சீர்திருத்த எக்ஸ்பிரஸ்: விக்சித் பாரதத்தை நோக்கிய இந்தியாவின் பயணம்! – பிரதமர் மோடி

இந்தியா இப்போது ‘சீர்திருத்த எக்ஸ்பிரஸ்’ (Reform Express) ரயிலில் ஏறிவிட்டது. இந்த ரயிலின் முதன்மை எஞ்சின் இந்தியாவின் மக்கள் தொகை அமைப்பு (Demography), நமது இளைய தலைமுறை மற்றும் மக்களின் அடங்காத மன உறுதி ஆகும். கடந்த 11 ஆண்டுகளில் அடைந்த முன்னேற்றங்களின் அடிப்படையில், சீர்திருத்தங்கள் ஒரு தொடர்ச்சியான தேசிய இயக்கமாக மாறிய ஆண்டாக 2025 நினைவுகூரப்படும் என்று பிரதமர் மோடி தெரிவித்துள்ளார்.

2025-ம் ஆண்டு நிறைவு பெற உள்ளதை முன்னிட்டு, இந்த ஆண்டில் மேற்கொள்ளப்பட்ட பல்வேறு சீர்திருத்தங்களை பிரதமர் நரேந்திர மோடி நினைவுகூர்ந்துள்ளார். இது தொடர்பாக அவர் சமூக ஊடகத்தில் வெளியிட்டுள்ள பதிவின் விபரம்:

இந்தியா இன்று உலகளாவிய கவனத்தின் மையப்புள்ளியாக உருவெடுத்துள்ளது. நமது மக்களின் புதுமையான மன உறுதியே இதற்குக் காரணம். இன்று உலகம் இந்தியாவை நம்பிக்கையுடனும் துணிச்சலுடனும் பார்க்கிறது. அடுத்த தலைமுறைக்கான சீர்திருத்தங்கள் மூலம் நாட்டின் வளர்ச்சி வேகம் முடுக்கிவிடப்பட்டுள்ள விதத்தை உலகம் பாராட்டுகிறது.

நான் பலரிடமும் கூறி வருவது போல, இந்தியா இப்போது ‘சீர்திருத்த எக்ஸ்பிரஸ்’ (Reform Express) ரயிலில் ஏறிவிட்டது. இந்த ரயிலின் முதன்மை எஞ்சின் இந்தியாவின் மக்கள் தொகை அமைப்பு (Demography), நமது இளைய தலைமுறை மற்றும் மக்களின் அடங்காத மன உறுதி ஆகும்.

கடந்த 11 ஆண்டுகளில் போடப்பட்ட அடித்தளத்தின் மீது, 2025-ம் ஆண்டானது சீர்திருத்தங்களைத் தொடர்ச்சியான தேசியப் பணியாக முன்னெடுத்த ஆண்டாக நினைவுகூரப்படும். நாங்கள் நிறுவனங்களை நவீனப்படுத்தினோம், நிர்வாகத்தை எளிமைப்படுத்தினோம், மேலும் நீண்டகால உள்ளடக்கிய வளர்ச்சிக்கான அடித்தளத்தை பலப்படுத்தினோம்.

முக்கியமான சீர்திருத்தங்களின் தொகுப்பு:

1. ஜிஎஸ்டி (GST) சீர்திருத்தம்:

• 5% மற்றும் 18% என இரு அடுக்கு வரி முறை அமல்படுத்தப்பட்டுள்ளது.

• நடுத்தர குடும்பங்கள், சிறு குறு தொழில்கள் (MSMEs), விவசாயிகள் மற்றும் தொழிலாளர் சார்ந்த துறைகளின் வரிச்சுமை குறைக்கப்பட்டுள்ளது.

• இது நுகர்வோர் மத்தியில் நம்பிக்கையை ஏற்படுத்தி, பண்டிகைக் கால விற்பனையை அதிகரித்துள்ளது.

2. நடுத்தர மக்களுக்கான வரிச் சலுகை:

• முதன்முறையாக, ஆண்டுக்கு ₹12 லட்சம் வரை வருமானம் ஈட்டுவோருக்கு வருமான வரி கிடையாது.

• 1961-ம் ஆண்டின் காலாவதியான வருமான வரிச் சட்டம் நீக்கப்பட்டு, எளிமையான ‘வருமான வரிச் சட்டம் 2025’ கொண்டுவரப்பட்டுள்ளது.

3. சிறு மற்றும் நடுத்தர வணிகங்களுக்கு ஊக்கம்:

• ₹100 கோடி வரை விற்றுமுதல் (Turnover) கொண்ட நிறுவனங்களும் இனி ‘சிறு நிறுவனங்கள்’ என வரையறுக்கப்படும். இது ஆயிரக்கணக்கான நிறுவனங்களின் விதிமுறைச் சுமைகளைக் குறைக்கும்.

4. காப்பீட்டுத் துறையில் 100% அந்நிய நேரடி முதலீடு (FDI):

• இந்தியக் காப்பீட்டு நிறுவனங்களில் 100% அந்நிய நேரடி முதலீடு அனுமதிக்கப்பட்டுள்ளது. இது காப்பீட்டுச் சேவையைப் பாமர மக்களிடமும் கொண்டு சேர்க்கும்.

5. கடல்சார் மற்றும் நீலப் பொருளாதாரச் சீர்திருத்தங்கள்:

• ஒரே நாடாளுமன்றக் கூட்டத்தொடரில் 5 முக்கிய கடல்சார் சட்டங்கள் நிறைவேற்றப்பட்டன. 1908, 1925 மற்றும் 1958 ஆகிய ஆண்டுகளின் பழைய சட்டங்கள் நீக்கப்பட்டு, நவீன காலத்திற்கு ஏற்ப மாற்றப்பட்டுள்ளன.

6. ‘ஜன் விஸ்வாஸ்’ – குற்றவியல் நீக்கம்:

• காலாவதியான நூற்றுக்கணக்கான சட்டங்கள் நீக்கப்பட்டுள்ளன. ‘மறுஆய்வு மற்றும் திருத்தச் சட்டம் 2025’ மூலம் 71 சட்டங்கள் ரத்து செய்யப்பட்டுள்ளன. இது தொழில் செய்வதை எளிதாக்கும் (Ease of Doing Business).

7. வரலாற்றுச் சிறப்புமிக்க தொழிலாளர் சீர்திருத்தங்கள்:

• 29 வெவ்வேறு தொழிலாளர் சட்டங்கள் ஒருங்கிணைக்கப்பட்டு 4 நவீன குறியீடுகளாக (Labor Codes) மாற்றப்பட்டுள்ளன. இது முறையற்ற தொழிலாளர்களையும் (Contract workers) காப்பீடு (ESIC) மற்றும் வருங்கால வைப்பு நிதி (EPFO) வரம்பிற்குள் கொண்டு வந்துள்ளது.

8. உலகளாவிய வர்த்தக ஒப்பந்தங்கள்:

• நியூசிலாந்து, ஓமன் மற்றும் பிரிட்டன் ஆகிய நாடுகளுடன் வர்த்தக ஒப்பந்தங்கள் கையெழுத்தாகியுள்ளன. ஐரோப்பிய நாடுகளுடன் (EFTA) முதல் முறையாகத் தடையற்ற வர்த்தக ஒப்பந்தம் (FTA) நடைமுறைக்கு வந்துள்ளது.

9. அணுசக்தி சீர்திருத்தங்கள் (SHANTI Act):

• அணுசக்தித் துறையில் தனியார் பங்களிப்பை ஊக்குவிக்கவும், AI யுகத்திற்குத் தேவையான பசுமை எரிசக்தியை உருவாக்கவும் ‘சாந்தி சட்டம்’ (SHANTI Act) ஒரு மைல்கல்லாகும்.

10. ஊரக வேலைவாய்ப்பு மற்றும் கல்வி:

• G RAM G சட்டம் 2025: ஊரக வேலைவாய்ப்பு உறுதித் திட்டம் 100 நாட்களில் இருந்து 125 நாட்களாக உயர்த்தப்பட்டுள்ளது.

• கல்விச் சீர்திருத்தம்: UGC, AICTE போன்ற அமைப்புகளுக்குப் பதிலாக ‘விக்சித் பாரத கல்வி அதிஷ்டான்’ (Viksit Bharat Shiksha Adhishthan) என்ற ஒற்றை ஒழுங்குமுறை அமைப்பு உருவாக்கப்படவுள்ளது.

 2025-ம் ஆண்டின் சீர்திருத்தங்களின் அடிப்படைத் தத்துவம் என்பது ‘கட்டுப்பாட்டிற்குப் பதில் ஒத்துழைப்பு’ மற்றும் ‘ஒழுங்குமுறைக்குப் பதில் வசதி செய்தல்’ என்பதாகும். எங்களின் ஒவ்வொரு சீர்திருத்தமும் சிறு வணிகர்கள், இளைஞர்கள், விவசாயிகள் மற்றும் நடுத்தர மக்களின் எதார்த்த நிலையை உணர்ந்து வடிவமைக்கப்பட்டவை.

தற்சார்பு இந்தியா மற்றும் ‘விக்சித் பாரதம்’ (வளர்ந்த இந்தியா) என்ற இலக்கை நோக்கியே எமது பயணம் அமையும். இந்திய வளர்ச்சிக் கதையோடு உங்களை இணைத்துக் கொள்ளுமாறு உள்நாட்டிலும் வெளிநாட்டிலும் உள்ள அனைவரையும் கேட்டுக்கொள்கிறேன். இந்தியாவின் மீதும், இந்திய மக்கள் மீதும் தொடர்ந்து நம்பிக்கை வையுங்கள்!

நரேந்திரமோடி