மரண துயரத்திலும் காமம்: குற்றவுணர்ச்சி தேவையா? – ஓர் அலசல்

பாலியல் கல்வியாளரும், காமசூத்ரா குறித்த கதைசொல்லியும், எழுத்தாளருமான சீமா ஆனந்த் (Seema Anand), தனது புதிய புத்தகத்தில் மிக முக்கியமான, ஆனால் யாரும் வெளிப்படையாகப் பேசத் தயங்கும் ஒரு தலைப்பைக் கையிலெடுத்திருக்கிறார். அது— ‘துயரம் (Grief) மற்றும் இச்சை (Desire) இவற்றுக்கு இடையிலான போராட்டம்’. இதோ, அவரது புதிய புத்தகத்தின் சாராம்சத்தை மையமாகக் கொண்ட சிறப்புப் பார்வை

நெருக்கமான ஒருவரின் இறப்பு அல்லது பிரிவால் ஏற்படும் துயரம் (Grief) ஒரு பக்கம்… அதே நேரத்தில் உடலில் ஏற்படும் பாலியல் இச்சை (Desire) மறுபக்கம். “சோகத்தில் இருக்கும்போது இப்படித் தோன்றலாமா?” என்ற குற்றவுணர்ச்சியில் தவிப்பவர்களுக்கு, சீமா ஆனந்த் தனது புதிய புத்தகத்தின் மூலம் ஒரு தெளிவான பாதையைக் காட்டுகிறார்.

துயரம் என்பது கனமானது; அது நம்மை முடக்கிப்போடக்கூடியது. ஆனால் இச்சை (Desire) என்பது வாழ்வின் இயக்கம்; அது உயிர்ப்பு நிறைந்தது. இவை இரண்டும் எதிரெதிர் துருவங்கள் போலத் தோன்றினாலும், மனித மனதிற்குள் இவை ஒரே நேரத்தில் எழும்புவது சாத்தியமே என்கிறார் பிரபல பாலியல் கல்வியாளர் சீமா ஆனந்த்.

துயரத்தின் போது இச்சை: ஒரு ‘துரோகமா’? பொதுவாக, ஒரு இழப்பிற்குப் பிறகு (அது மரணமாகவோ அல்லது உறவு முறிவாகவோ இருக்கலாம்), நாம் துயரத்தில் இருக்கும்போது பாலியல் ரீதியான உணர்வுகள் தோன்றினால், நம் மனம் அதை ஒரு ‘துரோகமாக’ பார்க்கிறது. “நான் வருத்தத்தில் இருக்க வேண்டும், ஆனால் என் உடல் இன்பத்தைத் தேடுகிறதே, நான் செய்வது சரியா?” என்ற குற்றவுணர்ச்சி (Guilt) பலரை வாட்டுகிறது.

சீமா ஆனந்த் இந்த இடத்தில் ஒரு முக்கியமான உளவியல் உண்மையை முன்வைக்கிறார். “துயரம் என்பது மனதின் வலி. ஆனால் இச்சை என்பது உடலின் மொழி. துயரத்தில் இருக்கும்போது இன்பம் துய்ப்பது என்பது, மறைந்தவருக்கோ அல்லது அந்த உறவுக்கோ செய்யும் அவமரியாதை அல்ல. அது, நீங்கள் இன்னும் உயிருடன் இருக்கிறீர்கள் என்பதற்கான அடையாளம்” என்கிறார் அவர்.

வேறாக்கிக் காணுதல் (Separating Desire from Grief) துயரத்தையும் இச்சையையும் போட்டுக் குழப்பிக்கொள்ளாமல், இரண்டையும் தனித்தனியாகப் பிரித்துப் பார்க்க வேண்டும் என்று சீமா ஆனந்த் அறிவுறுத்துகிறார்.

1. உயிர்ப்பின் அடையாளம்: மரணம் அல்லது இழப்பு நம்மைச் சுற்றி ஒரு வெறுமையை உருவாக்கும்போது, பாலியல் இச்சை என்பது ‘நான் இருக்கிறேன், நான் வாழ விரும்புகிறேன்’ என்று நம் ஆழ்மனம் சொல்லும் வழியாகும். அது ஒரு பிழைப்புக்கான உள்ளுணர்வு (Survival Instinct).

2. நிவாரணம்: உடலுறவின் போது வெளியாகும் ஹார்மோன்கள் (Oxytocin, Dopamine), மிகக்கடுமையான மனச்சோர்விலிருந்து விடுபட உதவும் இயற்கையான வலி நிவாரணிகள். இதை ஒரு தற்காலிக ஆறுதலாகப் பார்ப்பதில் தவறில்லை.

3. குற்றவுணர்ச்சியைத் தவிர்த்தல்: “இன்பம் அனுபவிப்பதால், உங்கள் துயரம் பொய்யானது என்று அர்த்தமல்ல.” துயரமும் இச்சையும் ஒரே நேரத்தில் பயணிக்கக்கூடிய இணையான தண்டவாளங்கள் என்பதைப் புரிந்துகொள்ள வேண்டும்.

சீமா ஆனந்தின் பார்வை “காமசூத்ரா வெறும் உடலுறவுக்கான புத்தகம் மட்டுமல்ல; அது இன்பத்தைப் பற்றிய கலைக்களஞ்சியம்” என்று அடிக்கடி கூறும் சீமா ஆனந்த், தனது புதிய புத்தகத்தில், நவீன காலத்து மனக்காயங்களுக்குப் பண்டைய காலத்து ஞானத்தின் மூலம் மருந்திடுகிறார்.

துயரம் என்பது ஒரு இருண்ட அறை என்றால், இச்சை என்பது அதில் எரியும் சிறு மெழுகுவர்த்தி. அந்த ஒளியை அணைக்க வேண்டிய அவசியமில்லை; அதுவே அந்த இருளைக் கடக்க உதவக்கூடும் என்பதே சீமா ஆனந்த் சொல்லும் செய்தி.

அது சரி.. யார் இந்த சீமா ஆனந்த்?

லண்டனைச் சேர்ந்த சீமா ஆனந்த், ஒரு கதைசொல்லி (Storyteller) மற்றும் பாலியல் கல்வியாளர். இந்தியாவின் பண்டைய நூலான ‘காமசூத்ரா’வை ஆபாசமாகப் பார்க்காமல், அதை ஒரு வாழ்வியல் கலையாகவும், மனநலம் சார்ந்த விஷயமாகவும் இன்றைய தலைமுறைக்குக் கொண்டு சேர்ப்பதில் இவர் முக்கியப் பங்காற்றுகிறார். இவரது ‘The Arts of Seduction’ புத்தகம் மிகவும் பிரபலம்.

புவனா