அலார் ஸ்டுடியோஸ் (Alar Studios) சார்பில் மலர்விழி நடேசன் மற்றும் ஷிவானி சுப்ரமணி இணைந்து தயாரிக்கும் புதிய திரைப்படம் ‘சிக்னல் அட் 11.30’. சந்தோஷ் பிரதாப் நாயகனாக நடிக்கும் இப்படத்தில் பவ்யா த்ரிகா, பூஜிதா பொன்னடா ஆகியோர் கதாநாயகிகளாகவும், ஜெயபிரகாஷ், முனிஷ்காந்த் உள்ளிட்டோர் முக்கியக் கதாபாத்திரங்களிலும் நடித்துள்ளனர்.
டி. இமான் இசையமைக்கும் இப்படத்திற்கு ராஜா பட்டாச்சாரி ஒளிப்பதிவு செய்ய, ஆர். கலைவாணன் எடிட்டிங் பணிகளைக் கவனிக்கிறார். படத்தின் கதையை எழுதி இயக்குநராக அவதாரமெடுத்துள்ளார் ஷிவானி சுப்ரமணி. படத்தின் பெரும்பாலான படப்பிடிப்பு 35 நாட்களில் நிறைவடைந்து, வரும் செப்டம்பர் மாதம் திரைக்கு வரத் தயாராகி வருகிறது.
இரவு 11:30 மணி சிக்னலில் உதித்த ஒற்றைப் பொறி!
படத்தின் கதை உருவான விசித்திரமான சூழல் குறித்து இயக்குநர் ஷிவானி சுப்ரமணி பகிர்ந்து கொண்டவை:
“சொந்தமாக ஒரு படத்தைத் தயாரித்துக் கொண்டிருந்தபோது மனதில் பல சிந்தனைகளும் சிக்கல்களும் ஓடிக் கொண்டிருந்தன. ஒருமுறை இரவு 11:30 மணிக்கு காரில் சென்றபோது நான்கு முனைச் சாலை சிக்னலில் நிற்க வேண்டியதாயிற்று. அந்த 11:30 மணி சிவப்பு சிக்னலில் நிற்கும்போதுதான் இந்த கதையின் மையப்புள்ளி என் மனதில் உதித்தது.
11:30 மணிக்கு சிக்னலில் நிகழும் ஒரு எதிர்பாராத சம்பவம், ஒருவரின் வாழ்க்கையில் ஏற்படுத்தும் திருப்பங்களையும் தொடர் நிகழ்வுகளையும்தான் ‘ரொமான்டிக் திரில்லர்’ பாணியில் திரைக்கதையாக அமைத்துள்ளேன்.”
கதைக்கு ஏற்றவாறு சந்தோஷ் பிரதாப், பவ்யா த்ரிகா மற்றும் பூஜிதா பொன்னடா ஆகியோர் கச்சிதமாக அமைந்ததாகவும், கதையைக் கேட்டவுடனேயே இசையமைப்பாளர் டி. இமான் தனக்கு இசையமைக்க ஒப்புக்கொண்டது பெரும் நம்பிக்கையை அளித்ததாகவும் இயக்குநர் தெரிவித்தார்.
‘ஹீரோவா? வில்லனா?’: கதாபாத்திரங்கள் குறித்து நடிகர்கள் நெகிழ்ச்சி
-
சந்தோஷ் பிரதாப்: “இயக்குநர் கதையைக் கூறியபோதே மிகவும் பிடித்திருந்தது. இதில் எனது கதாபாத்திரம் நேர்மறையானதா அல்லது நெகட்டிவ் ஷேட் கொண்ட வில்லன் பாத்திரமா என்று வியக்கும் வகையில் உருவாக்கப்பட்டுள்ளது. இதுபோன்ற மாறுபட்ட வேடங்கள் எனக்கு எப்போதும் நல்ல பெயரைப் பெற்றுத் தந்துள்ளன. அந்த வகையில் இப்படமும் ரசிகர்களிடம் நல்ல வரவேற்பைப் பெறும்.”
-
பவ்யா த்ரிகா: “நல்ல கதாபாத்திரங்கள் அமையும் படங்களை மட்டுமே தேர்வு செய்து நடிக்கிறேன். இதில் எனது கதாபாத்திரம் பெரும் சஸ்பென்ஸாக இருக்கும். படப்பிடிப்பின் போது பைக் ஓட்டும் காட்சிகள் இருந்தன. கல்லூரி காலத்தில் அம்மா கூறிய எச்சரிக்கைகளை மனதில் வைத்து கவனமாக ஓட்டி காட்சிகளை நிறைவு செய்தேன்.”
-
தயாரிப்பாளர் மலர்விழி நடேசன்: “மருத்துவப் படிப்பு படித்திருந்தாலும், எனது தாயார் படம் தயாரித்தபோது அவருடன் இணைந்து பணியாற்றிய அனுபவமே என்னை இப்படத்தைத் தயாரிக்கத் தூண்டியது. படம் மிகவும் சிறப்பாக வந்துள்ளது.”
ப்ரொமோஷன் பணிகள் விறுவிறுப்பாகத் தொடங்கியுள்ள நிலையில், திரையுலகினர் மத்தியில் ‘சிக்னல் அட் 11.30’ திரைப்படம் பெரும் எதிர்பார்ப்பை ஏற்படுத்தியுள்ளது.
