தமிழ் குரல் / AI Voice
சபரிமலை என்று சொன்னதும் பலருக்கு அம்மலையில் பாடப்படும் ஹரிவராசனம் பாடல் நினைவுக்கு வந்தே தீரும். ஹரிவராசனம் விஸ்வமோகனம்
ஹரிததீஸ்வரம் ஆராத்யபாதுகம்
அரிவிமர்தனம் நித்யநர்த்தனம்
ஹரிஹராத்மஜம் தேவமாஸ்ரயே.. அதாவது மிகச் சிறந்த சிம்மாசனத்தில் அமர்ந்திருப்பவரும், பிரபஞ்சத்தையே தன் முறுவலால் மோகிக்கச் செய்பவரும், ஹரிதம் என்னும் குதிரையில் (ஹரித: என்றால் சூரியன், அவனது தேரில் உள்ள ஏழு குதிரைகளின் பெயர் ஹரிதம்) பவனி வரும் சூரியனால் ஆராதிக்கப்படும் பாதங்களை உடையவரும், சத்ருக்களை அழிப்பவரும், நித்ய நர்த்தனம் புரிபவருமான ஹரி-ஹர புத்ர தேவனை சரணடைகிறேன் என்று தொடங்கும் பாடலை திருத்த வேண்டியதில்லை என்று தேவசம்போர்டு தலைவர் பத்மகுமார் கூறியுள்ளார்.
சபரிமலையில் வழக்கமாக, அதிகாலையில் நடை திறக்கும்போது, ‘வந்தே விக்னேஸ்வரம்..’ என்ற திருப்பள்ளி யெழுச்சிப் பாடல், கே.ஜே.ஜேசுதாஸின் இனிய குரலில் ஒலிக்கும். மாலையில் நடை திறக்கும்போது, பிரபல கேரளப் பாடகர் ஜெயனின் (ஜெய -விஜயன்) ‘ஸ்ரீகோவில் நடை துறன்னு’ என்ற மலையாளப் பாடல் ஒலிக்கும். அதேபோல, இரவில் கோயில் நடை அடைப்பதற்கான ஆயத்தப் பணிகள் தொடங்கியதும் ‘ஹரிவராசனம்’ பாடல் ஒலிக்கத் தொடங்கும். ‘ஹரிவராசனம் விஸ்வமோகனம்’ என்று தொடங்கும் இப்பாடல் சமஸ்கிருதத்தில் அமைந்தது. 8 பத்திகள் கொண்டது. ஹரிஹரசுதாஷ்டகம் என்றும் அழைக்கப்படுகிறது.
ஹரிவராசனம் பாடலை பலரது இசையமைப்பில், பலர் பாடியிருந்தாலும், கேரளாவின் புகழ்பெற்ற இசை அமைப்பாளர் ஜி.தேவராஜன் இசை அமைத்து, கே.ஜே.ஜேசுதாஸ் பாடிய ஹரிவராசனம்தான் சபரிமலையில் இன்றளவும் ஒலிக்கிறது. நடை அடைக்கும்போது, சுவாமி சன்னிதானத்தில் இருந்து ஒவ்வொரு தந்திரிகளாக வெளியேறுவார்கள். ‘ஹரிவராசனம்’ பாடல் ஒலித்து முடிக்கும் நேரத்தில், கதவை மெதுவாக சாத்திவிட்டு அனைவரும் வெளியே வந்துவிடுவார்கள். சுவாமியைத் தூங்கவைக்கிற தாலாட்டுப் பாடல் போல இருப்பதால் மலையாளத்தில் இதை ‘உறக்குப் பாட்டு’ என்கிறார்கள்.
தமிழ், மலையாளம் என இரு மொழிகளிலும் 1975-ல் வெளிவந்த ‘சுவாமி ஐயப்பன்’ படத்தில்தான் ஹரிவராசனம் பாடலை ஜேசுதாஸ் முதன்முதலில் பாடியிருந்தார். எம்.என்.நம்பியார், ஜெமினிகணேசன், பாலாஜி உட்பட பலரும் நடித்த அந்தப் படம் தமிழகம், கேரளாவில் பெரும் வெற்றி பெற்றது. இதைத் தொடர்ந்து, அந்தப் படத்தின் இசை யமைப்பாளர் ஜி.தேவராஜனின் இசையமைப்பில், ஜேசுதாஸைப் பாடச் செய்து, ஒலிப்பதிவு செய்யப்பட்ட இந்தப் பாடல்தான் தற்போதுவரை நடைசாத்தும்போது சன்னிதானத்தில் ஒலிக்கப்படுகிறது.
இந்த பாட்டில் அரிவிமர்த்தனம் என்று ஒரு வார்த்தை வரும். அது அரி விமர்த்தனம் என்று பாடப்படுகிறது. இதை அடுத்து அரி விமர்த்தனம் என்று பாடுவது தவறு அரிவி மர்த்தனம் என்று பாடவேண்டும் என்ற கருத்து முன் வைக்கப்பட்டது. அத்துடன் ஹரிவராசனம்’ பாடல் வரிகளில் ‘ஹரிவராசனம் ஸ்வாமி விஸ்வமோகனம்’ என்பதுபோல ஒவ்வொரு வார்த்தைக்கு நடுவிலும் ‘ஸ்வாமி’ என்ற சொல் இடம்பெறும். ஆனால், ஜேசுதாஸின் குரலில் சன்னிதானத்தில் ஒலிக்கும் பாடலில் ‘ஸ்வாமி’ என்பது இடம்பெறவில்லை. எனவே, ‘ஸ்வாமி’ என்பதையும் சேர்த்து ஜேசுதாஸ் குரலில் மீண்டும் ஒலிப்பதிவு செய்ய வேண்டும் என்றும் கோரப்பட்டது.
இந்நிலையில் இதுகுறித்து திருவிதாங்கூர் தேவசம்போர்டு தலைவர் பத்மகுமார், “சபரிமலையில் பாடப்படும் அரிவராசனம் பாடலில் தவறு இல்லை. சினிமா பாட்டின் தவறை திருத்தும் முடிவு யேசுதாசிடம் விடப்பட்டுள்ளது. அவர் திருத்தி பாடாவிட்டால் பழைய பாட்டே பயன்படுத்தப்படும்.யேசுதாஸ் பாடிய பாடலை ஐயப்பனுக்கு கேட்க வைத்து கோயில் நடை அடைக்கப்படுவதாக தவறான கருத்து பரவியுள்ளது. ஆனால் சபரிமலை மேல்சாந்தியும் மற்ற சாந்திக்காரர்களும் சேர்ந்து நடை அடைக்கும்போது ஹரிவராசனம் பாடுவார்கள்.
இது சினிமா பாட்டின் ராகத்தில் பாடப்படாது. ஒவ்வொரு வரிக்கு இடையிலும் சுவாமி என்று சேர்த்து வேறு ராகத்தில் பாடப்படும். கடைசி நான்கு வரியாகும்போது ஒவ்வொரு விளக்காக அணைத்தவாறு பூஜாரிகள் பின்னால் நடந்து வந்து மந்திரம் சொல்லி நடை அடைப்பார்கள். அவர்கள் பாடும் ஹரிவராசனத்தில் தவறு இல்லை. அவர்கள் அரிவி மர்த்தனம் என்று சரியாகத்தான் பாடுகின்றனர். அதனால் ஹரிவராசனம் திருத்தவேண்டிய தேவையிலை.
கோயில் நடை அடைக்கும்போது வெளியே நிர்பவர்களுக்காகத்தான் யேசுதாசின் சினிமா பாடல் ஒலி பரப்பப் படுகிறது. இது கோயில் கர்ப்பகிரகத்தில் கேட்காது. வெளியே கேட்கும் பாடலை திருத்துவது தொடர்பாக அரிவ ராசனம் டிரஸ்ட் யேசுதாசை அணுகியிருந்தனர். பாடி பதிவு செய்த பாடலை திருத்தவேண்டுமா என்று அப்போது அவர் கேட்டிருந்தார். முடிவை அவர் எடுக்கட்டும் என்று அரிவராசனம் டிரஸ்ட் கருதுகிறது. இந்தியாவின் பிரபல பாடகர்களை எல்லாம் உட்படுத்தி ஹரிவராசனம் பாடசெய்வது குறித்தும டிரஸ்ட் ஆலோசிக்கிறது”என்று பத்மகுமார் தெரிவித்தார்


