டாடாவில் நடக்கும் அதிகாரப் போர்: ராகுலின் அடுத்த கட்டத் தாக்குதல்!

இந்திய அரசியலிலும் வர்த்தக உலகிலும் பெரும் புயலைக் கிளப்பியுள்ள ஒரு விவாதம், டாடா குழுமத்தின் தற்போதைய அதிகாரப் போட்டியும், அதில் மத்திய அரசின் தலையீடு குறித்த குற்றச்சாட்டுகளும்தான். டாடா அறக்கட்டளை மற்றும் டாடா சன்ஸ் அமைப்பின் பிரதிநிதிகள், மத்திய உள்துறை அமைச்சர் அமித் ஷா மற்றும் நிதி அமைச்சர் நிர்மலா சீதாராமன் ஆகியோரைச் சந்தித்ததாகக் கூறப்படும் தகவல் வெளியானது முதல், எதிர்க்கட்சித் தலைவர் ராகுல் காந்தியின் காட்டமான கேள்விகள் மத்திய அரசை நோக்கிப் பாய்ந்துள்ளன.

ராகுல் காந்தியின் சரமாரி கேள்விகள்

மத்திய பிரதமர் நரேந்திர மோடி தலைமையிலான அரசு, நாட்டின் முன்னணி தொழிலதிபர் கௌதம் அதானிக்கு ஆதரவாகச் செயல்படுவதாக ராகுல் காந்தி தொடர்ந்து குற்றஞ்சாட்டி வருகிறார். அதன் தொடர்ச்சியாக, டாடா குழுமத்தில் நடக்கும் நகர்வுகள் குறித்தும் அவர் தனது சமூக வலைதளப் பக்கத்தில் மிகக் காட்டமான கேள்விகளை எழுப்பியுள்ளார்.

டாடா குழுமத்தில் அடுத்தபடியாகக் கைவைக்கப் போவது யார் என்றும், அதானிக்கு டாடாவின் எந்தப் பகுதிகள் கிடைக்கப் போகின்றன என்றும் அவர் நேரடியாகக் கேள்வியெழுப்பியுள்ளார். அமித் ஷாவின் இல்லத்தில் நடந்த தேநீர் விருந்தில் டாடா சன்ஸ் மற்றும் டாடா அறக்கட்டளை பிரதிநிதிகள் கலந்துகொள்ள வேண்டிய அவசியம் என்ன என்றும், அங்கு பேசப்பட்ட சட்ட மற்றும் வர்த்தக ரீதியான விஷயங்கள் என்ன என்றும் அவர் வினவியுள்ளார். அத்துடன், இந்திய வர்த்தகத் துறை என்பது மோடி மற்றும் அமித் ஷாவின் விளையாட்டுப் பொருள் அல்ல என்றும், தொழிலதிபர்கள் பயமின்றி உண்மைகளைப் பேச வேண்டும் என்றும் அவர் வலியுறுத்தியுள்ளார்.

மத்திய நிதி அமைச்சரின் பதில்

ராகுல் காந்தியின் இந்தக் குற்றச்சாட்டுகளுக்கு மத்திய நிதி அமைச்சர் நிர்வலா சீதாராமன் உடனடியாகப் பதிலளித்துள்ளார். ராகுல் காந்தி எதிர்க்கட்சித் தலைவர் என்ற முறையில் பொறுப்புடன் நடந்துகொள்ள வேண்டும் என்றும், வர்த்தக மற்றும் சட்ட ரீதியான சாதாரண விவகாரங்களை அரசியலாக்குவதோ அல்லது குற்றச் செயல்களாகச் சித்தரிப்பதோ ஏற்றுக்கொள்ள முடியாதது என்றும் அவர் சுட்டிக்காட்டியுள்ளார்.

டாடா சன்ஸ் தலை தலைமைப் போட்டி

ராகுல் காந்தியின் இந்த அரசியல் தாக்குதலுக்குப் பின்னால், டாடா குழுமத்திற்குள் நிலவும் கடுமையான அதிகாரப் போட்டியே முக்கியக் காரணமாக அமைகிறது. டாடா சன்ஸ் தலைவராக என். சந்திரசேகரன் மீண்டும் நியமிக்கப்பட்டதை டாடா அறக்கட்டளையின் தலைவர் நோயல் டாடா கடுமையாக எதிர்த்து வருகிறார்.

இந்த மறுநியமனம் விதிமுறைகளுக்கு மாறானது என்றும், டாடா சன்ஸ் அமைப்பின் சட்ட விதிகளுக்கு எதிரானது என்றும் நோயல் டாடா கடிதம் எழுதியுள்ளார். இந்தச் சூழலில், டிவிஎஸ் மோட்டார்ஸ் தலைவர் வேணு சீனிவாசன் போன்ற முக்கிய உறுப்பினர்கள் சந்திரசேகரனுக்கு ஆதரவாக நிற்பது டாடா குழுமத்தின் உள்வீட்டுப் பூசலை வெளிச்சத்திற்குக் கொண்டுவந்துள்ளது.

மத்திய அரசின் செல்வாக்கும் பிற காரணிகளும்

டாடா குழுமத்தின் முக்கிய முடிவுகள், தற்போதைய மத்திய அரசின் கொள்கைகளுக்கு ஏற்றவாறே எடுக்கப்படுவதாக சர்வதேச வர்த்தக வல்லுநர்கள் கருத்து தெரிவிக்கின்றனர். குறிப்பாக குறைக்கடத்தி (Semiconductors) மற்றும் விமானத் துறை தொடர்பான டாடாவின் முக்கிய நகர்வுகள் அரசின் திட்டங்களுடன் ஒத்துப்போகின்றன.

அதேவேளையில், டாடா சன்ஸ் அமைப்பில் 18.4 சதவீதப் பங்குகளை வைத்துள்ள ஷாபூர்ஜி பல்லோன்ஜி குழுமமும், தங்கள் பங்குகளைப் பணமாக்க மத்திய அரசின் உதவியை எதிர்நோக்கியிருப்பதாகக் கூறப்படுகிறது. மேலும், டாடா குழுமத்தின் அதிகாரப் போட்டியில் முக்கியப் பங்காற்றும் வேணு சீனிவாசன் போன்ற தொழிலதிபர்கள், மத்திய அரசுடன் நல்லுறவைக் கொண்டுள்ளனர்.

இந்தியாவின் முதன்மை அடையாளமான டாடா குழுமம், நாட்டின் வளர்ச்சிக்குத் தொடர்ந்து பங்களித்து வரும் வேளையில், தற்போதைய உள்வீட்டுப் பூசல்களும் அதில் ஏற்படும் அரசியல் தலையீடுகளும் இந்திய வர்த்தக உலகத்தில் பெரும் விவாதப் பொருளாக மாறியுள்ளன.

விக்கி