செய்தியைக் கேட்க / Listen to News
மனித நாகரிகத்தின் தொடக்கத்திலிருந்தே, இனப்பெருக்கம் என்பதையும் தாண்டி, இரு மனங்களை இணைக்கும் பாலமாகவும், உடல் சார்ந்த உச்சகட்ட இன்பத்தைத் தரும் ஒரு கலையாகவும் செக்ஸ் (உடலுறவு) போற்றப்படுகிறது. உணர்ச்சிகளின் சங்கமமான உடலுறவில், ஒவ்வொரு தம்பதியினரின் விருப்பத்திற்கும் தேடலுக்கும் ஏற்ப பல வகைகள் உள்ளன. இயற்கையான யோனி வழி உறவு (Vaginal sex), ஆழமான அன்பைப் பரிமாறிக்கொள்ளும் முத்தங்கள் மற்றும் தீண்டல்கள், வாய்வழி உறவு (Oral sex), மற்றும் கைகளால் தூண்டப்படும் இன்பம் என உடலுறவு என்பது ஒரு பரந்து விரிந்த பெருங்கடல் போன்றது. இதில் ஒவ்வொரு வகைக்கும் தனித்துவமான உணர்வுகளும், அறிவியல் பின்னணிகளும் உள்ளன. நவீன யுகத்தில் உறவுகள் குறித்த பார்வைகள் மாறினாலும், இத்தனை வகைகளுக்குள்ளும் இன்றும் மிகவும் ரகசியமாகவும், ஒருவித தயக்கத்துடனும், அதே சமயம் அதிகப்படியான தேடலுடனும் பார்க்கப்படும் ஒரு விஷயம் ‘அனல் செக்ஸ்’ எனப்படும் ஆசனவாய் வழி உறவு. சமூகம் இதை ஒரு ‘டேபூ’ (Taboo) என விலக்கி வைத்தாலும், பல தம்பதியினரின் அந்தரங்க வாழ்க்கையில் இது ஒரு தவிர்க்க முடியாத அங்கமாகவே இருந்து வருகிறது. பொதுவாக இது குறித்த அறிவியல் பூர்வமான விவாதங்கள் பொதுவெளியில் மிகக் குறைவாகவே நடக்கின்றன. ஆனால், முறையான புரிதலும், துணையின் சம்மதமும் இருந்தால் மட்டுமே சாத்தியப்படக்கூடிய இந்த உறவு முறை குறித்து நிலவும் சமூகத் தடைகள் மற்றும் அதிலுள்ள அறிவியல் உண்மைகளை விரிவாகப் பார்ப்போமா?
ஆய்வுகள் எதை நோக்கி இருக்கின்றன?
இதுவரை ஆசனவாய் வழி உறவு குறித்து நடத்தப்பட்ட பெரும்பாலான ஆய்வுகள் எச்.ஐ.வி (HIV) போன்ற நோய்த்தொற்றைத் தடுப்பது எப்படி என்பதை நோக்கியே அமைந்துள்ளன. ஆனால், ஒரு பெண்ணின் பார்வையில் அல்லது ஒரு தம்பதியின் இன்பத்தைப் (Sex-positive perspective) பகிரும் நோக்கில் மிகக் குறைந்த அளவே ஆய்வுகள் செய்யப்பட்டுள்ளன. ஊடகங்களும் பாப்-கல்ச்சரும் (Popular culture) இதனை ஒரு ‘இயல்பற்ற’ செயலாகவே இன்றும் சித்தரித்து வருகின்றன.
இது இயல்பானதா? புள்ளிவிவரங்கள் என்ன சொல்கின்றன?
சமூகத்தில் நிலவும் வெட்கம் மற்றும் தயக்கம் காரணமாக, பலர் இதில் ஈடுபடுவதைப் பற்றி வெளிப்படையாகப் பேசுவதில்லை. ஆனாலும்:
-
2015-ல் நடத்தப்பட்ட ஒரு மெட்டா-ஆய்வின்படி, 22% பெரியவர்கள் ஆசனவாய் வழி உறவில் ஒருமுறையாவது ஈடுபட்டுள்ளனர்.
-
திருமணமான அல்லது துணையுடன் வாழும் பெண்களில் சுமார் மூன்றில் ஒரு பங்கு (1/3) பெண்களுக்கு இதில் அனுபவம் இருப்பதாகத் தெரிகிறது.
பெண்கள் ஏன் இதில் ஈடுபடுகிறார்கள்?
20 பெண்களிடம் நடத்தப்பட்ட ஒரு ஆழமான நேர்காணலில் சில சுவாரசியமான தகவல்கள் கிடைத்துள்ளன:
-
ஆரம்பக்கால அச்சம்: பெரும்பாலான பெண்களுக்கு இது வலியைத் தரும் என்ற அச்சம் ஆரம்பத்தில் இருந்துள்ளது. குறிப்பாகப் போர்னோகிராபி (Pornography) படங்களைப் பார்ப்பதால் உண்டான பிம்பங்கள் இந்த அச்சத்திற்கு முக்கியக் காரணம்.
-
தூண்டுகோல்: துணையின் இன்பத்திற்காக, தனது சுய விருப்பம், புதிய விஷயங்களை ஆராயும் ஆர்வம் மற்றும் கர்ப்பத்தைத் தவிர்ப்பது போன்ற காரணங்களால் பெண்கள் இதில் ஈடுபடுகின்றனர்.
-
கட்டுப்பாடும் நம்பிக்கையும்: துணையுடன் அதிக நம்பிக்கையும், உறவில் தங்களுக்குப் போதிய அதிகாரமும் (Control) இருப்பதாக உணரும் பெண்கள் இதில் ஈடுபட அதிக ஆர்வம் காட்டுகிறார்கள்.
இன்பமும் உணர்வுகளும்
ஆய்வுகளின்படி, 19% பெண்கள் ஆசனவாய் வழி உறவின் மூலம் மட்டுமே உச்சகட்டத்தை (Orgasm) அடைவதாகத் தெரிவிக்கின்றனர்.
-
ஆசனவாயின் உட்பகுதியை விட வெளிப்புறம் மற்றும் ஆரம்பப் பகுதிகளில் ஏற்படும் தீண்டல்களையே பெரும்பாலான பெண்கள் விரும்புகின்றனர்.
-
சுமார் 26% பெண்கள் மட்டுமே முழுமையான ஊடுருவலை (Full penetration) விரும்புகிறார்கள்.
-
58% பெண்கள் இதில் இன்பம் இருப்பதாகக் கூறினாலும், ஆரம்பத்தில் ஏற்படும் அசௌகரியங்களைச் சரிசெய்து கொள்வதே இதில் முக்கியமானது எனத் தெரிவிக்கின்றனர்.
தடையே ஒரு ஈர்ப்பு!
ஆச்சரியமான விஷயம் என்னவென்றால், சமூகம் எதை ‘விலக்கப்பட்ட ஒன்று’ எனக் கருதுகிறதோ, அதுவே சிலருக்குக் கூடுதல் கிளர்ச்சியைத் தருகிறது. “இது ஒரு தடை செய்யப்பட்ட விஷயம்” என்ற எண்ணமே மனதளவில் அதிகத் தூண்டுதலைத் தருவதாகப் பல பெண்கள் ஒப்புக்கொண்டுள்ளனர். தனது துணையை முழுமையாக நம்பித் தன்னை ஒப்படைக்கும் ஒரு செயலாகவும் இது பார்க்கப்படுகிறது.
சமிக்ஞை
ஆசனவாய் வழி உறவு என்பது மற்ற உறவு முறைகளை விட முற்றிலும் மாறுபட்டது. இதில் வலியைத் தவிர்த்து இன்பத்தைக் கண்டடைய துணைகளுக்கு இடையே தெளிவான புரிதல் (Communication) மற்றும் ஒருவருக்கொருவர் தேவைகளை மதிக்கும் குணம் அவசியம். வலி என்பது அந்த உறவை நிறுத்துவதற்கான அல்லது மாற்றியமைப்பதற்கான ஒரு எச்சரிக்கைச் சமிக்ஞையாகக் கொள்ளப்பட வேண்டும்.
டாக்டர்.ரமாபிரபா
