தமிழ்நாட்டில் +1 பொதுத்தேர்வு ரத்து:- கல்வி மந்திரி அறிவிப்பு!

தமிழகத்தின் மாநிலக் கல்விக் கொள்கையை முதலமைச்சர் மு.க.ஸ்டாலின் சென்னையில் வெளியிட்டார். இந்த புதிய கொள்கையானது தேசியக் கல்விக் கொள்கை (NEP) குறித்த தமிழக அரசின் எதிர்ப்பின் பின்னணியில் உருவாக்கப்பட்டுள்ளது. பள்ளிக்கல்வித் துறை அமைச்சர் அன்பில் மகேஸ் இதன் முக்கிய அம்சங்கள் குறித்து விளக்கமளித்துள்ளார்.

• பிளஸ் 1 பொதுத் தேர்வு ரத்து: நடப்பு கல்வியாண்டு முதல் பிளஸ் 1 மாணவர்களுக்கு பொதுத் தேர்வு ரத்து செய்யப்படுகிறது. மாணவர்கள் இந்த ஆண்டை பிளஸ் 2 பொதுத் தேர்வுக்குத் தங்களைத் தயார்படுத்தும் ஒரு ஆண்டாகப் பயன்படுத்திக்கொள்ள வேண்டும்.
• பொதுத் தேர்வுகள்: இனி 10 மற்றும் 12 ஆம் வகுப்புகளுக்கு மட்டுமே பொதுத் தேர்வு நடத்தப்படும்.
• கட்டாயத் தேர்ச்சி: தமிழ் மாநில அரசின் பாடத்திட்டத்தின் கீழ் செயல்படும் பள்ளிகளில் 8 ஆம் வகுப்பு வரை கட்டாயத் தேர்ச்சி முறை தொடரும். இதன்மூலம் தேசியக் கல்விக் கொள்கையின் 3, 5, மற்றும் 8 ஆம் வகுப்புகளுக்கு பொதுத் தேர்வு என்ற பரிந்துரை நிராகரிக்கப்பட்டுள்ளது.
• இருமொழிக் கொள்கை: தமிழ் மற்றும் ஆங்கிலம் ஆகிய இருமொழிக் கொள்கை தொடர்ந்து வலியுறுத்தப்படும்.
• பகுத்தறிவு மற்றும் சிந்தனை: வெறும் மனப்பாடம் செய்வதை ஊக்குவிக்காமல், மாணவர்கள் சிந்தித்து கேள்வி கேட்கும் வகையில் இந்தக் கொள்கை உருவாக்கப்பட்டுள்ளது.
• தொழில்நுட்பப் பாடங்கள்: AI (செயற்கை நுண்ணறிவு), Robotics போன்ற பாடத்திட்டங்களை அறிமுகப்படுத்த வேண்டிய தேவை உள்ளதாகவும், 500 பள்ளிகளை ‘வெற்றிப் பள்ளிகளாக’ மாற்றவும் திட்டமிடப்பட்டுள்ளது.
• தொழில் வழிகாட்டுதல்: 9 ஆம் வகுப்பு படிக்கும்போதே மாணவர்களுக்கு எதிர்காலத்தைக் குறித்த தொழில் வழிகாட்டுதல்கள் வழங்கப்படும்.

இந்த மாநிலக் கல்விக் கொள்கை, அனைத்து மாணவர்களுக்கும் சமத்துவம், சமூக நீதி, மற்றும் தரமான கல்வியை வழங்குவதை நோக்கமாகக் கொண்டுள்ளது. மேலும், காலத்திற்கு ஏற்றவாறு ஆண்டுதோறும் இந்தக் கொள்கையில் மாற்றங்கள் செய்யப்படும் எனவும் அமைச்சர் அன்பில் மகேஸ் தெரிவித்துள்ளார்.

அடிசினல் ரிப்போர்ட்:

மத்திய அரசின் தேசிய கல்விக் கொள்கைக்கு தமிழக அரசு தொடர்ந்து எதிர்ப்புத் தெரிவித்து வரும் நிலையில் இதற்கு மாற்றாக மாநிலத்துக்கு என சிறப்பான கல்விக் கொள்கை உருவாக்கப்பட்டுள்ளது.

இந்தக் கல்விக் கொள்கையை வடிவமைக்க ஓய்வு பெற்ற நீதிபதி த.முருகேசன் தலைமையில் 14 பேர் கொண்ட குழு 2022ம் ஆண்டு அமைக்கப்பட்டது. இந்தக் குழுவினர் பல்கலைக்கழக துணை வேந்தர்கள், கல்வியாளர்கள், ஆசிரியர்கள், தனியார் பள்ளி நிா்வாகிகள், பெற்றோர் உள்பட பல்வேறு தரப்பினரிடம் கருத்துகள் கேட்டறிந்து கல்விக் கொள்கையை வடிவமைத்து தமிழக அரசிடம் 2023ல் ஒப்படைக்கப்பட்டது. பல்வேறு காரணங்களால் அதை வெளியிடுவதில் தாமதம் ஏற்பட்டது.

இதில் தமிழகத்தில் இருமொழிக் கொள்கையே தொடர வேண்டும். கல்வியை மாநிலப் பட்டியலுக்கு மாற்றுதல், கல்லூரிகளில் மாணவர் சோ்க்கைக்கு நுழைவுத் தோ்வு நடத்தக்கூடாது என்பன உள்பட பல்வேறு பரிந்துரைகள் இடம் பெற்றுள்ளன.