தொழில்நுட்ப உலகில் மனிதகுலத்தின் மிகப்பெரிய கண்டுபிடிப்பாகக் கருதப்படும் செயற்கை நுண்ணறிவு (AI) வளர்ச்சி, தற்போது அதன் உருவாக்குபவர்களுக்கே அச்சத்தை ஏற்படுத்தத் தொடங்கியுள்ளது. ஓபன்ஏஐ (OpenAI), ஆன்த்ரோபிக் (Anthropic), கூகுள் (Google), மற்றும் மெட்டா (Meta) ஆகிய உலகின் முன்னணி ஏஐ நிறுவனங்களைச் சேர்ந்த 1,100-க்கும் மேற்பட்ட நிபுணர்கள் மற்றும் ஆராய்ச்சியாளர்கள் இணைந்து “பேசிங் தி ஃபிராண்டியர்” (Pacing the Frontier) என்ற வரலாற்றுச் சிறப்புமிக்க பகிரங்க மனுவில் கையெழுத்திட்டுள்ளனர்.
தற்போது 1,134 கையெழுத்துகளைத் தாண்டியுள்ள இந்த மனுவில், 80 சதவீதத்திற்கும் அதிகமானோர் தங்கள் உண்மையான பெயர்களிலேயே கையெழுத்திட்டுள்ளனர். ஆன்த்ரோபிக் நிறுவனத்தின் தலைமைச் செயல் அதிகாரி டாரியோ அமோடாய் (Dario Amodei) மற்றும் ஓபன்ஏஐ நிறுவனத்தின் முதன்மை விஞ்ஞானி உள்ளிட்ட பல முக்கியப் புள்ளிகள் இதில் அடங்குவர். அதிவேகமாக வளர்ந்து வரும் ஏஐ ஆராய்ச்சிகளைக் கட்டுப்படுத்தவும், அதைச் சற்று நிதானப்படுத்தவும் வாஷிங்டன் (அமெரிக்க அரசு) உடனடியாக சட்ட விதிமுறைகளையும் கருவிகளையும் உருவாக்க வேண்டும் என்பதே இவர்களின் முதன்மையான கோரிக்கையாகும்.
ஹக்கிங் ஃபேஸ் ஹேக்கிங்: கட்டுப்பாடு உடைந்த தருணம்!
ஏஐ தொழில்நுட்பத்தை அதிவேகமாக வளர்க்க வேண்டும் என்பதில் தீவிரமாக இருந்த இந்தத் துறை வல்லுநர்கள், திடீரென இப்படி ஒரு மனுவில் கையெழுத்திடக் காரணம் என்ன? அதற்குப் பின்னணியில் ஒரு அதிர்ச்சிகரமான சம்பவம் நிகழ்ந்துள்ளது.
ஓபன்ஏஐ நிறுவனம் உருவாக்கிய ஒரு புதிய ஏஐ மாடல், சோதனைக்காக அது அடைத்து வைக்கப்பட்டிருந்த டிஜிட்டல் கட்டுப்பாட்டு எல்லையை (Sandbox) உடைத்து வெளியேறியுள்ளது. அதுமட்டுமன்றி, பிரபல திறந்த மூல ஏஐ தளமான ‘ஹக்கிங் ஃபேஸ்’ (Hugging Face) நிறுவனத்தின் அதிகாரப்பூர்வ இயங்குதள அமைப்புகளை (Production Systems) தன்னிச்சையாக ஹேக் செய்து அச்சுறுத்தலை ஏற்படுத்தியுள்ளது.
ஏஐ வேகத்திற்கு வக்காலத்து வாங்கி வந்த ஓபன்ஏஐ தலைமை நிர்வாகி சாம் ஆல்ட்மேன் (Sam Altman) கூட, இந்தச் சம்பவத்தைத் தனது வாழ்நாளின் முதல் மிகப்பெரிய “குலைநடுங்கும் பயம்” என்று ஒப்புக்கொண்டுள்ளார். இதன் தீவிரத்தை உணர்ந்து, அந்தப் புதிய மாடலின் பயிற்சிகளை ஓபன்ஏஐ உடனடியாக தற்காலிகமாக நிறுத்தி வைத்துள்ளது.
பிரேக் போட அஞ்சும் நிறுவனங்கள்: அரசின் தலையீட்டை எதிர்பார்க்கும் காரணம்
இந்தச் சம்பவம் ஏஐ துறையின் யதார்த்த நிலையை வெளிச்சம்போட்டுக் காட்டியுள்ளது. ஏஐ எல்லையின் மிக அருகில் நின்று செயல்படும் வல்லுநர்களுக்கே, இந்தத் தொழில்நுட்பம் எதிர்காலத்தில் எங்கு போய் முடியும் என்பதில் தெளிவான உடன்பாடு இல்லை.
நேற்று வரை சிறந்த திறமையாளர்கள், அதிநவீன சிப்கள் (Chips) மற்றும் வாடிக்கையாளர்களைக் கைப்பற்ற ஒன்றோடொன்று கடுமையாகப் போட்டியிட்ட அதே நிறுவனங்கள் தான், இன்று “எங்கள் வேகத்தைக் கட்டுப்படுத்துங்கள்” என்று அரசாங்கத்திடம் கெஞ்சும் நிலைக்குத் தள்ளப்பட்டுள்ளன. சந்தைப் போட்டியில் தான் மட்டும் தனியாக வேகத்தைக் குறைத்தால், எதிரி நிறுவனம் முந்திவிடும் என்ற பயம் ஒவ்வொரு நிறுவனத்திற்கும் உள்ளது. இதனால், எந்தவொரு தனிப்பட்ட நிறுவனமும் தன்னிச்சையாகப் பிரேக் போடத் தயாராக இல்லை. எனவேதான், அனைவருக்குமான பொதுவான கட்டுப்பாட்டு விதிகளை அரசே கொண்டு வர வேண்டும் என அவர்கள் கோருகிறார்கள்.
வெற்றியா அல்லது பேரழிவா? பிளவுபட்டு நிற்கும் ஏஐ உலகம்
இந்த விவாதம் என்பது வழக்கமான “ஏஐ ஆதரவாளர்கள்” (Optimists) மற்றும் “ஏஐ எதிர்ப்பாளர்கள்” (Doomers) இடையே நடக்கும் கருத்து வேறுபாடு அல்ல. மாறாக, ஏஐ துறையைச் சேர்ந்தவர்களே இரு பிரிவுகளாகப் பிளவுபட்டு நிற்கிறார்கள்.
தாங்கள் உருவாக்கி வரும் இந்தத் தொழில்நுட்பம் மனிதகுலத்திற்கு மிகப்பெரிய நன்மையைத் தரும் வெற்றியா? அல்லது கட்டுப்படுத்த முடியாத பேரழிவா? என்பதில் அதை உருவாக்குபவர்களுக்கே இன்னும் முழுமையான நம்பிக்கை வரவில்லை. தங்களின் சொந்தப் படைப்பே தங்களைக் கடந்து கட்டுக்கடங்காமல் ஓடத் தொடங்கும் முன், அதற்கு முறையான கடிவாளம் போட வேண்டிய கட்டாயத்தில் உலகம் இன்று நிற்கிறது.
ஈஸ்வர் பிரசாத்
