கணினி வரலாற்றில் ஒரு திருப்புமுனை– ‘சாஃப்ட்வேர் இண்டஸ்ட்ரி’ உருவான தினம்!

இன்று ஜூன் 23, உலகின் பல லட்சம் கோடி வணிகம் புரியும் ‘சாஃப்ட்வேர் இண்டஸ்ட்ரி’ என்ற மாபெரும் துறை உருவாவதற்கு அடிப்படையாக அமைந்த ஒரு வரலாற்று முக்கியத்துவம் வாய்ந்த தினமாகும். சரியாக 1969 ஜூன் 23 அன்று, உலகப் புகழ்பெற்ற ஐபிஎம் (IBM) நிறுவனம் ஒரு முக்கியமான அறிவிப்பை வெளியிட்டது: 1970 ஜனவரி முதல், கணினியுடன் (ஹார்ட்வேர்) சாஃப்ட்வேர் இணைத்து (பண்ட்ல்ட்) வழங்கப்படாது.

அதுவரை இருந்த நிலை

இந்த அறிவிப்புக்கு முன், கணினி என்பது ஹார்ட்வேர் மற்றும் சாஃப்ட்வேர் இரண்டையும் உள்ளடக்கிய ஒரே ஒரு தொகுப்பாகவே விற்பனை செய்யப்பட்டு வந்தது. இன்றைய தொலைக்காட்சி அல்லது டிவிடி பிளேயரில் அதன் செயல்பாட்டிற்குத் தேவையான சாஃப்ட்வேர் எப்படி ‘ஃபர்ம்வேர்’ என்ற பெயரில் உள்ளிணைக்கப்பட்டுள்ளதோ, அதேபோல்தான் அன்றைய கணினிகளின் இயங்குதளமும் இருந்தது. ஒரு தொலைக்காட்சி வாங்கியவுடன் எப்படி உடனடியாக இயங்குகிறதோ, அதேபோல கணினியை வாங்கியவுடன் இயங்கும் நிலையில் தருவது அக்காலத்திய நிறுவனங்களின் கடமையாக இருந்தது.

ஆனால் ஒரு சிறு வேறுபாடு இருந்தது: சாஃப்ட்வேர் முன்னரே நிறுவப்பட்டதாக (ப்ரி-இன்ஸ்டால்ட்) இல்லாமல், தயாரிப்பாளரின் பிரதிநிதிகள் வாங்கியவரின் இடத்திற்கே வந்து, சாஃப்ட்வேரை நிறுவித் தருவார்கள்.

ஐபிஎம்-இன் ஏகபோக உரிமைக்கு சவால்

1960களின் பிற்பகுதியில், மினிகம்ப்யூட்டர்கள் (Mini Computers) சிறிய நிறுவனங்களும் வாங்கும் விலையில் அறிமுகமானதைத் தொடர்ந்து, கணினியின் பயன்பாடு பரவலாகத் தொடங்கியது. இந்த சூழ்நிலையில், ஹார்ட்வேருடன் சாஃப்ட்வேரையும் இணைத்துத் தரும் ஐபிஎம்-இன் நடைமுறைக்கு எதிராக, அமெரிக்க அரசு 1968 டிசம்பரில் ஆண்டி ட்ரஸ்ட் (Anti Trust) சட்டத்தின்கீழ் வழக்குத் தொடர்ந்தது.

ஆண்டி ட்ரஸ்ட் சட்டம் என்பது, மிகப்பெரிய கார்ப்பரேட் நிறுவனங்கள் ஏகபோகமாக வளர்வதைத் தடுப்பதற்காக உருவாக்கப்பட்டதாகும். சாஃப்ட்வேர் தேவைப்படுபவர்களை, ஹார்ட்வேரையும் வாங்கக் கட்டாயப்படுத்துவதன் மூலம், ஐபிஎம் போட்டி நிறுவனங்கள் வளர்வதைத் தடுக்கிறது என்பதுதான் ஐபிஎம் மீது சுமத்தப்பட்ட முக்கியக் குற்றச்சாட்டு.

ஐபிஎம்-இன் வரலாற்றுச் சிறப்புமிக்க அறிவிப்பு

இந்த வழக்கு நடந்துகொண்டிருந்தபோதே, 1969 ஜூன் 23 அன்று, 1970 ஜனவரி முதல் ஹார்ட்வேரும், சாஃப்ட்வேரும் தனித்தனியாக விற்பனை செய்யப்படும் என்று ஐபிஎம் அறிவித்தது.

இந்த வழக்கினால்தான் பண்ட்லிங் நடைமுறையை ஐபிஎம் மாற்றியது என்று பொதுவாக நம்பப்பட்டாலும், வேறு சில காரணங்களும் கூறப்படுகின்றன. ஐபிஎம் தனது ‘கேம்ப்ரிட்ஜ் சயின்டிஃபிக் சென்டர்’ மற்றும் ‘சிபி-சிஎம்ஸ் டெவலப்மென்ட் குரூப்’ ஆகியவற்றை நிர்வாக வசதிக்காகப் பிரித்ததன் விளைவாகவே, பண்ட்லிங் முறையைக் கைவிட்டது என்றும் கூறப்படுகிறது.

இந்த வழக்கு மிகப்பெரிய அளவில் நடைபெற்றது. 1,04,400 பக்கங்களுக்கு வழக்கு பற்றிய பதிவுகள், 17,000 சான்றாவணங்கள் ஆகியவற்றுடன், 14 ஆண்டுகளில் 700 வேலை நாட்கள் விசாரணை நடைபெற்றது. இறுதியில், 1982 இல் இந்த வழக்கில் முகாந்திரம் இல்லையென்று அமெரிக்க அரசு வழக்கைக் கைவிட்டது.

ஒரு புதிய சகாப்தத்தின் பிறப்பு

வழக்கு கைவிடப்பட்டாலும், அன்று ஐபிஎம் வெளியிட்ட அறிவிப்பு, தனியாக விற்பனை செய்யக்கூடிய ஒரு பொருளாக சாஃப்ட்வேரை மாற்றியது. இது எண்ணற்ற புதிய சாஃப்ட்வேர் நிறுவனங்கள் உருவாவதற்கும், கணினித் துறையில் மகத்தான தொழில்நுட்ப முன்னேற்றங்களுக்கும் அடிப்படையான காரணமாக அமைந்தது. இன்று நாம் காணும் பரந்த அளவிலான ஆப்பரேட்டிங் சிஸ்டம்கள், அப்ளிகேஷன் சாஃப்ட்வேர்கள், இணையச் சேவைகள், மொபைல் செயலிகள் என அனைத்திற்கும், 1969 ஜூன் 23 அன்று ஐபிஎம் எடுத்த இந்த முடிவு ஒரு வலுவான அஸ்திவாரத்தை இட்டது என்றால் மிகையாகாது.

இந்த நாள், ஒரு சட்டப் போராட்டம் அல்லது ஒரு நிர்வாக முடிவு என்பதைத் தாண்டி, நவீன தொழில்நுட்ப உலகின் போக்கையே மாற்றியமைத்த ஒரு புரட்சிகரமான நிகழ்வாகவே வரலாற்றில் இடம்பிடித்துள்ளது.

செல்வா