மனிதத் திசு ஏற்றுமதி: தென்கொரியாவின் புதிய வணிகச் சங்கிலி!

உலக அழகு சாதன மற்றும் தோல் பராமரிப்புத் துறையில் தென்கொரியா எப்போதும் அதிநவீன தொழில்நுட்பங்களுக்கும் முன்னோடிப் பொருட்களுக்கும் பெயர் பெற்ற நாடாகும். நாளுக்கு நாள் புதிய பரிமாணங்களை எட்டிவரும் கொரிய அழகுக்கலைச் சந்தையில் தற்போது மனித திசுக்களை அடிப்படையாகக் கொண்ட ‘ஸ்கின் பூஸ்டர்கள்’ (Skin Boosters) பெரும் வரவேற்பைப் பெற்றுள்ளன. குறிப்பாக, அமெரிக்காவின் திசு வங்கிகளில் இருந்து தானமாகப் பெறப்படும் மனிதத் தோல் செல்களைப் பயன்படுத்திப் புதுமையான அழகுப் பொருட்கள் தயாரிக்கப்பட்டு வருவது சர்வதேச அளவில் பெரும் விவாதத்தையும் வியப்பையும் ஏற்படுத்தியுள்ளது.

அமெரிக்காவின் திசு வங்கிகளுக்கும் தென்கொரியாவிற்கும் இடையிலான வணிகச் சங்கிலி

மனிதத் தோலைக் கொண்டு அழகு சாதனப் பொருட்களைத் தயாரிக்கும் இந்த நவீனத் தொழில்துறையானது மிகப்பெரிய பொருளாதார வலைப்பின்னலைக் கொண்டுள்ளது. அமெரிக்காவில் உள்ள பல்வேறு திசு வங்கிகள் மூலம் மனிதத் திசுக்கள் மற்றும் தேவையற்றதாக மாற்றப்படும் தோல் மாதிரிகள் சேகரிக்கப்படுகின்றன. உயிரி தொழில்நுட்ப நிறுவனங்கள் (Biotech Companies) கோடிக்கணக்கான டாலர்களைச் செலவிட்டு இந்த மூலப்பொருட்களை அமெரிக்காவிலிருந்து இறக்குமதி செய்கின்றன.

உயிரி மருத்துவத் துறையில் இறந்தவர்களின் உடல் உறுப்பு தானம் மற்றும் திசு தானம் என்பது பொதுவானது என்றாலும், அந்தத் திசுக்கள் அழகு சாதனப் பொருட்கள் மற்றும் தோல் மெருகூட்டும் ஊசிகள் தயாரிப்புக்குப் பயன்படுத்தப்படுவது வியப்புக்குரிய விஷயமாகப் பார்க்கப்படுகிறது. இந்த விநியோகச் சங்கிலியில் பரிமாறப்படும் பணத்தின் அளவு மற்றும் லாப விளிம்பு மிக அதிகமாக இருப்பதால், பல நிறுவனங்கள் இதில் தீவிரமாக முதலீடு செய்து வருகின்றன.

அதிநவீன ஸ்கின் பூஸ்டர்களின் அறிவியல் பின்னணி

கொரிய அழகுக்கலைச் சந்தையில் பயன்படுத்தப்படும் இந்த ஸ்கின் பூஸ்டர்கள் சாதாரண மாய்ஸ்சரைசர்கள் அல்லது கிரீம்கள் அல்ல. இவை மனித திசுக்களில் இருந்து பிரித்தெடுக்கப்படும் கொலாஜன், வளர்ச்சி காரணிகள் (Growth Factors) மற்றும் பல அத்தியாவசியப் புரதங்களைக் கொண்டு உருவாக்கப்படுகின்றன.

தோலின் இளமைத் தன்மையைப் பேணவும், சுருக்கங்களை நீக்கவும், செல்களைப் புதுப்பிக்கவும் இந்த உயிரிப் பொருட்கள் நேரடியாகத் தோலுக்கு அடியில் செலுத்தப்படுகின்றன. செயற்கையான வேதிப்பொருட்களைக் காட்டிலும் மனித உடலின் திசுக்களுடன் இயல்பாகப் பொருந்தக்கூடிய உயிரி மூலக்கூறுகள் சிறந்த முடிவுகளைத் தரும் என்ற கோட்பாட்டின் அடிப்படையில் இந்தத் தயாரிப்புகள் வடிவமைக்கப்பட்டுள்ளன.

அமெரிக்கச் சந்தைக்குள் நுழைவதற்கான சவால்களும் எஃப்.டி.ஏ (FDA) விதிமுறைகளும்

தென்கொரியாவில் கொடிகட்டிப் பறக்கும் இந்த மனிதத் திசு அடிப்படையிலான அழகுப் பொருட்களை அமெரிக்கச் சந்தையிலும் அறிமுகப்படுத்த அந்நாட்டு நிறுவனங்கள் தீவிர முயற்சிகளை மேற்கொண்டு வருகின்றன. மூலப்பொருட்கள் அமெரிக்காவிலிருந்தே பெறப்பட்டாலும், அவற்றை அழகு சாதனப் பொருளாக மாற்றியமைத்து மீண்டும் அமெரிக்காவிற்கே ஏற்றுமதி செய்து நுகர்வோருக்கு வழங்குவதில் கடுமையான சட்டச் சிக்கல்கள் உள்ளன.

அமெரிக்க உணவு மற்றும் மருந்து நிர்வாகம் (FDA) மனித திசுக்களின் பயன்பாடு மற்றும் மருத்துவப் பாதுகாப்பு குறித்து மிகக் கடுமையான விதிமுறைகளைக் கொண்டுள்ளது. அழகு சாதனப் பொருட்களில் மனிதத் திசுக்களைப் பயன்படுத்துவது குறித்த பாதுகாப்பு மற்றும் நெறிமுறைகள் இன்னும் முழுமையாக அங்கீகரிக்கப்படாததால், எஃப்.டி.ஏ அமைப்பு இதற்கு அனுமதி வழங்குமா என்பது தற்போதுவரை கேள்விக்குறியாகவே உள்ளது.

மொத்ததில் அழகுத் துறையின் எல்லைகள் எங்கு வேண்டுமானாலும் நீளும் என்பதற்கு இந்த மனிதத் திசு அடிப்படையிலான ஸ்கின் பூஸ்டர்கள் ஒரு சான்றாகும். அறிவியல் முன்னேற்றம் மற்றும் வர்த்தக லாபம் ஒருபுறம் இருந்தாலும், மனித உடல் சார்ந்த மூலப்பொருட்களை அழகு சாதனப் பொருட்களுக்குப் பயன்படுத்துவது தொடர்பான நெறிமுறை விவாதங்கள் தொடர்ந்து விவாதிக்கப்பட்டு வருகின்றன. எதிர்காலத்தில் இந்தத் தயாரிப்புகள் உலகளாவிய சந்தையை ஆளுமா அல்லது சட்ட வரம்புகளுக்குள் முடங்குமா என்பதை காலம்தான் தீர்மானிக்க வேண்டும்.

தனுஜா