60% இளைஞர்களுக்கு மன பாதிப்பு: இந்தியாவின் எதிர்காலத்திற்கு விழுந்த ‘மன’ இடி!

இந்தியாவின் வருங்காலத் தூண்களாகக் கருதப்படும் இளைஞர்கள், இன்று கண்ணுக்குத் தெரியாத ஒரு பெரும் போரில் சிக்கியுள்ளனர். அதுதான் ‘மன அழுத்தம்’. டெல்லியில் நடைபெற்று வரும் இந்திய மனநல மருத்துவ சங்கத்தின் 77-வது தேசிய மாநாட்டில் சமர்ப்பிக்கப்பட்ட அறிக்கை, இந்தியாவின் மனநலச் சூழல் எவ்வளவு அபாயகரமாக உள்ளது என்பதைப் புள்ளிவிவரங்களுடன் அம்பலப்படுத்தியுள்ளது. இது வெறும் தனிப்பட்ட பிரச்சனை அல்ல; ஒரு தேசத்தின் எதிர்காலத்தையே அச்சுறுத்தும் பொதுச் சுகாதார அவசரநிலையாக (Public Health Emergency) உருவெடுத்துள்ளது.

அதிர்ச்சி தரும் புள்ளிவிவரங்கள்:

மாநாட்டில் தாக்கல் செய்யப்பட்ட அறிக்கையின்படி, மனநலப் பாதிப்புகள் மிக இளம் வயதிலேயே வேர்விடத் தொடங்குகின்றன:

• 14 வயதிற்குள்: 34.6 சதவீதத்தினருக்கு மன அழுத்தப் பிரச்சனைகள் தொடங்கிவிடுகின்றன.

• 18 வயதிற்குள்: பாதிப்பு 48.4 சதவீதமாக உயர்கிறது.

• 25 வயதிற்குள்: 62.5 சதவீத இளைஞர்கள் ஏதோ ஒரு வகையில் மனநலப் பாதிப்புக்கு உள்ளாகிறார்கள்.

மிக முக்கியமாக, கடந்த பத்தாண்டுகளில் (2011 – 2021) 18 முதல் 25 வயதுக்குட்பட்டவர்களிடையே மன உளைச்சல் 101.7 சதவீதம் என்ற அசுர வேகத்தில் அதிகரித்துள்ளது கவலைக்குரியது.

இளமையைச் சிதைக்கும் காரணிகள் யாவை?

இளைஞர்கள் எதிர்கொள்ளும் இந்த மனநலச் சவால்களுக்குப் பின்னால் பல சமூக மற்றும் தனிப்பட்ட காரணங்கள் அடுக்கி வைக்கப்பட்டுள்ளன:

1. கல்வி மற்றும் வேலைவாய்ப்பு: அதீத கல்வி அழுத்தம் மற்றும் எதிர்கால வேலைவாய்ப்பு குறித்த நிச்சயமற்ற தன்மை.

2. டிஜிட்டல் அடிமைத்தனம்: செல்போன்களின் அதிகப்படியான பயன்பாடு மற்றும் சமூக வலைத்தளங்களால் ஏற்படும் தனிமை உணர்வு.

3. போதைப்பொருள் கலாச்சாரம்: தீர்க்கப்படாத உணர்ச்சி ரீதியான வலிகளுக்குப் போதைப்பொருட்களில் தீர்வு தேடும் அவலம்.

4. சமூகத் தனிமை: மனித உறவுகளில் ஏற்படும் விரிசல் மற்றும் உரையாடல்கள் குறைந்த இயந்திரத்தனமான வாழ்க்கை.

தற்கொலை: ஒரு கசப்பான உண்மை

உலக சுகாதார அமைப்பின் (WHO) கூற்றுப்படி, 15 முதல் 29 வயதுக்குட்பட்டவர்களின் மரணத்திற்கு மனநலப் பிரச்சனைகள் மூன்றாவது முக்கிய காரணமாக உள்ளன. சவால்களைச் சமாளிக்க முடியாத மனநிலை, அவர்களைத் தற்கொலை என்ற தவறான முடிவை நோக்கித் தள்ளுகிறது.

உடல் ரீதியான பாதிப்புகள்:

மன அழுத்தம் என்பது வெறும் மனதோடு முடிந்துவிடுவதில்லை; அது உடலையும் சிதைக்கிறது:

• பெண்கள்: ஹார்மோன் மாற்றங்கள் மற்றும் பல்வேறு உடல் ரீதியான பாதிப்புகளுக்கு உள்ளாகிறார்கள்.

• ஆண்கள்: உயர் ரத்த அழுத்தம் மற்றும் மாரடைப்பு போன்ற இதய நோய்கள் ஆண்களை அதிகம் தாக்குகின்றன.

ஆந்தை ரிப்போர்ட்டர் எச்சரிக்கை:

மன அழுத்தப் பிரச்சனைகளுக்குச் சரியான நேரத்தில் சிகிச்சை அளிக்கப்படாவிட்டால், அவை வாழ்நாள் முழுவதும் தொடரும் நீண்ட கால நோய்களாக மாறிவிடும். இது தனிமனித பாதிப்பு மட்டுமல்ல; ஒரு நாட்டின் சமூக மற்றும் பொருளாதாரச் சங்கிலியையே பாதிக்கும். பள்ளி மற்றும் கல்லூரி மாணவர்களின் செல்போன் பயன்பாட்டைக் கட்டுப்படுத்துவதும், அவர்களுக்குத் தேவையான மனநல ஆலோசனைகளைத் தடையின்றி வழங்குவதும் காலத்தின் கட்டாயம்.

நிலவளம் ரெங்கராஜன்