருங்கும் போது ஏற்படும் எதிர்பார்ப்பும் ரசிகர்களை முழுமையாக ஈர்க்கிறது.

பார்க்க வேண்டிய தரமான சஸ்பென்ஸ் த்ரில்லர்

மொத்தத்தில் சில சண்டைக்காட்சிகள் மற்றும் இரண்டாம் பாதியில் காணப்படும் சில சிறிய குழப்பங்களைத் தவிர்த்துவிட்டுப் பார்த்தால், ‘தி டார்க் ஹெவன்’ தமிழ் சினிமாவுக்குக் கிடைத்த ஒரு சுவாரஸ்யமான புலனாய்வுத் திரில்லர் ஆகும். கதையின் பல முடிச்சுகள் இரண்டாம் பாகத்திற்காக வேண்டுமென்றே கட்டவிழ்க்கப்படாமல் விடப்பட்டிருந்தாலும், முதல் பாகம் தரும் திரில் அனுபவம் குறைவில்லாதது. வரலாறும் அறிவியலும் நம்பிக்கையும் ஒன்றோடொன்று மோதும் இந்த விசித்திர உலகத்தைத் திரையில் கண்டு களிக்கலாம். ஒரு மாறுபட்ட திரில்லர் அனுபவத்தைத் தேடும் சினிமா ரசிகர்களுக்கு இந்தத் திரைப்படம் நிச்சயம் ஒரு நல்ல விருந்தாக அமையும்!

ரேட்டிங் 3.25/5