உலக அழகு தினம்: அகத்தின் பொலிவையும் இயல்பான அழகையும் போற்றும் நாள்!

அழகு என்பது வெறும் வெளிப்புறத் தோற்றத்திலோ அல்லது உடலமைப்பிலோ மட்டும் சுருங்கிவிடக் கூடிய ஒன்று அல்ல. அது ஒரு மனிதனின் எண்ணம், குணம், நம்பிக்கை மற்றும் இயற்கையோடு இயைந்து வாழும் நேர்மறை மனப்பான்மை ஆகியவற்றின் கூட்டுக்கலவையாகும். பண்டைய காலம் முதலே அழகு பற்றிய வரையறைகள் சமூகத்திற்கு சமூகம் மாறுபட்டு வந்தாலும், உண்மையான அழகு என்பது அகத்தின் அழகே என்பதை உலகம் ஒப்புக்கொண்டுள்ளது. இந்த நிலையில், அழகின் உண்மையான அர்த்தத்தைப் புரிந்துகொள்ளவும், அழகுத்துறை சார்ந்த கலை மற்றும் அறிவியல் பங்களிப்பை அங்கீகரிக்கவும் ஆண்டுதோறும் செப்டம்பர் 9 ஆம் தேதி சர்வதேச அழகு தினம் உலகெங்கிலும் கொண்டாடப்படுகிறது.

தமிழ் இலக்கியங்கள் அழகை “அகத்தின் அழகு முகத்தில் தெரியும்” என்று சுருக்கமாகக்கூறி, மனதின் தூய்மையையே முதன்மைப்படுத்துகின்றன. நவீனக் கருத்தாக்கத்தின்படி அழகு என்பது கருணை, இரக்கம், தன்னம்பிக்கை போன்ற அக அழகையும், ஆரோக்கியமான வாழ்வியல் முறை மற்றும் உடற்பயிற்சி மூலம் பெறப்படும் இயற்கை அழகையும் உள்ளடக்கியதாகும். இன்றைய நவீன உலகில் அழகு என்பது ஒரு குறிப்பிட்ட நிறத்தையோ அல்லது உடல் அளவையோ குறிப்பது அல்ல. ஒவ்வொரு மனிதனும் தன்னளவில் தனித்துவமான அழகு கொண்டவனே என்ற எண்ணத்தை விதைப்பதே உண்மையான அழகியல் ஆகும்.

அழகுத்துறைக்கு உலகளாவிய ரீதியில் ஒரு அங்கீகாரத்தை உருவாக்க வேண்டும் என்ற நோக்கில் சர்வதேச அழகியல் மற்றும் அழகுசாதனக் குழுவின் (CIDESCO) ரஷ்யப் பிரிவு இந்த வரலாற்றுச் சிறப்புமிக்க முயற்சியை எடுத்தது. 1946 ஆம் ஆண்டு சுவிட்சர்லாந்தின் சூரிச் நகரில் தொடங்கப்பட்ட சிடெஸ்கோ அமைப்பு, உலகளவில் அழகு மற்றும் சருமப் பராமரிப்புத் துறையில் முன்னணி நிறுவனமாக விளங்கி வருகிறது. இந்த அமைப்பின் ரஷ்யப் பிரிவு, 1995 ஆம் ஆண்டு செப்டம்பர் 9 ஆம் தேதியை ‘உலக அழகு தினமாக’ அறிவித்தது. அன்றிலிருந்து ஒவ்வொரு ஆண்டும் செப்டம்பர் 9 ஆம் தேதி சர்வதேச அழகு தினமாக உலக நாடுகளால் கடைப்பிடிக்கப்பட்டு வருகிறது.

உலக அழகு தினம் வெறுமனே அழகுப் போட்டிகளை நடத்துவதற்கான நாள் மட்டுமல்ல. சமூக ஊடகங்களால் உருவாக்கப்படும் செயற்கையான அழகு நெறிமுறைகளை உடைத்து, அவரவர் இயல்பான தோற்றத்தை நேசிக்கக் கற்றுக்கொடுப்பதே இதன் பிரதான நோக்கமாகும். முடி திருத்துபவர்கள், ஒப்பனைக் கலைஞர்கள், சருமப் பராமரிப்பு நிபுணர்கள் மற்றும் அழகியல் மருத்துவர்கள் போன்ற அழகுப் பராமரிப்புத் துறையில் உழைக்கும் லட்சக்கணக்கான தொழிலாளர்களின் பங்களிப்பை அங்கீகரிப்பதும், இரசாயனப் பொருட்கள் இல்லாத இயற்கை சார்ந்த பராமரிப்பு குறித்து விழிப்புணர்வு ஏற்படுத்துவதும் இந்நாளின் முக்கிய அங்கமாகும்.

இன்றைய சூழலில் அழகு தினம் என்பது பாலின தடைகளை உடைத்து, ஆண், பெண் மற்றும் மூன்றாம் பாலினத்தவர் என அனைவருக்குமான சுய பராமரிப்பை வலியுறுத்துகிறது. உடலை நேசிப்பதும், சருமத்தை ஆரோக்கியமாக வைத்துக்கொள்வதும் ஒரு தற்காப்பு நடவடிக்கையே தவிர, பிறரைக் கவர்வதற்காக அல்ல என்ற நேர்மறைச் சிந்தனை மக்களிடையே அதிகரித்து வருகிறது. அழகு என்பது பார்க்கப்படும் பொருளில் இல்லை, அதைப் பார்க்கும் பார்வையில் இருக்கிறது என்பார்கள். நம் எண்ணங்களையும், உலகைப் பார்க்கும் பார்வையையும் அழகாக மாற்றிக்கொள்வதே இந்த சர்வதேச அழகு நாளில் நாம் எடுக்கும் சிறந்த முடிவாக இருக்கும்.

தனுஜா