‘வந்தே மாதரம்’ அவமதிப்புத் தடை சட்டத்திருத்த மசோதா நிறைவேறியது!

இந்திய நாடாளுமன்றத்தில் ‘வந்தே மாதரம்’ தேசியப் பாடலை அவமதிப்பதைத் தட்டிகேட்கும் வகையில், அதை குற்றவியல் சட்டப் பிரிவின் கீழ் கொண்டுவரும் ‘தேசிய கௌரவ அவமதிப்புத் தடுப்பு (திருத்த) மசோதா, 2026’ (Prevention of Insults to National Honour (Amendment) Bill, 2026) மக்களவையிலும் நிறைவேற்றப்பட்டுள்ளது.

முன்னதாக மாநிலங்களவையில் நிறைவேறிய இந்த மசோதா, எதிர்க்கட்சிகளின் பலத்த அமளி மற்றும் எதிர்ப்புகளுக்கு இடையே மக்களவையில் குரல் வாக்கெடுப்பு மூலம் நிறைவேற்றப்பட்டது.

1. மசோதாவின் பின்னணி மற்றும் முக்கிய அம்சங்கள்

இந்திய அரசியலமைப்பின் கீழ் தேசியக் கொடி, தேசியக் கீதம் (ஜன கண மன) மற்றும் அரசியலமைப்புச் சட்டத்தை அவமதிப்பர்களுக்குத் தண்டனை வழங்க 1971-ஆம் ஆண்டின் ‘தேசிய கௌரவ அவமதிப்புத் தடுப்புச் சட்டம்’ அமலில் உள்ளது.

• சம சட்டப் பாதுகாப்பு: புதிய திருத்தச் சட்டத்தின் மூலம், ‘வந்தே மாதரம்’ தேசியப் பாடலுக்கும் தேசியக் கீதத்திற்கு இணையான சட்டப் பாதுகாப்பு வழங்கப்படுகிறது.

• குற்றவியல் நடவடிக்கை: ‘வந்தே மாதரம்’ பாடலை வேண்டுமென்றே தடுப்பது, பாடும் கூட்டத்தில் இடையூறு ஏற்படுத்துவது அல்லது பாடலை அவமதிக்கும் செயல்களில் ஈடுபடுவது குற்றமாகக் கருதப்படும்.

• தண்டனை விவரம்: இக்குற்றங்களுக்கு 3 ஆண்டுகள் வரை சிறைத்தண்டனை, அபராதம் அல்லது இரண்டும் விதிக்கப்படலாம்.

2. மக்களவையில் நடைபெற்ற காரசார விவாதம்

மக்களவையில் இந்த மசோதா மீதான விவாதத்தின் போது மத்திய உள் துறை இணை அமைச்சர் நித்யானந்த் ராய் உரையாற்றினார்.

• அரசின் நிலைப்பாடு: காங்கிரஸ் ஆட்சிக் காலத்தில் ‘வந்தே மாதரம்’ பாடலுக்கு உரிய அங்கீகாரம் வழங்கப்படவில்லை என்றும், தற்போதைய அரசு தேசியப் பாடலுக்கு உரிய கௌரவத்தை மீட்டெடுத்துள்ளது என்றும் அமைச்சர் சுட்டிக்காட்டினார்.

• எதிர்க்கட்சிகளின் கோரிக்கை மற்றும் திருத்தங்கள்: எதிர்க்கட்சிகள் முன்மொழிந்த பல திருத்தத் தீர்மானங்கள் குரல் வாக்கெடுப்பு மூலம் நிராகரிக்கப்பட்டன.

3. கனிமொழி காட்டம்: “ஜனநாயக மரபுகள் புல்டேசர்!”

நாடாளுமன்றத்தில் பேசிய திமுக குழுத் தலைவரும் துணைப் பொதுச் செயலாளருமான கனிமொழி கருணாநிதி, தேசியவாதம் என்ற பெயரில் கொண்டு வரப்படும் இச்சட்டம் கூட்டாட்சி தத்துவத்திற்கும் நாட்டின் மதச்சார்பின்மைக்கும் எதிரானது எனக் கூறித் தங்கள் எதிர்ப்பைப் பதிவு செய்தார். தேசியப் பாடலை மக்கள் மீது கட்டாயப்படுத்தித் திணிக்க முடியாது என்றும், தேசத்தை உருவாக்கிய தலைவர்கள் இரு பத்திகளுடன் முடித்துக்கொண்ட விவேகத்திற்கு மாறாக, ஆறு பத்திகளையும் பாடாவிட்டால் கிரிமினல் குற்றம் எனச் சட்டமாக்குவது நாட்டைப் பிளவுபடுத்தும் செயல் என்றும் அவர் சாடினார். மேலும், தமிழ்நாடு உள்ளிட்ட மாநிலங்களின் தனித்துவமான மாநிலப் பாடல்களின் முக்கியத்துவத்தைச் சுட்டிக்காட்டிய அவர், மக்கள் மீதும் மாநில உரிமைகள் மீதும் இத்தகைய பாடல்களைத் திணிப்பதன் மூலமும், ஜனநாயக மரபுகளை மீறி முறையான விவாதங்கள் இன்றி அமளிக்கு நடுவே மசோதாவை நிறைவேற்றுவதன் மூலமும் ஒன்றிய அரசே நாட்டைப் பிளவுபடுத்தும் தேசவிரோதச் செயலில் ஈடுபடுவதாகக் கடுமையாகக் குற்றம்சாட்டி, இம்மசோதாவை திமுக முற்றிலுமாக எதிர்ப்பதாகத் தெரிவித்தார்.

4. ஆவேசமடைந்த ஆ. ராசா MP: அவையில் கண்டனப் போராட்டம்

எதிர்க்கட்சிகளின் கோரிக்கைகள் மற்றும் திருத்தங்கள் நிராகரிக்கப்பட்டதால் அவை வளாகத்தில் பெரும் அமளி ஏற்பட்டது.

• திமுக எம்பி ஆ. ராசா (A. Raja), மசோதா நிறைவேற்றப்பட்ட விதத்திற்கும், எதிர்க்கட்சிகளின் குரல் ஒடுக்கப்படுவதற்கும் எதிர்ப்பு தெரிவித்துத் தாம் வைத்திருந்த ஆவணங்களைக் கிழித்து அவையின் மையப்பகுதி (Well of the House) நோக்கி வீசியெறிந்தார்.

• எதிர்க்கட்சி உறுப்பினர்களின் தொடர் முழக்கங்கள் மற்றும் அமளி காரணமாக அவை நடவடிக்கைகள் ஒத்திவைக்கப்பட்டன.

5. வரலாற்று முக்கியத்துவம் மற்றும் சர்ச்சைகள்

‘வந்தே மாதரம்’ பாடல் உருவாக்கப்பட்டு 150 ஆண்டுகள் நிறைவடையும் கொண்டாட்டங்களின் ஒரு பகுதியாக இச்சட்டம் கொண்டுவரப்பட்டுள்ளதாக அரசு தரப்பில் தெரிவிக்கப்பட்டது.

இருப்பினும், இச்சட்டம் கருத்துச் சுதந்திரத்தைப் பாதிக்கும் என்றும், அரசியல் ரீதியாகப் பயன்படுத்தப்படக் கூடும் என்றும் எதிர்க்கட்சிகள் தங்களின் கவலையைத் தெரிவித்துள்ளன. ஆனாலும் ஒரு வழியாக நாடாளுமன்றத்தின் இரு அவைகளிலும் நிறைவேற்றப்பட்டுள்ள இச்சட்டம், குடியரசுத் தலைவரின் ஒப்புதலுக்குப் பிறகு அதிகாரப்பூர்வமாகச் சட்ட வடிவம் பெறவுள்ளது.

நிம்மி