சொட்ட சொட்ட நனையுது – விமர்சனம்!

இன்றைய இளைஞர்களின் ஆகப் பெரிய பிரச்சினை எது? வேலையில்லா திண்டாட்டமா? பைக்/கார் வாங்காத ஏக்கமா? எதுவுமே இல்லை! அது, தலைமுடி உதிர்வு! தலையில் சொட்டை விழுந்தால், அது ஆண்களின் தோற்றத்தை மட்டுமல்ல, மனதையும் புரட்டிப் போடுகிறது. இந்த வலியை ஒரு முழு நீளப் படமாக்கி ஆறுதல் சொல்ல முயன்றிருக்கிறார்கள், ‘சொட்ட சொட்ட நனையுது’ படக்குழுவினர்.

அதாவது, தலைமுடி முழுமையாகக் கொட்டி, வழுக்கைத் தலையாக இருக்கும் நம்ம ஹீரோ ராஜா (நிஷாந்த் ரூஷோ), கல்யாணத்துக்குப் பெண் தேடித் தவிக்கிறார். ஆனால், பக்கத்து வீட்டுப் பெண் பிரியா (வர்ஷிணி), ராஜாவின் அன்பான மனதைப் புரிந்துகொண்டு கல்யாணம் செய்ய சம்மதிக்கிறார். எல்லாம் நல்லா போய்க்கொண்டிருக்கும்போது, ஒருநாள் ராஜாவுக்கு வரும் ஒரு வீடியோ, அவரை நிலைகுலையச் செய்கிறது. அதில் பிரியா, வேறு ஒருவருடன் நெருக்கமாக இருப்பது போல் வருகிறது. அதை உண்மை என்று நம்பி, ராஜாவும் பிரியாவை வெறுத்துத் திட்டித் தீர்க்கிறார். இங்குதான் விமர்சகரின் கோபம் கொப்பளிக்கிறது. ‘ஒரு வீடியோவை மட்டுமே பார்த்து ஒரு முடிவுக்கு வருவது எந்த விதத்தில் நியாயம்?’ என்று கோபமாகக் கேட்கத் தோன்றுகிறது. பிறகு, ராஜா தலைமுடி வளர்க்க சிகிச்சை எடுத்து, ஸ்டைலான ஒரு ஹேர்ஸ்டைலுடன் இன்ஸ்டாகிராம் பிரபலமான சுருதியை (ஷாலினி) மணக்க முடிவு செய்கிறார். ஆனால், ராஜாவுக்கு இருக்கும் சொட்டை ரகசியம் சுருதிக்குத் தெரியவர, அங்கேயும் ஒரு இழுபறி. இந்த இழுபறி எங்கு போய் முடிகிறது என்பதுதான் கதை.

வளர்ந்து வரும் ஹீரோவான நிஷாந்த் ரூஷோ, சொட்டையுடன் ஒரு ஹீரோவாக நடிக்க ஒப்புக்கொண்டது பெரிய விஷயம். ‘ஹீரோ என்றால் ஸ்டைலாக இருக்க வேண்டும்’ என்ற இலக்கணத்தை உடைத்து, ஒரு வித்தியாசமான கதாபாத்திரத்தில் நடிக்க அவருக்கு இருந்த ஆர்வம் பாராட்டுக்குரியது. ஆனால், இயக்குனர், ‘சொட்டைத் தலை இருப்பது அவ்வளவு பாவமா?’ என்று கேட்கும் அளவுக்கு, ராஜாவின் கேரக்டருக்குக் கொடுத்திருக்கும் பில்டப் கொஞ்சம் ஓவர். ‘சொட்டைத் தலை உள்ளவர்கள் அறிவுமிகுதி உள்ளவர்கள்’ என்று ஒரு பேச்சு கூட இருக்கிறது என்பதை இயக்குனர் மறந்துவிட்டாரோ என்னவோ?

படத்தின் வசனங்கள் சில இடங்களில் கைதட்டல் பெறுகின்றன. ‘சொட்டை என்பது கெட்ட வார்த்தை’ போன்ற வசனங்கள், வழுக்கையால் பாதிக்கப்பட்டவர்களின் வலியைப் பிரதிபலிக்கிறது. ரோபோ சங்கர், கலக்கப்போவது யாரு புகழ் ராஜா போன்றோர் சிரிக்க வைக்க முயற்சி செய்திருக்கிறார்கள். ‘ஜிமிக்கி கம்மல்’ பாடலுக்கு இசையமைத்த ரெஞ்சித் உன்னி, இப்படத்துக்கு இசையமைத்திருக்கிறார். ரயீஷ் பளிச்சென ஒளிப்பதிவு செய்திருக்கிறார்.

புது இயக்குனரான நவீத் எஸ் ஃபரீத், சொட்டைத் தலை விஷயத்தை சீரியசாகவும், உணர்ச்சிப்பூர்வமாகவும் கையாண்டிருக்கிறார். வழுக்கையால் பாதிக்கப்பட்டவர்களுக்கு ஆறுதல் சொல்லும் படமாக இது இருந்தாலும், அதை இன்னும் கொஞ்சம் சுவைபட, காமெடி கலந்து இயக்கியிருந்தால் இன்னும் வரவேற்பு பெற்றிருக்கும். ஆனால், ஒன்று! தான் சொல்ல வந்த விஷயத்தை நேரடியாகச் சொல்லி, ஒரு சமூகப் பிரச்சினையைப் பேசிய இயக்குனரின் நேர்மை பாராட்டுக்குரியது.

மொத்தத்தில், இந்த  ‘சொட்ட சொட்ட நனையுது – சரியான வழுக்கல்

மார்க: 2.25/5