பருவநிலை நெருக்கடியில் 2026 பிபா உலகக் கோப்பை: வீரர்களை அச்சுறுத்தும் வெப்ப அழுத்தம்!

உலகம் முழுவதும் கால்பந்து திருவிழாவுக்கான காய்ச்சல் இன்னும் சில வாரங்களில் தொடங்கவுள்ள நிலையில், வரலாற்றிலேயே முதன்முறையாக 48 அணிகள் பங்கேற்கும் பிரம்மாண்ட உலகக் கோப்பை கால்பந்து தொடர் வட அமெரிக்காவில் கோடைகாலத்தில் நடைபெற உள்ளது. 1994-ஆம் ஆண்டிற்குப் பிறகு வட அமெரிக்கா இந்தத் தொடரை நடத்துகிறது. இருப்பினும், மைதானத்தில் ஆட்டம் சூடாவதற்கு முன்பாகவே, சுற்றுச்சூழல் விஞ்ஞானிகள் கவலை தரும் எச்சரிக்கை ஒன்றை விடுத்துள்ளனர். ‘உலக வானிலை பண்புக்கூறு’ (World Weather Attribution – WWA) என்ற காலநிலை ஆராய்ச்சி அமைப்பு வெளியிட்டுள்ள புதிய அறிவியல் ஆய்வின்படி, மனிதர்களால் தூண்டப்பட்ட பருவநிலை மாற்றம், இந்த உலகக் கோப்பை தொடரில் கடுமையான வெப்ப அழுத்தத்தை (Heat Stress) ஏற்படுத்தும் என்று எச்சரிக்கப்பட்டுள்ளது.

ஆய்வின் பின்னணியும் அதிர்ச்சியூட்டும் கண்டுபிடிப்புகளும்

லண்டன் இம்பீரியல் கல்லூரி ஆராய்ச்சியாளர்கள், போட்டி நடைபெறும் ஜூன் 11 முதல் ஜூலை 19 வரையிலான காலகட்டத்தில் அமெரிக்கா, மெக்சிகோ மற்றும் கனடாவில் உள்ள 16 மைதானங்களின் ‘வெட் பல்ப் குளோப் வெப்பநிலை’ (Wet Bulb Globe Temperature – WBGT) குறியீட்டை விரிவாக ஆய்வு செய்தனர்.

வெட் பல்ப் குளோப் வெப்பநிலை (WBGT) என்றால் என்ன? இது வெறும் காற்றின் வெப்பநிலையை மட்டும் அளவிடுவதல்ல. ஈரப்பதம் (Humidity), நேரடி சூரிய ஒளி, காற்றின் வேகம் ஆகியவற்றை உள்ளடக்கிய ஒரு கூட்டு குறியீடாகும். இதன் மூலமே மனித உடலால் வியர்வை வழியாக உள் வெப்பத்தை எவ்வளவு தூரம் கட்டுப்படுத்த முடிகிறது என்பதை அறிய முடியும்.

WWA அமைப்பின்படி, 26°C WBGT என்பது சாதாரண வெப்பநிலையில் சுமார் 30°C (அதிக ஈரப்பதத்துடன்) அல்லது வறண்ட வெப்பநிலையில் 38°C-க்கு சமமானதாகும்.

ஆய்வின் முக்கிய முடிவுகள்:

• 1994 உலகக் கோப்பை நடைபெற்ற காலநிலையை விட தற்போதைய காலநிலை 0.7°C கூடுதல் வெப்பமாக உள்ளது. மனிதனால் ஏற்பட்ட பருவநிலை மாற்றத்தின் பாதியளவு பாதிப்புகள் 1994-க்குப் பிறகே நடந்துள்ளன.

• 2026 உலகக் கோப்பையில் நடக்கவிருக்கும் மொத்தம் 104 போட்டிகளில், குறைந்தது 25% போட்டிகள் 26°C WBGT மற்றும் அதற்கு மேற்பட்ட ஆபத்தான ஈரப்பத வெப்ப சூழலில் தான் ஆடப்படவுள்ளன.

• இந்த நிலை விளையாட்டு வீரர்களுக்கு மட்டுமின்றி, மைதானத்திற்கு உள்ளேயும் வெளியேயும் இருக்கும் லட்சக்கணக்கான ரசிகர்கள், அதிகாரிகள் மற்றும் ஊழியர்களின் ஆரோக்கியத்திற்கும் பெரும் அச்சுறுத்தலாக மாறப்போகிறது.

அதிக ‘வெட்-பல்ப்’ வெப்பநிலையும் உடலநலப் பாதிப்புகளும்

அதிக ஈரப்பதம் நிறைந்த வெப்பமான சூழலில், மனித உடலால் விரைவாக வியர்வையை வெளியேற்றி உடலைக் குளிர்விக்க முடியாது. இதனால் உடலின் வெப்பநிலை சீராக இருக்காது.

உடல் தன்னைத்தானே குளிர்விக்கத் தவறும்போது பின்வரும் பேராபத்துகள் ஏற்படுகின்றன:

• கடுமையான சோர்வு (Heat Exhaustion)

• வெப்ப பக்கவாதம் (Heat Stroke)

• இருதய நோய் பாதிப்புகள் (Cardiovascular diseases)

2010-ஆம் ஆண்டின் மைல்கல் ஆய்வு ஒன்று, 35°C வெட்-பல்ப் வெப்பநிலையில் தொடர்ந்து 6 மணி நேரம் இருந்தால் அது மரணத்தை விளைவிக்கும் என்று கூறியது. ஆனால், மார்ச் 2026-ல் ‘நேச்சர்’ (Nature) இதழில் வெளியான புதிய ஆய்வு, இந்த 35°C வரம்பிற்கு கீழேயுள்ள வெப்பநிலையிலும் மனித உயிருக்கு ஆபத்துகள் வேகமாக அதிகரித்து வருவதாக எச்சரிக்கிறது.

கால்பந்து வீரர்களின் செயல்திறனும் பிபா (FIFA) vs பிஃபுப்ரோ (FIFPRO) விதிகளும்

மைதானத்தில் அதிவேகமாக ஓடி, கடுமையான உழைப்பைச் செலுத்தும் கால்பந்து வீரர்களின் சகிப்புத்தன்மையையும், செயல்திறனையும் இந்த ஈரப்பத வெப்பம் கடுமையாகப் பாதிக்கும். இதனால் சர்வதேச கால்பந்து வீரர்கள் சங்கம் (FIFPRO) மற்றும் பிபா (FIFA) இடையே விவாதங்கள் எழுந்துள்ளன.

• FIFPRO-வின் வழிகாட்டுதல்: WBGT அளவு 26°C அல்லது அதற்கு மேல் சென்றால் வீரர்களுக்கு வெப்ப அழுத்தம் ஏற்படும். எனவே போட்டியில் ‘கூலிங் பிரேக்’ (Cooling Breaks) மற்றும் தண்ணீர் குடிக்க இடைவேளை தரப்பட வேண்டும். ஒருவேளை அளவு 28°C-ஐத் தாண்டினால் விளையாடுவது பாதுகாப்பற்றது, எனவே போட்டியை ஒத்திவைக்க வேண்டும் என்று பரிந்துரைக்கிறது.

• FIFA-வின் விதிமுறை: உலகக் கால்பந்து நிர்வாக அமைப்பான பிபா (FIFA), WBGT அளவு 32°C-க்கு மேல் சென்றால் மட்டுமே போட்டியை ஒத்திவைப்பது குறித்து பரிசீலிக்கும்.

முன்னதாக 2014 பிரேசில் உலகக் கோப்பையில் அமேசான் மழைக்காட்டுப் பகுதியான மனௌஸில் நடைபெற்ற அமெரிக்கா – போர்ச்சுகல் போட்டியின் போது (30°C வெப்பநிலை மற்றும் 66% ஈரப்பதம்) முதன்முறையாக நடுவரால் அதிகாரப்பூர்வமாக ‘ஹைட்ரேஷன் பிரேக்’ வழங்கப்பட்டது குறிப்பிடத்தக்கது.

இந்த வெப்பப் பயம் காரணமாகவே 2022 கத்தார் உலகக் கோப்பை குளிர்காலத்திற்கு மாற்றப்பட்டது. ஆனால், இந்த 2026 உலகக் கோப்பைக்கான முன்னோட்டமாக நடத்தப்பட்ட 2025 கிளப் உலகக் கோப்பையின் போதே, பிற்பகல் போட்டிகளில் ஆடிய வீரர்கள் கடுமையான வெப்ப அழுத்தம், தலைச்சுற்றல் மற்றும் தசைப்பிடிப்புகளால் அவதிப்பட்டு, பிற்பகல் ஆட்டங்களைத் தவிர்க்குமாறு கோரிக்கை விடுத்திருந்தனர்.

மோசமாகப் பாதிக்கப்படவுள்ள மைதானங்களும் நகரங்களும்

அமெரிக்காவின் தெற்கு, மத்திய-மேற்கு மற்றும் ஈரப்பதம் மிகுந்த கடலோரப் பகுதி மைதானங்கள் இந்த வெப்ப அலையால் மிக மோசமாகப் பாதிக்கப்படவுள்ளன.

ஆய்வின்படி, அதிக ஈரப்பத வெப்ப அபாயத்தைக் கொண்டுள்ள 6 முக்கிய மைதானங்கள்:

1. நியூயார்க் மெட்லைஃப் ஸ்டேடியம் (இங்குதான் இறுதிப்போட்டி நடைபெற உள்ளது)

2. பிலடெல்பியா லிங்கன் ஃபைனான்சியல் ஃபீல்ட்

3. கன்சாஸ் சிட்டி ஆரோஹெட் ஸ்டேடியம்

4. மியாமி ஹார்ட் ராக் ஸ்டேடியம்

5. பாஸ்டன் ஜிலெட் ஸ்டேடியம்

6. மெக்சிகோவின் எஸ்டாடியோ மான்டேரி

குறிப்பு: இந்த 6 மைதானங்களிலும் குளிரூட்டப்பட்ட (Air-conditioned) வசதிகள் கிடையாது.

மியாமி நகரில் நடக்கும் பல போட்டிகள் 26°C WBGT-க்கு மேல் நடப்பது “ஏறக்குறைய உறுதி” என கணிக்கப்பட்டுள்ளது. டல்லாஸ் மற்றும் ஹூஸ்டன் ஆகிய நகரங்களில் 30% வெப்ப ஆபத்து இருந்தாலும், அங்குள்ள மைதானங்களில் அதிநவீன குளிரூட்டும் அமைப்புகள் (Cooling systems) இருப்பது மட்டுமே தற்போதைய ஒரே ஆறுதலான விஷயமாகும்.