வாசிப்புப் பசியில் இந்தியா:உலகையே வியக்க வைக்கும் புத்தகச் சந்தையின் அசுர வளர்ச்சி!

டிஜிட்டல் உலகம் நம்மைச் சூழ்ந்திருந்தாலும், காகித வாசனையுடன் புத்தகங்களை வாசிப்பதன் சுகமே தனி என்பதை இந்திய வாசகர்கள் மீண்டும் நிரூபித்திருக்கிறார்கள். “இனி எல்லாம் ஆன்லைன் மயம், புத்தகங்களின் காலம் முடிந்துவிட்டது” என்று ஆரூடம் சொன்னவர்களின் கணிப்புகளைத் தகர்த்து, இந்தியப் பதிப்புத்துறை இன்று உலக அளவில் முதலிடத்தில் மின்னுகிறது. 2025-ஆம் ஆண்டின் புள்ளிவிவரங்கள், இந்தியா ஒரு ‘வாசிப்புப் புரட்சியை’ நோக்கி நகர்வதை உறுதிப்படுத்தியுள்ளன.

உலக நாடுகளை முந்திய இந்தியா!

NielsenIQ BookData மற்றும் GfK Entertainment இணைந்து 19 நாடுகளில் நடத்திய ஆய்வின் முடிவுகள் நம்மை ஆச்சரியப்பட வைக்கின்றன. 2025-ஆம் ஆண்டின் முதல் எட்டு மாதங்களில், உலக நாடுகளில் பாதிக்கும் மேற்பட்டவை புத்தக விற்பனை வருவாயில் வளர்ச்சியைச் சந்தித்துள்ளன. இதில் 28.6% வளர்ச்சியுடன் இந்தியா உலகிலேயே முதலிடம் பிடித்துள்ளது. பிரேசில், கொலம்பியா மற்றும் போர்ச்சுகல் போன்ற நாடுகள் இந்தியாவிற்கு அடுத்தடுத்த இடங்களையே பிடிக்க முடிந்தது. இது இந்திய வாசகர்களின் வாங்கும் திறன் மற்றும் வாசிப்பு ஆர்வம் அதிகரித்துள்ளதைக் காட்டுகிறது.

புத்தக ஏற்றுமதியில் புதிய சாதனை

உள்ளூர் விற்பனை மட்டுமன்றி, உலக நாடுகளுக்கும் புத்தகங்களை வழங்குவதில் இந்தியா தனது முத்திரையைப் பதித்துள்ளது. IPPstar நிறுவனத்தின் தரவுகளின்படி, 2024 நிதியாண்டில் 2,454 கோடி ரூபாயாக இருந்த இந்தியப் புத்தக ஏற்றுமதி, 2025 நிதியாண்டில் 2,603 கோடி ரூபாயாக உயர்ந்துள்ளது. தரமான அச்சு, குறைந்த செலவு மற்றும் இந்திய எழுத்தாளர்களின் படைப்புகளுக்கு உலக அரங்கில் பெருகி வரும் வரவேற்பு ஆகியவை இந்த வளர்ச்சிக்கு முக்கியக் காரணங்களாகப் பார்க்கப்படுகின்றன.

புத்தகக் கடைகளுக்குத் திரும்பிய வாசகர்கள்

கொரோனா பெருந்தொற்று காலத்தில் வீடுகளுக்குள் முடங்கிக் கிடந்த மக்கள், தற்போது மீண்டும் புத்தகக் கடைகளுக்குப் படையெடுக்கத் தொடங்கியுள்ளனர். ஆன்லைனில் தேடுவதை விட, புத்தகக் கடைகளில் அலைந்து திரிந்து, புதிய எழுத்தாளர்களின் குரல்களையும், இதுவரை படிக்காத புதிய வகை இலக்கியங்களையும் (Genres) தேடிக் கண்டுபிடிப்பதில் வாசகர்கள் மிகுந்த ஆர்வம் காட்டுகிறார்கள்.

“நீண்ட கால ஊரடங்கிற்குப் பிறகு, மக்கள் வெளியே வரவும், உலாவவும், புதிய விஷயங்களைக் கண்டறியவும் விரும்பினர். இதற்கு புத்தகக் கடைகளை விடச் சிறந்த இடம் எதுவாக இருக்க முடியும்?” – என்கிறார்கள் துறை சார்ந்த வல்லுநர்கள்.

வளர்ச்சிக்கான காரணங்கள்:

• புதிய வகை எழுத்துக்கள்: கற்பனை கதைகள் மட்டுமன்றி, சுய முன்னேற்றம், வரலாறு மற்றும் சமகால அரசியல் குறித்த புத்தகங்களுக்கு இளைஞர்களிடையே அதிக வரவேற்பு உள்ளது.

• அச்சுத் தரம்: இந்தியப் பதிப்பகங்கள் சர்வதேசத் தரத்திற்கு இணையாகப் புத்தகங்களை வடிவமைக்கத் தொடங்கியுள்ளன.

• நேரடி அனுபவம்: இ-புத்தகங்களை விட காகிதப் புத்தகங்களைத் தொட்டு வாசிக்கும் ‘ஸ்பரிச அனுபவத்தை’ மக்கள் மீண்டும் விரும்பத் தொடங்கியுள்ளனர்.

இந்தியப் பதிப்புத்துறையின் இந்த அசுர வளர்ச்சி, அறிவார்ந்த சமூகத்தை உருவாக்குவதில் இந்தியா சரியான பாதையில் செல்கிறது என்பதையே பறைசாற்றுகிறது.

ரமாபிரபா