உலக தியான நாளின்று – ‘நான்’ யார் என்பதை உணரும் ஒரு பயணம்!

மன மற்றும் உணர்வு ரீதியான நல்வாழ்வை மேம்படுத்தும் நோக்கில், ஐக்கிய நாடுகள் சபை டிசம்பர் 21-ம் தேதியை ‘உலக தியான நாளாக’ (World Meditation Day) அறிவித்துள்ளது. இன்றைய அவசர உலகில், ஒவ்வொரு தனிமனிதனுக்கும் அமைதி எவ்வளவு அவசியம் என்பதை உணர்த்தும் வருடாந்திர நிகழ்வாக இது அனுசரிக்கப்படுகிறது.

தியானம் என்பது ஒரு மதம் சார்ந்த சடங்கு அல்ல; அது ஒரு உள்நிலை விஞ்ஞானம். அதைப்பற்றிய ஒரு விரிவான அலசல் இதோ:

உண்மையில் தியானம் என்றால் என்ன? பொதுவாகக் கண்களை மூடிக்கொண்டு அமர்வதைத்தான் தியானம் என்று நினைக்கிறோம். ஆனால், கண்களை மூடிக்கொண்டு நாம் எதை வேண்டுமானாலும் சிந்திக்கலாம். மந்திரங்களை உச்சரிக்கலாம் அல்லது கவனத்தைக் குவிக்கலாம். ஆனால் தியானம் என்பது இவற்றுக்கும் அப்பாற்பட்டது.

தியானம் என்பது, எது ‘நீங்கள்’ இல்லையோ, அதிலிருந்து உங்களைத் தனியே பிரித்தெடுக்கும் ஒரு செயல்முறை.

‘நான்’ என்பது யார்? – ஒரு தேடல் இப்போது உங்களை நீங்களே கேட்டுக்கொள்ளுங்கள்… ‘நான்’ என்று எதைச் சொல்கிறீர்கள்?

1. உடல்: நீங்கள் பிறக்கும்போது மிகச் சிறியதாக இருந்தீர்கள். இன்று இவ்வளவு பெரியதாக வளர்ந்துள்ளீர்கள். இது எப்படி நடந்தது? நாம் சாப்பிட்ட உணவின் மூலமாகத்தான். அப்படியென்றால், இந்த உடல் என்பது வெறும் ‘சாப்பாட்டுக் குவியல்தான்’.

2. மனம்: மனம் என்று எதைச் சொல்கிறீர்கள்? பார்த்தது, கேட்டது, நுகர்ந்தது என ஐம்புலன்கள் வழியாகச் சேகரித்த பதிவுகளைத்தான் மனம் என்கிறீர்கள். அதாவது, சமூகம், குடும்பம், கல்வி ஆகியவற்றின் மூலம் வெளியிலிருந்து சேகரிக்கப்பட்ட ‘பதிவுகளின் குவியல்’ தான் மனம்.

ஆக, சேகரிக்கப்பட்ட உணவும் (உடல்), சேகரிக்கப்பட்ட பதிவுகளும் (மனம்) நிச்சயமாக ‘நீங்கள்’ அல்ல.

துன்பங்களுக்கு முடிவு கட்டுவது எப்படி? மனிதர்கள் அனுபவிக்கும் அத்தனை துன்பங்களும் உடலின் மூலமாகவோ அல்லது மனதின் மூலமாகவோதான் வருகின்றன. தியானத்தில் ஒருவர் அமரும்போது, “நான் இந்த உடல் அல்ல, நான் இந்த மனம் அல்ல” என்ற தெளிவான இடைவெளியை தனக்கும், தனது உடலுக்கும்/மனதிற்கும் இடையே உருவாக்குகிறார்.

இந்த இடைவெளியை உணர்ந்துவிட்டால், துன்பம் உங்களைத் தொட முடியாது. உடலும் மனமும் உங்களுக்குச் சேவை செய்யும் கருவிகளாக மாறுமே தவிர, உங்களை ஆட்டிப்படைக்கும் எஜமானர்களாக இருக்காது. இதுதான் அனைத்துத் துன்பங்களுக்கும் முடிவு.

இமயமலைக்குச் செல்ல வேண்டுமா? தியானம் செய்வதற்கு மலைக் குகைகளுக்கோ, இமயமலைக்கோ செல்ல வேண்டிய அவசியமில்லை. இது வாழ்க்கையைத் துறப்பதல்ல; மாறாக, வாழ்வோடு முழுமையாக விளையாடுவது!

தியான நிலையில் இருப்பவர் மீது வாழ்க்கை எந்தச் சிறு தழும்பையும் ஏற்படுத்தாது. சேற்றில் வளரும் தாமரை போல, உலகியல் வாழ்வில் இருந்துகொண்டே எதாலும் பாதிக்கப்படாமல் வாழும் கலையே தியானம்.

அனைவருக்கும் பொதுவானது வெளிப்புறத் திறமைகள் மனிதருக்கு மனிதர் மாறுபடலாம். ஒருவர் செய்வதை இன்னொருவர் செய்ய முடியாமல் போகலாம். ஆனால், உள்நிலையைப் பொறுத்தவரை, ஒரு குற்றவாளிக்கும், கிராமத்து மனிதருக்கும், மெத்தப் படித்தவருக்கும், தொழிலதிபருக்கும் சமமான வாய்ப்பு உள்ளது. “துன்பத்திலிருந்து விடுபட வேண்டும்” என்ற விருப்பம் உள்ள எவருக்கும் தியானம் சாத்தியமே.

பலன்கள் என்ன? நாம் எதைச் செய்தாலும், அதைத் தியானத் தன்மையுடன் செய்யும்போது:

• ஆரோக்கியம்: மன அழுத்தம் குறைவதால் உடல் நலம் தானாகவே மேம்படும்.

• அமைதி & ஆனந்தம்: இவை முயற்சிகளின்றி இயல்பான சுபாவமாக மாறிவிடும்.

• புத்திசாலித்தனம்: மனம் ஒருமுகப்பட்டு கூர்மையடைவதால், புத்திசாலித்தனம் அதன் உச்சத்தில் செயல்படும்.

தியானம் என்பது ஒரு குறிப்பிட்ட நேரச் செயல் (Act) அல்ல; அது ஒரு வாழ்க்கை நிலை (State). இந்த உலக தியான நாளில், நம் அகத்தை, அந்த அமைதியை நோக்கித் திருப்புவோம்!

வாத்தீ அகஸ்தீஸ்வரன்