🙏“அனந்தா” திரைப்பட இசை & டிரெய்லர் வெளியீட்டு விழா: ஆன்மீகப் பயணத்தின் அற்புதம்!

MISHRI ENTERPRISES சார்பில் கிரிஷ் கிருஷ்ணமூர்த்தி தயாரிப்பில், இயக்குநர் சுரேஷ் கிருஷ்ணா இயக்கத்தில் உருவாகியுள்ள, சத்ய சாய் பாபாவின் வாழ்க்கைப் பின்னணியைக் கொண்ட “அனந்தா” திரைப்படத்தின் இசை வெளியீட்டு விழா சென்னையில் பிரம்மாண்டமாக நடைபெற்றது. தேனிசைத் தென்றல் தேவா இசையமைத்துள்ள இப்படத்தில் ஜெகபதிபாபு, சுகாசினி, YG மகேந்திரன், தலைவாசல் விஜய் உள்ளிட்டோர் நடித்துள்ளனர்.

விழாவில் படக்குழுவினர் பகிர்ந்த ஆன்மீகம் மற்றும் சினிமா அனுபவங்களின் தொகுப்பு இதோ:

🌟 அனந்தா: வெறும் படைப்பல்ல, இறை படைப்பு!

பாடலாசிரியர் பா. விஜய்: “அனந்தா என்பது ஒரு திரைப்படைப்பு அல்ல, ஒரு இறை படைப்பு. என்னுடைய திரைப்பயணத்தில் இறைவனைப் பற்றி நிறைய எழுதியுள்ளேன். ஆனால், நேரடியாக இறைவனுக்கே எழுதிய பாடல் என்றால் அது இந்த படத்தில் தான். தேவா இசையில் வந்த ‘கருப்புதான் எனக்குப் பிடிச்ச கலரு’ பாடல் எப்படி என் திரைப் பயணத்தில் திருப்புமுனையோ, அதேபோல் இந்தப் படம் அவருடன் ஒரு முழுக்க முழுக்க ஆன்மீகப் பயணமாக அமைந்தது. ஒரு இறைவன் ஒரு மனிதரிடம் பேசும் காட்சிக்கு வசனம் எழுதுவதுதான் மிகப்பெரிய சவாலாக இருந்தது. தயாரிப்பாளர் கிரிஷ் அவர்கள் பாபாவை வணங்குபவர் மட்டுமல்ல, அவருடன் வாழ்ந்து கொண்டிருக்கிறார் என்பதை ஆன்மீகச் சுற்றுப்பயணம் சென்றபோது உணர்ந்தேன். இது ஒரு காலத்தின் பதிவு.”

இயக்குனர் சுரேஷ் கிருஷ்ணா: “சாய்ராம். இந்தப் ப்ராஜெக்ட்டை சாத்தியப்படுத்திய கிரிஷ் அவர்களுக்கு நன்றி. நான் மிகவும் ஆசீர்வதிக்கப்பட்டதாக உணர்கிறேன். நான் கமர்சியல் படம் எடுப்பவன். ஆனால், சாய்பாபா பற்றிப் படம் எடுக்கச் சொல்லி, அதுவும் கமர்சியலாக இருக்க வேண்டும் என்றார்கள். 2009-ல் புட்டபர்த்தி சென்றபோது பாபா என்னிடம், ‘இத்தனை வருடமாக எங்கிருந்தாய்?’ என்று கேட்டார்கள். அந்த இடத்தில் அழுதுவிட்டேன். அதன் பிறகு, ஒரு சில வருடங்களுக்கு முன்பு அதிகாலை கனவில் பாபா தோன்றினார். ஒரு மணி நேரத்தில் மொத்தக் கதையையும் எழுதி முடித்துவிட்டேன். இப்படத்தில் ஒவ்வொரு காட்சி எடுக்கும் போதும் அதிசயத்திற்கு மேல் அதிசயம் நடந்தது. தேவா பத்து நிமிடத்தில் ஒரு பாடலை இசையமைத்துக் கொடுத்தார். இது பாபாவின் அருளால் ஒரு அருமையான டீம் அமைந்த படைப்பு.”

🙏 குரு பக்தி மற்றும் ஆசீர்வாதம்

இயக்குனர் லிங்குசாமி: “சுரேஷ் கிருஷ்ணா சார் ‘சத்யா’ படத்தை இயக்கினார், பிறகு ‘பாபா’ படத்தை இயக்கினார். தற்போது சத்ய பாபாவை பற்றி எடுத்துள்ளார். அவர் எதை தொட்டாலும் அழகாக அமையும். அவர் கமர்சியல் ரீதியாகவும் இந்தப் படத்தை சிறப்பாகக் கையாண்டுள்ளார். இதுபோல ஒரு பெரிய முயற்சி எடுக்கப் பெரிய மனது வேண்டும். நான் அவருடைய தீவிர ரசிகன்.”

தயாரிப்பாளர் எஸ். தாணு: “கிட்டத்தட்ட 65 வருடங்களுக்கு முன்பு சென்னையில் சத்ய சாய்பாபா அவர்களைப் பார்த்து ஆசி பெற்றேன். ‘கொடுத்துக் கொடுத்து சிவந்த கரம்’ என்ற சொல்லுக்கு உதாரணம் பாபா அவர்கள் தான். சுரேஷ் கிருஷ்ணா அவர்களின் பாதம் தொட்டு வணங்க வேண்டும். தேவா மற்றும் பா. விஜய் அவர்களின் பணி மிகச் சிறந்தது. இந்தப் படம் மிகப்பெரிய வெற்றியடையும், கடவுள் நிச்சயம் அருள் புரிவார்.”

நடிகர் சித்ரா லட்சுமணன்: “பாட்ஷா, அண்ணாமலை போன்ற படங்களை இயக்கிய சுரேஷ் கிருஷ்ணா அவர்களை ‘அனந்தா’ படத்திற்கு எப்படித் தேர்வு செய்தார்கள் என்று யோசித்தேன். தன்னுடைய குருவான பாலச்சந்தர் மீது அதிக மதிப்பு வைத்தவர் என்பதால் தான், இந்த குருவைப் பற்றிய படத்தை இயக்கும் வாய்ப்பு அவருக்குக் கிடைத்தது. சினிமாவின் சூப்பர் ஸ்டாரையும், ஆன்மீகத்தின் சூப்பர் ஸ்டாரையும் இயக்கும் அதிர்ஷ்டம் அவருக்குக் கிடைத்துள்ளது. தேவா போன்ற நல்ல உள்ளம் கொண்ட இசையமைப்பாளரைப் பார்ப்பது அரிது.”

✨ உணர்வுகளும் நம்பிக்கையும்

நடிகை சுகாசினி மணிரத்னம்: “இந்தக் கதையைப் பற்றி சுரேஷ் கிருஷ்ணா சொன்ன போதும், படத்தில் பணியாற்றிய போதும் ஒரு மாய வலையில் இருந்து விலகித் தூய்மை கிடைத்தது போல் உணர்வு ஏற்பட்டது. இந்த கதை மக்களிடம் சென்று சேர வேண்டும். இந்தப் படம் முழுக்கவே ஒரு ஆன்மீக அதிர்வலை இருந்தது.”

நாயகி அபிராமி வெங்கடாசலம்: “எனக்கு இந்த வாய்ப்பை வியாழக்கிழமைதான் பாபா கொடுத்தார். டான்ஸ் ஆட வேண்டியிருந்தது, இரண்டு வருடமாக நான் ஆடியதில்லை. இருப்பினும் அனைவரும் எனக்கு ஊக்கமளித்தனர். இந்த வாய்ப்புக்கு நான் நன்றி உடன் உள்ளேன்.”

இசையமைப்பாளர் தேவா: “உலகம் முழுவதும் கோடிக்கணக்கான பக்தர்கள் சாய்பாபாவுக்கு உள்ளனர். அவருடைய படத்திற்கு நான் இசையமைக்கும் பாக்கியம் எனக்குக் கிடைத்தது பூர்வ ஜென்மத்து பாக்கியம். ரீ ரெக்கார்டிங் பணிக்காகப் படத்தைப் பார்த்தபோது, யாரும் நடிக்கவில்லை, அனைவரும் அந்தக் கதாபாத்திரமாகவே மாறி உள்ளனர் என்று புரிந்தது. வியாழக்கிழமை அன்று இசைப்பணிகளை ஆரம்பித்தோம். இந்த படம் பாபாவின் அருளால் மிகப்பெரியதாக வளர்ந்துள்ளது.”

பாடகர் மனோ: “சிறு வயதில் சாய்பாபா நாடகத்திற்குச் சென்று, பாபா அவர்கள் ஏதாவது கையில் கொடுக்க மாட்டாரா என்று ஆசைப்பட்ட பக்தர்களில் நானும் ஒருவன். இந்த படத்தில் எனக்குப் பாடுவதற்கு வாய்ப்பளித்ததற்கு நன்றி.”

தயாரிப்பாளர் கிரிஷ்: “இந்த படத்தின் முழு பயணமும் ஒரு அதிசயம் தான். எல்லாம் அதுவாக நடந்தது. இந்த படம் கோடிக்கணக்கான சாய்பாபா பக்தர்களுக்கு ஒரு பதிலாக இருக்கும். 150 நாடுகளுக்கு மேல் உள்ள மக்கள் சாய்பாபாவை வணங்குகிறார்கள். இந்த படத்தை பார்த்த பிறகு அவரைப் பற்றித் தெரியாதவர்களும் தெரிந்து கொள்ள விரும்புவார்கள்.”