‘தீம் பார்க்குகளின் முன்னோடி சாண்ட்டா க்ளாஸ் லேண்ட் உருவான நாளின்று’!

அமெரிக்காவில் பொழுதுபோக்கு பூங்காக்களின் வரலாறு மிகவும் சுவாரஸ்யமானது. 1133-இல் லண்டனில் தொடங்கிய ‘பார்த்தலேமு ஃபேர்’ போன்ற பொருட்காட்சிகளும், 1583-இல் லண்டனில் உருவான ‘பேக்கன்’ போன்ற மனமகிழ் தோட்டங்களும் தற்கால கேளிக்கைப் பூங்காக்களுக்கான அடிப்படைகளை உருவாக்கின. 1800களின் பிற்பகுதியில், தொழிற்துறை வளர்ச்சி மற்றும் நீராவியால் இயங்கும் இயந்திர ராட்டினங்களின் கண்டுபிடிப்புகளால் இந்தப் பொழுதுபோக்கு மையங்கள் மேலும் வளர்ச்சி பெற்றன.

1860களுக்குப் பிறகு, அமெரிக்கத் தொழிலாளர்களின் பணிநேரம் குறைந்து, அவர்களுக்கு செலவழிக்கப் போதுமான ஊதியமும் கிடைத்ததால், பொழுதுபோக்கு மையங்களுக்குச் செல்லத் தொடங்கினர். 1895-இல் கோனி தீவில், ஒரே நிறுவனத்திற்குச் சொந்தமான நிரந்தர பொழுதுபோக்கு வளாகம் அமைக்கப்பட்டபோது, நுழைவுக் கட்டணத்துடன் ஒவ்வொரு சவாரிக்கும் தனித்தனியாக கட்டணம் செலுத்தும் முறை அறிமுகப்படுத்தப்பட்டது.

சிக்காகோவில் 1893-ஆம் ஆண்டு நடைபெற்ற உலகக் கண்காட்சி (Chicago World’s Columbian Exposition) இந்த அமைப்பை மாற்றியது. அது, பொழுதுபோக்கு, சவாரிகள் மற்றும் கடைகளை ஒருங்கிணைத்து, மக்களை அதிக அளவில் ஈர்க்கும் ஒரு புதிய மாதிரியை உருவாக்கியது. இதன் பிறகு, 1880களில் கோனி தீவில் இருந்த “ஸ்டீப்பிள்சேஸ் பார்க்” போன்ற பூங்காக்கள், எப்போதும் புதிய சவாரிகளை அறிமுகப்படுத்தி மக்களின் ஆர்வத்தைத் தக்கவைத்துக்கொண்டன. “ட்ரீம்லேண்ட் பார்க்” போன்ற பூங்காக்கள், வெறும் சவாரிகளைத் தாண்டி, நாடக நிகழ்ச்சிகள் மற்றும் பல்வேறு கலை நிகழ்ச்சிகளையும் நடத்தி மக்களின் பொழுதுபோக்கை அடுத்த கட்டத்திற்கு எடுத்துச் சென்றன.

சான்டா லேண்ட்: உலகின் முதல் கருப்பொருள் பூங்கா

1940-களின் முற்பகுதியில், ஒன்பது குழந்தைகள் பெற்ற தொழிலதிபரான லூயிஸ் கோச் என்பவர், ஓய்வுபெற்றவர்களுக்கான குடியிருப்பு அமைக்க சான்டா கிளாஸ் என்ற நகரத்தில் 260 ஏக்கர் நிலத்தை வாங்கினார். அங்கு வரும் குழந்தைகள், சாண்டா கிளாஸை (கிறிஸ்துமஸ் தாத்தா) காணாமல் ஏமாற்றம் அடையக்கூடாது என்று கருதிய கோச், குழந்தைகளுக்காக சில விளையாட்டு அமைப்புகளை உருவாக்கத் தொடங்கினார். இரண்டாம் உலகப் போர் காரணமாகப் பணிகள் தடைபட்டதால், ஆகஸ்ட் 3, 1946 அன்றுதான் சான்டா லேண்ட் திறக்கப்பட்டது. இதுதான் உலகின் முதல் நவீன கருப்பொருள் பூங்கா (modern theme park) என்று கருதப்படுகிறது.

ஆரம்பத்தில் இந்தப் பூங்காவிற்கு கட்டணம் இல்லை. 1955-இல் புதிய அமைப்புகள் சேர்க்கப்பட்ட பிறகு நுழைவுக் கட்டணம் விதிக்கப்பட்டது. 1984-இல் இந்தப் பூங்காவின் பெயர் ‘ஹாலிடே வோர்ல்ட்’ என்று மாற்றப்பட்டது. 1993-இல் ஒரு வாட்டர் பார்க்கையும் (Splashin’ Safari) இணைத்த இந்தப் பூங்கா, இன்றும் அமெரிக்கக் குடும்பங்களுக்கு பிடித்தமான இடமாக உள்ளது.

டிஸ்னிலேண்ட் மற்றும் சிக்ஸ் ஃபிளாக்ஸ்

சான்டா லேண்டைத் தொடர்ந்து, வால்ட் டிஸ்னி தனது கதாபாத்திரங்களை அடிப்படையாகக் கொண்டு, 1955-இல் டிஸ்னிலேண்ட்-ஐ உருவாக்கினார். இது, திரைப்படம் மற்றும் பொழுதுபோக்கின் மாயாஜால உலகத்தை பூங்கா வடிவத்தில் கொண்டு வந்த முதல் முயற்சி. டிஸ்னிலேண்ட் திறக்கப்பட்ட முதல் பத்தே வாரங்களில், ஒரு மில்லியனுக்கும் அதிகமான பார்வையாளர்களை ஈர்த்தது.

இதேபோல், 1961-இல் சிக்ஸ் ஃபிளாக்ஸ் ஓவர் டெக்சாஸ் (Six Flags Over Texas) பூங்கா திறக்கப்பட்டது. இது, டெக்சாஸ் மாகாணத்தின் பாரம்பரியத்தை மையமாகக் கொண்டு, அனைத்து சவாரிகளுக்கும் ஒரே கட்டணம் (all-inclusive pricing) என்ற புதிய முறையை அறிமுகப்படுத்தியது. இந்த மாதிரி, பின்னர் பல பூங்காக்களால் பின்பற்றப்பட்டது.

பொருளாதாரப் பெருமந்தம், இரண்டாம் உலகப்போர் ஆகியவற்றால் பின்னடைவு ஏற்பட்டாலும், அவற்றுக்குப் பிறகு பல்வேறு புதுமைகளுடன் கருப்பொருள் பூங்காக்கள் ஒரு மிகப்பெரிய துறையாக வளர்ச்சி அடைந்தன. அவை மகிழ்ச்சியான தருணங்கள், சாகச அனுபவங்கள் மற்றும் மறக்க முடியாத நினைவுகளை உருவாக்குவதில் முக்கியப் பங்கு வகிக்கின்றன.

ஈஸ்வர் பிரசாத்