ராம்நாத் கோயங்கா: இதழியல் துறையின் இடிமுழக்கம் – பிறந்தநாள் சிறப்பு!

இன்று, ஏப்ரல் 18, ராம்நாத் கோயங்கா அவர்களின் பிறந்தநாள். இந்திய இதழியல் வரலாற்றில் ஒரு துருவ நட்சத்திரமாக ஜொலித்தவர் ராம்நாத் கோயங்கா. தைரியம், நேர்மை, மற்றும் அதிகாரத்திற்கு அஞ்சாத துணிச்சல் ஆகியவற்றின் அடையாளமாக அவர் திகழ்ந்தார். ஒரு பத்திரிகையாளர் எப்படி இருக்க வேண்டும் என்பதற்கு அவர் ஒரு சிறந்த உதாரணமாக விளங்கினார்.

1904 ஆம் ஆண்டு பிறந்த ராம்நாத் கோயங்கா, தனது வாழ்நாள் முழுவதும் இதழியல் துறையில் ஒரு அழிக்க முடியாத முத்திரையை பதித்தார். “இந்தியன் எக்ஸ்பிரஸ்” நாளிதழின் மூலம் அவர் செய்த புரட்சிகள் ஏராளம். சுதந்திரப் போராட்டத்தின் நெருப்பிலிருந்து வந்த அவர், தேசத்தின் குரலாகவும், மக்களின் நம்பிக்கையாகவும் தனது பத்திரிகையை மாற்றினார். கொஞ்ச விரிவாகச் சொல்வதானால் ராம்நாத் கோயங்காவின் வாழ்க்கை ஒரு எளிய தொடக்கத்தைக் கொண்டிருந்தது. 1922 ஆம் ஆண்டு, இன்றைய சென்னைக்கு நூல் மற்றும் சணல் வணிகம் செய்வதற்காக அனுப்பப்பட்ட அவர், மாதம் வெறும் 30 ரூபாய் சம்பளம் பெற்றார். ஆனால், காலத்தின் கைகள் அவருக்கு ஒரு மகத்தான எதிர்காலத்தை எழுதி வைத்திருந்தன. மகாத்மா காந்தியின் தேசிய பத்திரிகைக்கான அழைப்பால் உந்தப்பட்ட கோயங்கா, 1934 இல் “இந்தியன் எக்ஸ்பிரஸ்” பத்திரிகையின் பங்குகளை வாங்கினார். இரண்டு வருடங்களுக்குள், 1936 இல் அதன் முழு உரிமையாளரானார். தடுமாற்றத்துடன் இருந்த அந்தப் பத்திரிகையை தனது அயராத உழைப்பாலும், துணிச்சலான பார்வையாலும் இந்தியாவின் முன்னணி ஆங்கில நாளிதழாக மாற்றிக் காட்டினார். வெறும் ஒரு பதிப்பகமாகத் தொடங்கிய “இந்தியன் எக்ஸ்பிரஸ்”, அவரது காலத்தில் 14 பதிப்புகளுடன் பிரம்மாண்டமாக வளர்ந்தது. மட்டுமல்லாமல், “தினமணி”, “ஆந்திர பிரபா”, “கன்னட பிரபா” போன்ற பிராந்திய மொழிப் பத்திரிகைகளையும் அவர் வெற்றிகரமாக உருவாக்கினார்.

கோயங்காவின் இதழியல் பாணி தனித்துவமானது. அவர் எந்தவொரு அரசியல் அழுத்தத்திற்கும் பணிந்ததில்லை. அரசாங்கத்தின் தவறுகளைச் சுட்டிக்காட்டவும், ஊழலை வெளிக்கொணரவும் அவர் தயங்கியதே இல்லை. அவரது பத்திரிகை, எளிய மக்களின் பிரச்சினைகளை உரக்கச் சொன்னது. அதிகாரத்தில் இருப்பவர்களின் முகத்தில் உண்மையை அறைந்து சொல்லும் துணிச்சல் அவருக்கு இயல்பாகவே இருந்தது.அவர் “இந்தியன் எக்ஸ்பிரஸ்” பத்திரிகையை வெறும் செய்தித்தாளாக மட்டும் பார்க்கவில்லை; அது மக்களின் குரலாகவும், அடக்கப்பட்டவர்களின் நம்பிக்கையாகவும் ஒலித்தது. பிரிட்டிஷ் ஏகாதிபத்தியத்தின் அடக்குமுறைகளுக்கு எதிராக அவர் தனது பத்திரிகையின் மூலம் உறுதியாக நின்றார். 1942 ஆம் ஆண்டு, வெள்ளையனே வெளியேறு இயக்கம் தீவிரமடைந்திருந்த சமயத்தில், பிரிட்டிஷார் பத்திரிகைகளுக்கு கடுமையான கட்டுப்பாடுகளை விதித்தனர். அப்போது கோயங்கா அவர்கள் “இதயத்தின் நாண்கள் மற்றும் பணப்பை” என்ற தலைப்பில் ஒரு உணர்ச்சிகரமான தலையங்கத்தை எழுதினார். அவரது அந்த ஒரு தலையங்கம், அவரது அஞ்சாத நெஞ்சத்தையும், சத்தியத்தின் மீதான அவரது தீராத பற்றையும் உலகிற்கு உரக்கச் சொன்னது.

அவசரநிலைப் பிரகடன காலகட்டத்தில் ராம்நாத் கோயங்கா காட்டிய வீரமும், துணிச்சலும் இந்திய இதழியல் வரலாற்றில் பொன்னெழுத்துக்களால் பொறிக்கப்பட வேண்டியவை. சர்வாதிகாரத்தின் கோர முகத்தை எதிர்த்து, தனது பத்திரிகையின் பக்கங்களை ஆயுதமாக ஏந்தி அவர் நடத்திய போர் மகத்தானது. “இந்தியன் எக்ஸ்பிரஸ்” அன்று சுதந்திரத்தின் குரலாகவும், ஜனநாயகத்தின் பாதுகாவலனாகவும் திகழ்ந்தது. பல நெருக்கடிகள் வந்தபோதும், அவர் தனது கொள்கையில் இருந்து இம்மியளவும் விலகவில்லை.அரசாங்கத்தின் கடுமையான அழுத்தங்களையும், பத்திரிகைகள் மீது விதிக்கப்பட்ட தணிக்கை முறைகளையும் பொருட்படுத்தாமல், “இந்தியன் எக்ஸ்பிரஸ்” தொடர்ந்து உண்மையான செய்திகளை வெளியிட்டது. மின்சாரம் துண்டிக்கப்பட்டபோதும், கோயங்கா தனது அச்சகங்களை எப்படியாவது இயக்குவதற்கான மாற்று வழிகளைக் கண்டறிந்தார். அவரது இந்த அசாதாரணமான தைரியம் இந்திய இதழியல் வரலாற்றில் ஒரு பொன்னான மைல்கல்லாக பதிவானது. ஜனநாயகத்தின் நான்காவது தூணின் முக்கியத்துவத்தை அவர் தனது செயல்களால் உயர்த்திக் காட்டினார்.

ராம்நாத் கோயங்கா வெறும் பத்திரிகையாளராக மட்டும் இருக்கவில்லை. அவர் ஒரு தொலைநோக்கு சிந்தனையாளர். ஊடகத்தின் வலிமையையும், அதன் சமூகப் பொறுப்பையும் அவர் ஆழமாக உணர்ந்திருந்தார். தனது ஊழியர்களுக்கு அவர் அளித்த ஊக்கமும், சுதந்திரமும் அவர்களை சிறந்த பத்திரிகையாளர்களாக உருவாக்கின. அவர் ஒரு தலைவராக மட்டுமல்லாமல், ஒரு வழிகாட்டியாகவும் திகழ்ந்தார்.

இன்று, ஊடகங்கள் பல்வேறு சவால்களை சந்தித்து வரும் நிலையில், ராம்நாத் கோயங்கா போன்றோரின் வாழ்க்கை நமக்கு ஒரு பாடமாக விளங்குகிறது. நேர்மை, துணிச்சல், மற்றும் சமூகப் பொறுப்பு ஆகியவையே ஒரு பத்திரிகையின் உண்மையான பலம் என்பதை அவர் தனது வாழ்வின் மூலம் நிரூபித்தார். வணிக நோக்கங்களுக்காகவும், அரசியல் ஆதாயங்களுக்காகவும் உண்மையை மறைக்கும் போக்கு அதிகரித்து வரும் இக்காலகட்டத்தில், கோயங்காவின் இதழியல் தர்மம் நமக்கு ஒரு கலங்கரை விளக்கம் போன்றது.

ராம்நாத் கோயங்கா மறைந்தாலும், அவரது கொள்கைகளும், அவர் விட்டுச் சென்ற இதழியல் பாரம்பரியமும் என்றென்றும் நம்மை வழிநடத்தும். அவரது பிறந்தநாளில், இந்திய இதழியல் துறைக்கு அவர் ஆற்றிய மகத்தான பங்களிப்பிற்காக நாம் அவருக்கு தலைவணங்குவோம். அவரது நினைவுகள் என்றென்றும் நீங்கா ஒளி வீசட்டும்.

நிலவளம் ரெங்கராஜன்