பெஸ்டியா? பாப்புலர் குரூப்பா?-பதின்ம வயதினரை ஆட்டிப்படைப்பது யார்?

பதின்ம வயதில் (Adolescence) நுழையும் சிறுவர்களுக்குப் பெற்றோர்களை விட நண்பர்களின் ஆதிக்கமே அதிகமாக இருக்கும். “யார் சொல்வதைக் கேட்பது?” என்கிற குழப்பம் அவர்களுக்கு ஒருபுறம் இருந்தாலும், உண்மையில் அவர்கள் ஒவ்வொரு விஷயத்திற்கும் ஒவ்வொருவரைத் தேடுகிறார்கள் என்பதை அமெரிக்காவின் புளோரிடா அட்லாண்டிக் பல்கலைக்கழகம் (FAU) நடத்திய புதிய ஆய்வு நிரூபித்துள்ளது.

நட்பு என்பது ஒரே மாதிரியான அழுத்தம் தரும் விஷயம் அல்ல; அது மிகவும் நுணுக்கமானது என்பதை 543 மாணவர்களைக் கொண்டு நடத்தப்பட்ட இந்த ஆய்வு விளக்குகிறது.

இருவேறு உலகம்: அந்தரங்கம் மற்றும் பொதுவெளி

டீனேஜர்களின் உலகத்தை இரண்டு சந்தைகளாகப் பிரிக்கலாம் என்கிறார் இந்த ஆய்வின் முதன்மை ஆய்வாளர் டாக்டர் மேரி பேஜ் லெக்கெட்-ஜேம்ஸ். ஒன்று “அந்தரங்க நாணயம்” (Private Currency), இன்னொன்று “பொதுச் சந்தை” (Public Market).

1. நெருங்கிய நண்பர்கள்: மனதின் வழிகாட்டிகள்

உங்களுடைய பிள்ளை ஒரு பெஸ்டியை (Best Friend) வைத்திருக்கிறார் என்றால், அந்த நண்பர்தான் பிள்ளையின் மனநிலை மற்றும் படிப்பைத் தீர்மானிக்கிறார்.

• உணர்ச்சிக் குவியல்: மன அழுத்தம், பதற்றம், தெளிவில்லாத மனநிலை போன்ற அந்தரங்க உணர்வுகளில் நெருங்கிய நண்பர்களின் தாக்கம் அதிகம்.

• படிப்பில் அக்கறை: பள்ளியில் சரியாகப் படிக்காமல் போவதற்கும் அல்லது படிப்பில் சாதிப்பதற்கும் இந்த நெருங்கிய நண்பர்களே காரணம்.

• பனிப்பந்து விளைவு (Snowball Effect): நெருங்கிய நண்பர்களுக்குள் ஒருவருக்கு மனக்கவலை இருந்தால் அது மற்றவருக்கும் எளிதில் தொற்றிக்கொள்ளும். ஒரு நண்பர் பள்ளியை வெறுத்தால், மற்றவரும் அதை அப்படியே பின்பற்றும் அபாயம் இதில் உள்ளது.

2. பிரபலமான மாணவர்கள்: வெளித்தோற்றத்தின் எஜமானர்கள்

பள்ளியில் ‘கெத்தாக’ வலம் வரும் பிரபலமான (Popular) மாணவர்களைத் தங்களுக்கு நெருக்கமான நண்பர்களாக இல்லாவிட்டாலும் டீனேஜர்கள் பின்தொடர்கிறார்கள்.

• சமூக வலைதளப் பயன்பாடு: இன்ஸ்டாகிராமில் என்ன போட வேண்டும், எந்தப் புகைப்படத்திற்கு அதிக லைக் கிடைக்கும் என்பதைப் பிரபலமான மாணவர்களைப் பார்த்தே டீனேஜர்கள் முடிவு செய்கிறார்கள்.

• உடல் எடை மற்றும் தோற்றம்: உடல் மெலிதாக இருக்க வேண்டும், குறிப்பிட்ட உடைகளை அணிய வேண்டும் என்ற எண்ணத்தை உருவாக்குவது இந்த ‘பாப்புலர்’ குழுதான்.

• அங்கீகாரம் தேடுதல்: சமூகப் படிநிலையில் தங்களை உயர்த்திக் காட்டிக் கொள்ள, மனதிற்குப் பிடிக்காவிட்டாலும் பிரபலமானவர்கள் செய்யும் விஷயங்களை இவர்கள் அப்படியே நகல் எடுக்கிறார்கள்.

பெற்றோர்கள் மற்றும் ஆசிரியர்களுக்கான எச்சரிக்கை

இந்த ஆய்வு முடிவுகள் ஒரு முக்கியமான விஷயத்தை உரக்கச் சொல்கின்றன. “பீர் பிரஷர்” (Peer Pressure) என்றாலே அது ஏதோ ஒரே இடத்தில் இருந்து வருவது போல நாம் நினைக்கிறோம். ஆனால் அது தவறு.

1. பிரச்சனையைத் துல்லியமாக அடையாளம் காணுங்கள்: உங்கள் பிள்ளைக்கு மன ரீதியான பாதிப்பு அல்லது படிப்பில் மந்தநிலை இருந்தால், அவர்களின் நெருங்கிய நண்பர்களுடனான உறவை கவனிக்க வேண்டும். அவர்களை நண்பர்களிடமிருந்து பிரிப்பதை விட, ஆரோக்கியமான நட்பு வட்டத்தை உருவாக்க உதவ வேண்டும்.

2. சமூக வலைதளப் போதை: சமூக வலைதளப் பயன்பாடு அல்லது உடல் தோற்றம் சார்ந்த தாழ்வு மனப்பான்மை இருந்தால், அது பள்ளியில் உள்ள பொதுவான சூழலால் (Popular norms) வருகிறது என்பதைப் புரிந்துகொள்ள வேண்டும்.

3. முன்மாதிரிகள் தேவை: பள்ளியில் பிரபலமான மாணவர்கள் ஆரோக்கியமான பழக்கவழக்கங்களைக் கடைப்பிடித்தால், அது மற்ற மாணவர்களிடம் மிகப்பெரிய நேர்மறை மாற்றத்தை உருவாக்கும்.

பதின்ம வயதினர் குருட்டுத்தனமாக யாரையும் பின்பற்றுவதில்லை. அவர்கள் தங்களின் சமூகத் தேவைகளுக்கேற்ப மிகவும் புத்திசாலித்தனமாக தங்களைச் சுற்றியுள்ளவர்களிடமிருந்து தகவல்களைப் பெறுகிறார்கள். உணர்வுகளுக்கு பெஸ்டியும், பகட்டுக்கு பாப்புலர் மாணவர்களும் அவர்களுக்குத் தேவைப்படுகிறார்கள்.