மாத்திக்கோங்க ஜிமெயில் ஐடியை… கூகுளின் மெகா அதிரடி!

இன்றைய டிஜிட்டல் உலகில், ‘கூகுள் கணக்கு’ (Google Account) என்பது வெறும் மின்னஞ்சல் முகவரி மட்டுமல்ல; அது ஒரு மனிதனின் டிஜிட்டல் அடையாளமாகவே மாறிவிட்டது. ஆண்ட்ராய்டு போன் முதல் யூடியூப், கூகுள் டிரைவ் என அத்தனையுமே ஒரு ஜிமெயில் ஐடியைச் சார்ந்தே இயங்குகின்றன. பல ஆண்டுகளுக்கு முன்பு விளையாட்டுத்தனமாக வைத்த ஜிமெயில் ஐடியை, தற்போது வேலை நிமித்தமாக மாற்ற விரும்பினால், பழைய தரவுகளை இழக்க நேரிடுமே என்ற பயம் பலருக்கும் இருந்தது. பயனர்களின் இந்த நீண்ட காலக் கவலையைப் போக்க, கூகுள் தற்போது ஒரு பிரமாண்டமான வசதியைச் சோதனை அடிப்படையில் அறிமுகம் செய்துள்ளது.

ஒரே கணக்கு… புதிய அடையாளம்!

புதிய ஜிமெயில் முகவரியைப் பெறுவதற்காக இனிப் புதிய கூகுள் கணக்கை உருவாக்க வேண்டிய அவசியம் இல்லை. தற்போதுள்ள கணக்கிலேயே உங்களுக்குப் பிடித்த புதிய யூசர்நேமைத் (Username) தேர்வு செய்துகொள்ளும் வசதியை கூகுள் வழங்குகிறது.

இந்த மாற்றத்தால் ஏற்படும் நன்மைகள்:

• பாதுகாப்பான தரவுகள்: உங்கள் ஜிமெயில் ஐடியை மாற்றினாலும், Google Drive-இல் உள்ள ஃபைல்கள், Google Photos-இல் உள்ள நினைவுகள், YouTube சந்தாக்கள் அல்லது Play Store-இல் வாங்கிய ஆப்ஸ்கள் என எதுவுமே பாதிக்கப்படாது.

• ஒரே இன்பாக்ஸ்: பழைய ஜிமெயில் ஐடிக்கும் புதிய ஐடிக்கும் வரும் மெயில்கள் அனைத்தும் ஒரே இன்பாக்ஸிலேயே வந்து சேரும். இதனால் முக்கியமான தகவல்களைத் தவறவிடும் வாய்ப்பே இல்லை.

• இரட்டை லாகின் வசதி: லாகின் செய்யும்போது பழைய மற்றும் புதிய என இரண்டு மெயில் முகவரிகளையும் பயன்படுத்த முடியும். பழைய ஐடி தானாகவே ‘ரிகவரி மெயில்’ (Recovery Mail) ஆக மாறிவிடும் என்பதால் கணக்கின் பாதுகாப்பு இன்னும் பலப்படும்.

கவனிக்க வேண்டிய முக்கியமான கட்டுப்பாடுகள்:

கூகுள் இந்த வசதியை வழங்கினாலும், இதில் சில விதிமுறைகளையும் வகுத்துள்ளது:

1. கால அவகாசம்: ஒருமுறை யூசர்நேம் மாற்றினால், அடுத்த மாற்றத்திற்கு 12 மாதங்கள் (ஓராண்டு) காத்திருக்க வேண்டும்.

2. திரும்பப் பெறும் வசதி: மாற்றிய 12 மாதங்களுக்குள் தேவைப்பட்டால் மீண்டும் பழைய ஐடிக்கே மாறும் வசதியும் உண்டு.

3. வரையறை: ஒரு கூகுள் கணக்கில் அதிகபட்சமாக 3 முறை மட்டுமே இவ்வாறு யூசர்நேம் மாற்ற முடியும்.

4. மறுபயன்பாடு: நீங்கள் கைவிட்ட பழைய ஜிமெயில் ஐடியைப் பயன்படுத்தி வேறு யாராவது புதிய கணக்கு உருவாக்க முடியாது; அது உங்களுக்கே சொந்தமாக இருக்கும்.

டெக் உலகில் ஜிமெயிலின் இந்த வசதி ஒரு மிகப்பெரிய மைல்கல்லாகப் பார்க்கப்படுகிறது. பயனர்களின் வசதிக்காகத் தன்னைத் தொடர்ந்து புதுப்பித்துக்கொள்ளும் கூகுளின் இந்த முயற்சி, டிஜிட்டல் பயன்பாட்டை இன்னும் எளிமையாக்கும் என்பதில் ஐயமில்லை.

ஈஸ்வர் பிரசாத்