விமர்சனம்: லவ் சப்ஸ்கிரைப் ஷேர் (LSS)!

புதுமுகங்களை வைத்து ஒரு த்ரில்லர் காதல் விருந்து படைக்க ஆசைப்பட்டிருக்கிறார் இயக்குனர் ஆர். மகாலக்‌ஷ்மி முருகன். முதல் பாதியில் இளைஞர்களின் ‘கல்லூரி காதல்’ கதையைச் சொல்லிவிட்டு, இரண்டாம் பாதியில் காசி, கிரைம் என டிராக்கை மாற்றியிருக்கிறார். முயற்சி என்னவோ புதுசுதான், ஆனால் திரைக்கதையில் இருந்த ஓட்டைகள் ரசிகர்களைக் கொஞ்சம் சோதிக்கவே செய்திருக்கின்றன.

கதைச் சுருக்கம்:

சீனியர் ஹீரோ ஆதவ் கிருஷ்ணா, ஜூனியர் சிம்ரன். ரவுடிகளிடம் இருந்து காப்பாற்றிய நன்றியில் தொடங்கும் நட்பு, காதலாக மலர்கிறது. ஹீரோ வீட்டில் க்ரீன் சிக்னல் கிடைத்துவிட, வடமாநில கோடீஸ்வரரான ஹீரோயினின் அப்பா மட்டும் ரெட் சிக்னல் காட்டுகிறார். பிரிந்து போன தன் அம்மாவைப் பார்த்தால் அப்பா மனம் மாறுவார் என நம்பி, காதலனுடன் காசிக்கு விசிட் அடிக்கிறார் சிம்ரன். அங்கே சிம்ரன் மாயமாக, அவரைத் தேடி ஆதவ் அலைகிறார். காசியின் சந்துகளில் காதல் என்னவானது? சிம்ரன் கிடைத்தாரா? என்பதுதான் கிளைமாக்ஸ்.

நடிப்பு எப்படி?

• ஆதவ் கிருஷ்ணா: அறிமுக நாயகன். சிக்ஸ் பேக் மிரட்டல் இல்லை என்றாலும், ஒரு எதார்த்தமான ‘பக்கத்து வீட்டுப் பையன்’ தோற்றத்தில் கவர்கிறார். டான்ஸ் மற்றும் சண்டைக் காட்சிகளில் கடுமையாக உழைத்திருப்பது திரையில் தெரிகிறது.

• சிம்ரன்: துறுதுறுப்பான நடிப்பு. காதலன் மற்றும் அவரது பெற்றோரிடம் காதலைப் புரியவைக்கும் இடங்களில் ஸ்கோர் செய்கிறார். நடிப்பில் ஒரு நேர்த்தி இருக்கிறது.

• பிறர்: படவா கோபி, வினோதினி ஆகியோர் வழக்கமான பெற்றோர்களாக வந்து போகிறார்கள். ஜாவா சுந்தரேசனை ‘மொபெட் சுந்தரேசன்’ ஆக்கி விளையாடியிருக்கிறார்கள்.

தொழில்நுட்பம்:

என்.எஸ். சதீஷ்குமாரின் கேமரா சென்னையின் கலர்ஃபுல் பக்கங்களையும், காசியின் ஆன்மிகச் சூழலையும் அழகாகப் படம் பிடித்திருக்கிறது. அஸ்வமித்ராவின் இசையில் பாடல்கள் ஓகே ரகம். ஸ்ரீகாந்தின் எடிட்டிங் ஓரளவுக்குப் படத்தை நகர்த்த உதவுகிறது.

பிளஸ் & மைனஸ்:

அசோக் அமிர்தராஜின் வசனங்கள் பல இடங்களில் ‘சினிமாத்தனமாக’ இருப்பது பலவீனம். லாஜிக் ஓட்டைகள் படத்திற்குப் பெரும் முட்டுக்கட்டை.

1. காசியில் நள்ளிரவில் சோன்பப்படி வாங்கப் போய் சிம்ரன் சிக்கிக்கொள்வது ‘ஏன் இந்த வேலை?’ என நினைக்க வைக்கிறது.

2. சிம்ரனின் அம்மா கங்கை நதியில் படகில் ஜாலியாகச் சுற்றிக்கொண்டே இருக்கிறார்; ஆனால் அவரைத் தொடர்பு கொள்ள யாருமே இத்தனை ஆண்டுகள் முயலவில்லை என்பது செம காமெடி.

3. வில்லன்கள் செய்யும் மெகா கிரைமுக்கு கடைசியில் ஒரு சிம்பிள் ‘சாரி’யோடு மன்னிப்பு கேட்பதெல்லாம் எந்த ஊர் நியாயமோ?

ஆந்தை தீர்ப்பு:

காதலை சப்ஸ்கிரைப் செய்த இயக்குனர், த்ரில்லர் கதையில் லாஜிக்கை ஷேர் செய்ய மறந்துவிட்டார். புதுமுகங்களின் உழைப்புக்காக வேண்டுமானால் ஒருமுறை பார்க்கலாம்.

மார்க்: 2.25 / 5