விலங்குகளின் கண்களில் உலகைப் பார்ப்போம்:உலக விலங்கு நாள் சிறப்புக் கட்டுரை!

பூமி மனிதர்களுக்கு மட்டும் சொந்தமானதல்ல; இந்த அகிலத்தில் நம்மோடு இணைந்து வாழும் கோடிக்கணக்கான உயிரினங்களின் மூச்சும் இரத்தமும் சேர்ந்தே இயற்கையின் சமநிலையைத் தாங்கிப் பிடிக்கின்றன. அந்த உண்மையை உலகிற்கு உரக்கச் சொல்லவும், விலங்குகளின் நலனைப் பாதுகாக்கவும் ஒவ்வொரு ஆண்டும் அக்டோபர் 4 ஆம் தேதி உலக விலங்குகள் தினம் அனுசரிக்கப்படுகிறது. மனிதனுக்கும் பிற உயிரினங்களுக்குமான பிணைப்பை வலுப்படுத்த வேண்டிய இந்தத் தருணம், அவற்றுக்கு இழைக்கப்படும் இன்னல்களுக்கு எதிராகவும், அவற்றின் வாழ்வுரிமைக்காகவும் குரல் கொடுக்கும் நாளாகப் பார்க்கப்படுகிறது.

வரலாற்றுப் பின்னணியும் அக்டோபர் 4 இன் முக்கியத்துவமும்

இந்த சர்வதேச நிகழ்வுக்கான விதை முதன்முதலில் மார்ச் 24, 1925 அன்று ஜெர்மனியின் பெர்லினில் சினாலஜிஸ்ட் ஹென்ரிச் சிம்மர்மேன் என்பவரால் தூவப்பட்டது. மனிதர்களால் புறக்கணிக்கப்படும் விலங்குகளின் குரலற்ற நிலையை உலகறியச் செய்ய அவர் இந்த நாளைத் தேர்ந்தெடுத்தார். பின்னர், 1931 ஆம் ஆண்டு மே மாதம் இத்தாலியின் புளோரன்ஸ் நகரில் நடைபெற்ற சர்வதேச விலங்குகள் பாதுகாப்பு காங்கிரஸ் மாநாட்டில் அக்டோபர் 4 ஆம் தேதி அதிகாரப்பூர்வமாக உலக விலங்குகள் தினமாக ஏற்றுக்கொள்ளப்பட்டது. இயற்கை ஆர்வலரும் விலங்குகளின் பாதுகாவலராகப் போற்றப்படும் பிரான்சிஸ் அசிசி என்பவரின் நினைவு நாள் அக்டோபர் 4 இல் வருவதால், இந்நாள் இந்த வரலாற்றுச் சிறப்புமிக்க நாளாகத் தேர்ந்தெடுக்கப்பட்டது குறிப்பிடத்தக்கது.

அவர்களின் கண்களால் உலகைப் பாருங்கள்: 2026 இன் மையக்கருத்து

ஒவ்வொரு ஆண்டும் ஒரு குறிப்பிட்ட நோக்கோடு அனுசரிக்கப்படும் இந்த நாளுக்கு, 2026 ஆம் ஆண்டில் மிக முக்கியமான ஒரு தீம் நிர்ணயிக்கப்பட்டுள்ளது. “See the World Through Their Eyes” (அவர்களின் கண்களால் உலகைப் பாருங்கள்) என்பதே இந்த ஆண்டின் அதிகாரப்பூர்வ மையக்கருத்து ஆகும். உலக விலங்குகள் அமைப்பான நேச்சர்வட்ச் ஃபவுண்டேஷன் (Naturewatch Foundation) இந்தத் தீமை கடந்த 2026 மார்ச் 19-இல் அறிவித்தது. உலகெங்கிலும் இருந்து வந்த நூற்றுக்கணக்கான பரிந்துரைகளிலிருந்து இங்கிலாந்தைச் சேர்ந்த சோய் (Zoe) என்பவரின் சிந்தனை இதற்குத் தேர்ந்தெடுக்கப்பட்டது. மனித மையப் பார்வையைத் தாண்டி, காலநிலை மாற்றத்தால் விலங்குகள் எதிர்கொள்ளும் துயரங்களை அவற்றின் பார்வையில் உணர்வதே இதன் அடிநாதமாகும்.

கடல்சார் உயிரினங்களின் பாதுகாப்பு மற்றும் கோரல் ட்ரையாங்கிள்

இந்த ஆண்டுக்கான அதிகாரப்பூர்வ வடிவமைப்பு பப்புவா நியூ கினியைச் சுற்றியுள்ள புகழ்பெற்ற கோரல் ட்ரையாங்கிள் (Coral Triangle) பகுதியை அடிப்படையாகக் கொண்டது. காலநிலை மாற்றம், கடல் வெப்பமடைதல் மற்றும் மனித நடவடிக்கைகளால் கடல்வாழ் உயிரினங்கள் எவ்வாறு கடுமையாகப் பாதிக்கப்படுகின்றன என்பதை இது வெளிச்சம் போட்டுக் காட்டுகிறது. நிலத்தில் காடழிப்பு, பிளாஸ்டிக் மாசுபாடு மற்றும் ஆழ்கடலில் நடக்கும் அழித்தொழிப்புச் செயல்பாடுகள் ஆகியவை வனவிலங்குகளின் இயற்கை வாழ்விடங்களை மிக வேகமாகச் சுருக்கி வருகின்றன. சக உயிர்களின் வலிகளை மனித சமூகம் உணரத் தவறினால், அது ஒட்டுமொத்த உயிரினச் சங்கிலியின் வீழ்ச்சிக்கு வழிவகுக்கும்.

செயல்பட வேண்டிய தருணம்

விலங்குகள் வெறும் வளர்ப்புப் பொருட்களோ அல்லது இயற்கையின் அலங்காரமோ அல்ல; அவை நம் சுற்றுச்சூழல் அமைப்பின் அடிப்படையான தூண்கள். இன்று நாம் வாழும் இந்த பூமியை எதிர்கால சந்ததிக்கும் பாதுகாப்பானதாக விட்டுச் செல்ல வேண்டுமானால், விலங்குகளின் மீதான கரிசனையையும் அவற்றின் வாழ்விடப் பாதுகாப்பையும் நாம் உறுதி செய்ய வேண்டும். இயற்கையின் குரலை மதிக்கத் தொடங்கும் நாள்தான் மனிதகுலத்தின் உண்மையான வளர்ச்சிப் படியாகும்.

நிலவளம் ரெங்கராஜன்