எல்லை தாண்டிய இதழியல் முடக்கம்: அரசுகளுக்கு ‘கில்ட்’ கொடுத்த டோஸ்!
ஜனநாயகத்தின் நான்காவது தூணாகக் கருதப்படும் ஊடகங்கள், இரு நாடுகளுக்கு இடையே அமைதி மற்றும் புரிதலை ஏற்படுத்தும் பாலமாக இருக்க வேண்டும். ஆனால், துரதிர்ஷ்டவசமாக இந்தியா மற்றும் பாகிஸ்தான் இடையே நிலவும் அரசியல் பதற்றங்கள், இப்போது ஊடகத் துறையையும் ஒரு போர்க்களமாக மாற்றியுள்ளது. கடந்த 2025-ம் ஆண்டு பஹல்காம் பயங்கரவாதத் தாக்குதலுக்குப் பிறகு இரு நாடுகளும் பரஸ்பரம் ஊடகங்களைத் தடை செய்து வருவது, கருத்துச் சுதந்திரம் மற்றும் ஜனநாயக விழுமியங்கள் குறித்த பெரும் விவாதத்தை ஏற்படுத்தியுள்ளது.
நடந்தது என்ன?
கடந்த ஆண்டு ஏப்ரல் 22-ம் தேதி நடந்த பஹல்காம் தாக்குதலுக்குப் பிறகு இரு நாடுகளுக்கும் இடையே பதற்றம் அதிகரித்தது. இதனைத் தொடர்ந்து:
-
இந்தியாவின் நடவடிக்கை: பாகிஸ்தானின் முன்னணி நாளிதழான ‘டான்’ (Dawn) உட்பட 12 இணையதளங்கள் இந்தியாவில் முடக்கப்பட்டன. மேலும், இந்திய ராணுவம் மற்றும் காஷ்மீர் குறித்துத் தவறான தகவல்களைப் பரப்புவதாகக் கூறி, 16 பாகிஸ்தான் யூடியூப் சேனல்களுக்கு இந்திய அரசு தடை விதித்தது.
-
பாகிஸ்தானின் பதிலடி: இதற்குப் போட்டியாக, பாகிஸ்தான் அரசு இந்தியா டுடே, தி ஹிந்து, என்டிடிவி (NDTV) உள்ளிட்ட முன்னணி இந்திய ஊடகங்களின் 32 இணையதளங்கள் மற்றும் 16 யூடியூப் சேனல்களை முடக்கியது.
எடிட்டர்ஸ் கில்ட் சொல்லும் ‘பஞ்ச்’:
இந்த விவகாரத்தில் தற்போது தலையிட்டுள்ள எடிட்டர்ஸ் கில்ட் ஆஃப் இந்தியா (Editors Guild of India), இரு நாட்டு அரசுகளுக்கும் சில காட்டமான கோரிக்கைகளை முன்வைத்துள்ளது:
-
நம்பிக்கைக்கான அடிப்படை: அண்டை நாடுகளுக்கு இடையே நம்பிக்கையை வளர்க்க செய்திகளுக்கான தடையற்ற அணுகல் (Unhindered access) மிகவும் அவசியம்.
-
ஜனநாயகக் கடமை: ஒரு தகவலறிந்த குடிமைச் சமூகத்தை உருவாக்கவும், அமைதிப் பேச்சுவார்த்தையை முன்னெடுக்கவும் எல்லை கடந்த இதழியல் தேவை.
-
தவறுகள் நடக்கலாம், ஆனால் தடை தீர்வாகாது: சில ஊடகங்கள் பொறுப்பற்ற முறையில் போலிச் செய்திகளைப் பரப்புவதையும், பதற்றத்தைத் தூண்டுவதையும் எடிட்டர்ஸ் கில்ட் ஒப்புக்கொள்கிறது. ஆனால், அதற்காக ஒட்டுமொத்தமாகத் தடை (Blanket Ban) விதிப்பது ஜனநாயகத்தின் ஆன்மாவுக்கு எதிரானது.
ஆந்தை அலசல்:
தவறான செய்திகளைப் பரப்பும் ஊடகங்களைக் கண்காணித்து அவர்கள் மீது சட்டப்படி நடவடிக்கை எடுக்கலாமே தவிர, வாசகர்களின் தகவல் அறியும் உரிமையைப் பறிக்கக் கூடாது. இத்தகைய தடைகள் மக்களிடையே அச்சத்தையும், ஒருவிதமான அவநம்பிக்கையையுமே உருவாக்கும்.
கத்தியை விட பேனா வலிமையானதுன்னு சொல்வாங்க.. ஆனா இப்போ அந்த பேனாவையே முடக்குறது தான் வேதனையான விஷயம். ஊடகங்கள் தங்களைச் சுயபரிசோதனை செய்து கொள்ள வேண்டும், அரசுகள் தங்கள் பிடியைத் தளர்த்த வேண்டும்!
நிலவளம் ரெங்கராஜன்
