உலகப் புள்ளியியல் தினம் – துல்லியமான தரவு, திறமையான அரசு!

ஐக்கிய நாடுகள் சபையால் 2010 ஆம் ஆண்டு முதல் அதிகாரப்பூர்வமாக அறிவிக்கப்பட்ட உலகப் புள்ளியியல் தினம் (World Statistics Day), ஒவ்வொரு ஐந்து ஆண்டுகளுக்கும் ஒரு முறை அக்டோபர் 20 அன்று கொண்டாடப்படுகிறது. தரவுகளின் துல்லியம், நம்பகத்தன்மை மற்றும் அதன் சமூகப் பயன்பாடு ஆகியவற்றின் முக்கியத்துவத்தை இந்த நாள் வலியுறுத்துகிறது.

புள்ளியியல் என்பது வெறும் எண்களைக் கணக்கிடுவது மட்டுமல்ல; அது “கணித அறிவியல்” எனப்படும் ஒரு நுட்பமான துறை. விவரங்களைத் திரட்டுவது, அவற்றை ஆழமாகப் பகுப்பாய்வு செய்வது, ஒன்றுக்கொன்று தொடர்புபடுத்திப் பார்ப்பது, அதன் முடிவுகளை விளக்குவது மற்றும் சிக்கலான தகவல்களை எளிமையான வரைபடமாக வழங்குவது எனப் பல செயல்பாடுகளை இது உள்ளடக்கியுள்ளது.

புள்ளியியலின் அவசியம்: அரசாங்கம் முதல் அறிவியல் வரை

புள்ளியியல் என்பது இயற்கை அறிவியல், சமூக அறிவியல், உயிரியல், கல்வி, மனோதத்துவம், பௌதிகம், வணிகம் மற்றும் அரசாங்கம் எனப் பல்வேறு துறைகளிலும் இன்றியமையாத பங்களிப்பை வழங்குகிறது.

1. திட்டமிடலின் ஆணிவேர்: ஏழை எளிய மக்களுக்காக அரசால் வரையறுக்கப்படும் திட்டங்கள் அனைத்தும் (சுகாதாரம், கல்வி, வறுமை ஒழிப்பு போன்றவை) மக்கள் தொகை, வருமானம், தேவை குறித்த துல்லியமான புள்ளி விவரங்களைச் சார்ந்தே உள்ளன. எந்தப் பகுதியில் எவ்வளவு வளங்களை ஒதுக்க வேண்டும் என்பதை புள்ளியியல் முடிவுகளே தீர்மானிக்கின்றன.
2. வணிகம் மற்றும் சந்தை முன்னறிவிப்பு: வணிக நிறுவனங்கள், நுகர்வோர் போக்குகள், சந்தை ஏற்ற இறக்கங்கள் மற்றும் தயாரிப்புப் பொருட்களின் தேவை ஆகியவற்றை முன்கூட்டியே கணிக்கப் புள்ளியியலைப் பயன்படுத்துகின்றன. இது, சரியான நேரத்தில் சரியான முடிவுகளை எடுக்க உதவுகிறது.
3. மருத்துவ ஆராய்ச்சியில் முக்கியப் பங்கு: ஒரு புதிய மருந்து எவ்வளவு பயனுள்ளது, ஒரு நோய்க்கான தடுப்பூசி எவ்வளவு பாதுகாப்பானது போன்றவற்றை உறுதிசெய்ய, மருத்துவச் சோதனைகளில் (Clinical Trials) புள்ளியியல் முறைகள் தவிர்க்க முடியாதவை.

அரிய தகவல்கள்: புள்ளியியலின் வரலாற்றுச் சுவடுகள்

• ஐந்தாண்டுகளுக்கு ஒருமுறை: உலகப் புள்ளியியல் தினத்தைக் கொண்டாட ஐ.நா. சபை முடிவு செய்ததற்குக் காரணம், இந்த நாளைத் தொடர்ந்து கொண்டாடுவதன் மூலம் அது அதன் மதிப்பைக் குறைத்துவிடும் என்ற எண்ணம் இருந்ததால்தான். எனவே, ஐந்து ஆண்டுகளுக்கு ஒருமுறை (அக்டோபர் 20, 2010, 2015, 2020, 2025…) மட்டுமே இந்த தினம் கடைப்பிடிக்கப்படுகிறது.
• இந்தியாவின் பெருமை: இந்தியாவின் நவீன புள்ளியியலின் தந்தை என அறியப்படுபவர் பிரசந்தா சந்திரா மஹாலனோபிஸ் (PC Mahalanobis) ஆவார். அவரது பங்களிப்பைப் போற்றும் விதமாகவே, இந்தியாவில் தேசியப் புள்ளியியல் தினம் ஒவ்வொரு ஆண்டும் அவரது பிறந்த நாளான ஜூன் 29 அன்று கொண்டாடப்படுகிறது.
• மத்திய அரசுத் துறைகள்: இந்தியாவில் புள்ளியியல் தரவுகளைச் சேகரிக்கும் முக்கியப் பொறுப்பை தேசிய மாதிரி ஆய்வு அலுவலகம் (National Sample Survey Office – NSSO) மற்றும் மத்தியப் புள்ளியியல் அலுவலகம் (Central Statistics Office – CSO) ஆகியவை கொண்டிருந்தன. தற்போது இவை இரண்டும் இணைந்து தேசியப் புள்ளியியல் அலுவலகம் (NSO) என்ற அமைப்பின் கீழ் செயல்படுகின்றன.

உலகப் புள்ளியியல் தினத்தின் நோக்கம்

இந்த நாள், பல்வேறு அரசுத் துறைகள் மற்றும் ஆராய்ச்சி நிறுவனங்களில் புள்ளிவிவரங்களைத் திரட்டும் ஊழியர்கள் மற்றும் வல்லுநர்களின் உன்னத சேவையைக் கொண்டாடுகிறது.

புள்ளிவிவரங்களின் பயன்பாட்டின் வெற்றியையும், அதன் சேவை, மேன்மை மற்றும் தொழில் திறமையையும் போற்றுவதே இத்தினத்தின் பொது நோக்கம். ஒரு நிலையான, துல்லியமான மற்றும் சரியான நேரத்தில் கிடைக்கும் தரவு அமைப்பு ஒரு தேசத்தின் முன்னேற்றத்திற்கு அத்தியாவசியமானது என்பதை உலகப் புள்ளியியல் தினம் நினைவூட்டுகிறது.

தனுஜா