ஸ்மார்ட் டிவிகளின் சுனாமி:இந்திய வரவேற்பறைகளைக் கைப்பற்றும் கணெக்டெட் டிவி!

இந்தியாவில் தொலைக்காட்சி பார்க்கும் பழக்கம் அதிவேகமாக உருமாறி வருகிறது. இதுவரை பெருநகரங்களில் வசதி படைத்த குறிப்பிட்ட தரப்பினருக்கான ஊடகமாகக் கருதப்பட்ட கணெக்டெட் டிவி (CTV – Connected TV), தற்போது இந்தியாவின் அடித்தட்டு மக்கள் வரை சென்றடைந்து ஒரு தவிர்க்க முடியாத முதன்மை ஊடகமாக உருவெடுத்துள்ளது. டபிள்யூ.பி.பி மீடியா (WPP Media) மற்றும் ‘தி டிரேட் டெஸ்க்’ (The Trade Desk) நிறுவனங்கள் இணைந்து, ‘ஒர்மேக்ஸ் மீடியா’ (Ormax Media) ஆய்வின் அடிப்படையில் வெளியிட்டுள்ள ‘தி கணெக்டெட் டிவி எரா: இந்தியாஸ் நியூ பிரைம் டைம்’ (The Connected TV Era: India’s New Prime Time) அறிக்கை இந்திய ஊடகச் சந்தையின் இந்த பிரம்மாண்ட வளர்ச்சியைப் படம் பிடித்துக் காட்டுகிறது.

இந்தியாவில் கணெக்டெட் டிவி பயன்பாடும் பரவலும்

இந்தியாவில் கணெக்டெட் டிவி பார்வையாளர்களின் எண்ணிக்கை 2022 ஆம் ஆண்டிலிருந்து தற்போது வரை சுமார் மூன்று மடங்கு வரை அதிகரித்துள்ளது. நாட்டின் 6.2 கோடி முதல் 6.5 கோடி வரையிலான குடும்பங்களில் உள்ள சுமார் 20.7 கோடி மக்கள் இந்த சிடிவி தளங்களைப் பயன்படுத்துகின்றனர். இவர்கள் சராசரியாக நாளொன்றுக்கு 2.9 மணி நேரத்தை இந்தத் திரைகளில் செலவிடுகிறார்கள்.

இந்த வளர்ச்சியில் மிகவும் சுவாரசியமான விஷயம் என்னவென்றால், இதன் வளர்ச்சி பெருநகரங்களைக் காட்டிலும் சிறிய நகரங்களிலும் கிராமப்புறங்களிலும்தான் மிக வேகமாகக் காணப்படுகிறது. பெருநகரங்களில் 21 சதவீதம் மட்டுமே வளர்ந்துள்ள வேளையில், மினி-மெட்ரோக்களில் 45 சதவீதமும், சிறிய நகரங்களில் 55 சதவீதமும், கிராமப்புற இந்தியாவில் 110 சதவீதமும் சிடிவி பயன்பாடு அபரிமிதமான வளர்ச்சியைப் பதிவு செய்துள்ளது.

பொருளாதார வர்க்கமும் நுகர்வோர் தன்மையும்

சிடிவி என்பது உயர் வருவாய் பிரிவினருக்கானது (NCCS A) என்ற எண்ணத்தையும் இந்த அறிக்கை மாற்றியமைக்கிறது. இந்திய சிடிவி பார்வையாளர்களில் 44 சதவீதம் பேர் மட்டுமே உயர் வருவாய் பிரிவைச் சேர்ந்தவர்கள், மீதமுள்ள 56 சதவீதம் பேர் NCCS B மற்றும் அதற்குக் கீழ் உள்ள பொருளாதார வர்க்கங்களைச் சேர்ந்தவர்கள்.

அதே நேரத்தில், நாட்டின் உயர் நுகர்வு திறன் கொண்ட முதன்மை பார்வையாளர்களையும் சிடிவி தன்னகத்தே வைத்துள்ளது. நகர்ப்புற சிடிவி பார்வையாளர்களில் அதிகச் செலவு செய்யும் திறன் கொண்ட 2.1 கோடிப் பேரைக் கொண்ட உயர் பிரிவினர் நாளொன்றுக்கு 3 மணி நேரம் சிடிவி பார்க்கின்றனர். இவர்கள் நிதிச் சேவைகள், சுற்றுலா, மின்சாதனங்கள் மற்றும் விரைவு வணிகக் (Quick Commerce) பிரிவுகளில் அதிக ஆர்வம் காட்டுகின்றனர். இந்தப் பிரிவினரில் 95 சதவீதம் பேர் கார் வைத்திருப்பவர்களாகவும், 72 சதவீதம் பேர் கடன் அட்டை (Credit Card) பயன்படுத்துபவர்களாகவும், 80 சதவீதம் பேர் உள்நாட்டு விமானப் பயணம் மேற்கொள்பவர்களாகவும் இருக்கிறார்கள்.

ஸ்மார்ட் டிவி மற்றும் இயங்குதளங்களின் ஆதிக்கம்

இணையவழி ஓடிடி (OTT) உள்ளடக்கங்களை மக்கள் எவ்வாறு பார்க்கிறார்கள் என்பதில் பெரிய மாற்றம் ஏற்பட்டுள்ளது. சிடிவி பயனர்களில் 82 சதவீதம் பேர் தங்களின் ஸ்மார்ட் டிவிகளில் உள்ள செயலிகள் (In-built Apps) மூலமாகவே வீடியோக்களைப் பார்க்கிறார்கள். வெறும் 18 சதவீதம் பேர் மட்டுமே செட்-டாப் பாக்ஸ் அல்லது வெளி இணைப்புகள் மூலம் பார்க்கின்றனர். இதனால் ஸ்மார்ட் டிவி தயாரிப்பு நிறுவனங்களின் இயங்குதளங்கள் (OS) விளம்பரச் சந்தையில் முக்கிய அங்கமாக மாறியுள்ளன.

நேரியல் தொலைகாட்சியும் கணெக்டெட் டிவியும்

சிடிவி வேகமாக வளர்ந்தாலும், பாரம்பரிய நேரியல் தொலைக்காட்சி (Linear TV) சேவை முழுமையாக மறைந்துவிடவில்லை. சிடிவி வைத்திருக்கும் குடும்பங்களில் 68 சதவீதம் பேர் இன்னமும் வழக்கமான தொலைக்காட்சி சேனல்களையும் பார்க்கிறார்கள். அதே வேளையில், 32 சதவீதம் பேர் கேபிள் அல்லது டிடிஎச் இணைப்புகளை முற்றிலுமாகத் துண்டித்த ‘கார்டு-கட்டர்ஸ்’ (Cord-Cutters) ஆக மாறியுள்ளனர்.

உயர் வருவாய் குடும்பங்களில் 40 சதவீதம் பேர் மட்டுமே வழக்கமான டிவிகளைத் தொடர்ந்து பார்க்கின்றனர். எனவே, விளம்பரதாரர்கள் கேபிள் டிவி மற்றும் சிடிவி இரண்டையும் இணைத்த ‘டோட்டல் டிவி’ (Total TV) அணுகுமுறையைக் கையாள வேண்டும் என்று இந்த அறிக்கை பரிந்துரைக்கிறது.

கூட்டுப் பார்வையும் வரவேற்பறை சூழலும்

மொபைல் போன் விளம்பரங்களைப் போலன்றி, சிடிவி என்பது குடும்பத்தினர் ஒன்றாக அமர்ந்து பார்க்கும் (Co-viewing) ஊடகமாகத் திகழ்கிறது. 80 சதவீதத்திற்கும் அதிகமானோர் தங்கள் குடும்பத்தினருடனோ அல்லது நண்பர்களுடனோ சேர்ந்தே சிடிவி பார்க்கிறார்கள். ஒரு சிடிவி கணக்கு சராசரியாக 3.3 நபர்களைக் கொண்ட குடும்பத்தில் 2.5 பேரைக் சென்றடைகிறது. இதனால் குடும்பமாக முடிவெடுத்து வாங்கும் பொருட்களின் விளம்பரங்களுக்கு சிடிவி சிறந்த தளமாக அமைகிறது.

இரவு 8 மணி முதல் 10 மணி வரையிலான பிரைம் டைம் நேரத்தில் 78 சதவீதம் பேர் சிடிவி பார்க்கின்றனர். வார இறுதி நாட்களின் இரவு 10 மணி முதல் நள்ளிரவு 12 மணி வரையிலான நேரத்திலும் 61 சதவீதப் பார்வையாளர்கள் சிடிவியில் நேரத்தைச் செலவிடுகின்றனர்.

பிரபலமான உள்ளடக்கங்களும் விளையாட்டுப் பிரியர்களும்

சிடிவியில் மக்கள் அதிகம் விரும்பிப் பார்ப்பது வெப் சீரிஸ்கள் தான். 69 சதவீதம் பேர் வெப் சீரிஸ்களையும், 64 சதவீதம் பேர் கிரிக்கெட் போட்டியையும், 63 சதவீதம் பேர் திரையரங்கப் படங்களையும் பார்க்கிறார்கள். விளையாட்டுப் போட்டிகளைப் பொறுத்தவரை 60 சதவீதம் பேர் சிடிவி ஓடிடி செயலிகளையே விரும்புகின்றனர். கிரிக்கெட் போட்டிகளை 84 சதவீதம் பேர் குடும்பத்துடன் இணைந்தே பார்க்கின்றனர்.

இரண்டாம் திரை மற்றும் நுகர்வோர் நடவடிக்கை

சிடிவியில் விளம்பரம் பார்க்கும் போது 88 சதவீதம் பேர் கையில் ஸ்மார்ட்போன் அல்லது பிற சாதனங்களை (Second Screen) வைத்திருக்கிறார்கள். விளம்பரம் பார்த்த பிறகு 83 சதவீதப் பார்வையாளர்கள் அந்தப் பொருளைப் பற்றிய மேலதிகத் தகவல்களைத் தேடுகிறார்கள். இது உயர் வருவாய் பிரிவினரிடம 89 சதவீதமாக உள்ளது. இதனால், சிடிவி விளம்பரங்கள் வெறும் விழிப்புணர்வை மட்டும் ஏற்படுத்தாமல், நுகர்வோரை உடனடியாகப் பொருளை வாங்கத் தூண்டும் ‘ஃபுல்-ஃபனல்’ (Full-Funnel) கருவியாகச் செயல்படுகிறது.

ஜெனரேஷன் இசட் மற்றும் மில்லேனியல்களின் விருப்பம்

15 முதல் 29 வயதுக்குட்பட்ட ‘ஜென்-இசட்’ (Gen Z) இளைஞர்கள் நாளொன்றுக்கு 3.1 மணி நேரம் சிடிவியில் செலவிடுகின்றனர். இதில் 77 சதவீதம் பேர் குடும்பத்துடனோ நண்பர்களுடனோ இணைந்தே பார்க்கின்றனர். 38 சதவீதப் பங்கைக் கொண்ட மில்லேனியல்கள் (Millennials) நாளொன்றுக்கு 2.8 மணி நேரம் பார்க்கின்றனர். குடும்பத்தின் முதன்மை முடிவெடுப்பவர்களான தாய்மார்கள் 2.9 மணி நேரம் சிடிவி பார்க்கின்றனர், இதில் 89 சதவீதம் பேர் கூட்டுப் பார்வையாளர்களாக உள்ளனர்.

இலவச விளம்பரச் சேவை (FAST) மற்றும் மொழிப் பயன்பாடு

சந்தா கட்டணம் இல்லாத இலவச விளம்பரச் சேவை கொண்ட ‘ஃபாஸ்ட்’ (FAST – Free Ad-Supported Television) சேனல்கள் இந்தியாவில் வேகமாக வளர்ந்து வருகின்றன. மூன்றில் ஒரு பங்கு சிடிவி பயனர்கள் ஃபாஸ்ட் பற்றி அறிந்து வைத்துள்ளனர். இவர்கள் நாளொன்றுக்கு 3.4 மணி நேரம் சிடிவி பார்க்கின்றனர். டெல்லி, மும்பை, தமிழ்நாடு, ஆந்திரா-தெலங்கானா ஆகிய பகுதிகளில் செய்தி, திரைப்படம் மற்றும் ரியாலிட்டி ஷோக்களுக்கு ஃபாஸ்ட் சேனல்கள் அதிகளவில் பயன்படுத்தப்படுகின்றன.

மேலும், சப்டைட்டில் மற்றும் டப்பிங் வசதிகள் காரணமாக மொழி தடைகள் உடைக்கப்பட்டுள்ளன. 63 சதவீதம் பேர் இந்தியிலும், 40 சதவீதம் பேர் ஆங்கிலத்திலும் பார்ப்பதோடு, தமிழ், தெலுங்கு, மலையாளம், மராத்தி போன்ற பிராந்திய மொழிகளிலும் அதிகளவில் உள்ளடக்கங்களை நுகர்கின்றனர்.

எதிர்காலக் கட்டமைப்பு

எதிர்காலத்தில் சிடிவி விளம்பரங்கள் செயற்கை நுண்ணறிவு (AI) தொழில்நுட்பத்துடன் இணைந்து, நேரடியாகப் பொருட்களை வாங்கும் (Shoppable Formats) அமைப்பாக மாறவுள்ளன. விளம்பரதாரர்களுக்கு வெறும் காட்சி ஊடகமாக இல்லாமல், நுகர்வோரின் தேவையை உடனடியாகப் பூர்த்தி செய்யும் ஒரு நவீன, அறிவார்ந்த தளமாக கணெக்டெட் டிவி உருவெடுத்து வருகிறது.

செண்பகா