ஜாக்கி-விமர்சனம்:ஆட்டுக்கிடா சண்டையும்…அனல் பறக்கும் மோதலும்!

தமிழகத்தின் தென் மாவட்டங்களான மதுரை, தேனி, திண்டுக்கல் பகுதிகளில் ஜல்லிக்கட்டுக்கு இணையாகக் கொண்டாடப்படும் ஒரு வீர விளையாட்டு ‘கிடா சண்டை’. சேவற் சண்டையைப் போலவே விறுவிறுப்பு நிறைந்த இந்த விளையாட்டை மையமாக வைத்து, இதுவரை ஒரு சில காட்சிகள் மட்டுமே சினிமாவில் வந்திருக்கின்றன. ஆனால், கிடா முட்டு சண்டையையே முழுநீளக் கதையாகக் கொண்டு வந்துள்ள முதல் படம் இதுதான்.

கதைக்கரு

கிராமத்தின் கௌரவம் மற்றும் உரிமையாளர்களின் ஈகோவுடன் தொடர்புடைய ‘ஆட்டுச் சண்டை’யை மையமாகக் கொண்டது இத்திரைப்படம். மதுரையில் ஷேர் ஆட்டோ ஓட்டும் ராமர் (யுவன் கிருஷ்ணா), தனது ‘காளி’ என்ற கிடாவை மிகவும் பாசத்துடன் வளர்க்கிறார். மறுபுறம், ஆண்டுதோறும் போட்டியில் வென்று பதக்கங்களை குவிக்கும் கார்த்தி (ரிதான் கிருஷ்ணாஸ்). ஒரு போட்டியில் கார்த்தியின் கிடாவை ராமரின் காளி வீழ்த்துகிறது. இதனால் ஆத்திரமடையும் கார்த்தி, ராமருக்கும் அவரது கிடாவுக்கும் கொடுக்கும் தொல்லைகளும், அதன் விளைவுகளுமே  ஜாக்கி படத்தின் கதை.

நடிப்பு மற்றும் தொழில்நுட்பம்

• யுவன் கிருஷ்ணா: ஹீரோ ராமர் ரோலில் நடித்திருக்கும் இவர், தனது கிடா காளியிடம் காட்டும் பாசம் மிகவும் உயிர்ப்புடன் இருக்கிறது. அந்த கிடாவுடன் அவர் நீண்ட காலம் பழகி நடித்திருப்பது காட்சிகளில் தெரிகிறது.

• ரிதான் கிருஷ்ணாஸ்: வில்லன் கார்த்தியாக மிரட்டியிருக்கிறார். முரட்டுத்தனமான கிடாவின் கொம்பைப் பிடித்து சண்டை மைதானத்திற்கு அவர் அழைத்து வரும் காட்சிகள் அவரது அர்ப்பணிப்பைக் காட்டுகின்றன.

• இயக்கம்: இயக்குனர் பிரகபல் இந்தக் கதையை உருவாக்குவதற்காக மூன்று ஆண்டுகள் மதுரையிலேயே தங்கி ஆய்வு செய்துள்ளார். கிடா சண்டை பாரம்பரியம், சென்டிமெண்ட் என ஒரு முழுமையான படத்தைக் கொடுத்துள்ளார்.

• பிற கலைஞர்கள்: அம்மு அபிராமி காதலுக்காகப் பயன்படுத்தப்பட்டுள்ளார். வழக்கமான வில்லன் மது சூதனராவ் இதில் நடுவராக வந்து ஆச்சரியப்படுத்துகிறார். சக்தி பாலாஜியின் இசை விறுவிறுப்பை கூட்டுகிறது.

பிளஸ் & மைனஸ்

• பிளஸ்: கிடாக்கள் மோதிக் கொள்ளும்போது எழும் கொம்பு மோதல் சத்தம் தத்ரூபமாகப் படமாக்கப்பட்டுள்ளது. பழைய மதுரையை கண்முன் நிறுத்தும் ஒளிப்பதிவு மற்றும் நறுக்குத் தெறித்த வசனங்கள் படத்திற்கு பலம்.

• மைனஸ்: திரைக்கதையில் இன்னும் கொஞ்சம் அக்கறை காட்டியிருக்கலாம் என்று தோன்றுகிறது.

ஆந்தை ரிப்போர்ட்டர் ரேட்டிங்: 3 / 5