குழந்தைகள் உணவில் சர்க்கரைத் தடை: FSSAI கொண்டுவரும் புதிய கட்டுப்பாடு!

குழந்தை பிறந்தது முதல் அவர்களின் ஊட்டச்சத்து விஷயத்தில் பெற்றோர்கள் மிகுந்த கவனத்துடன் இருப்பது அவசியம். தற்காலத்தில் சந்தையில் கிடைக்கும் பலவிதமான குழந்தைகள் உணவுகளில் சுவைக்காகவும், பதப்படுத்துவதற்காகவும் சர்க்கரை சேர்க்கப்படுவது வழக்கமாகிவிட்டது. இந்தச் சூழலில், ஆறு மாதம் வரையிலான குழந்தைகளுக்கான உணவுப் பொருட்களில் சுக்ரோஸ் மற்றும் பிரக்டோஸ் போன்ற எந்தவிதமான சர்க்கரை வகைகளையும் சேர்ப்பதற்கு இந்திய உணவுப் பாதுகாப்பு மற்றும் தர நிர்ணய ஆணையம் (FSSAI) கடுமையான தடை விதிக்கப் பரிந்துரைத்துள்ளது.

குழந்தைகளின் எதிர்கால ஆரோக்கியத்தைக் கருத்தில் கொண்டு எடுக்கப்பட்டுள்ள இந்த முக்கியமான நடவடிக்கை மற்றும் அதன்பின்னணியில் உள்ள மருத்துவக் காரணங்கள் குறித்த விரிவான தகவல் இது.

FSSAI பரிந்துரையின் பின்னணி

இந்தியாவில் அண்மைக்காலமாகப் பயன்பாட்டில் இருக்கும் குழந்தைகள் உணவுப் பொருட்களின் தரக் கட்டுப்பாடுகளைப் பலப்படுத்தும் நோக்கில் FSSAI இந்த வரைவு விதிகளை வெளியீட்டுள்ளது. இதன்படி, ஆறு மாதங்கள் வரை உள்ள குழந்தைகளுக்கான உணவுப் பொருட்களில் சுத்திகரிக்கப்பட்ட சர்க்கரை, பிரக்டோஸ் அல்லது சுக்ரோஸ் ஆகியவற்றை நேரடியாகவோ அல்லது மறைமுகமாகவோ சேர்க்கக் கூடாது.

இந்த வரைவு விதிகளுக்கு பொதுமக்களும், உணவு உற்பத்தி நிறுவனங்களும், மருத்துவ வல்லுநர்களும் தங்களின் கருத்துக்களையும் ஆலோசனைகளையும் தெரிவிக்க 60 நாட்கள் அவகாசம் வழங்கப்பட்டுள்ளது. இந்தக் காலகட்டத்திற்குப் பிறகு வரைவு விதிகள் இறுதி செய்யப்பட்டு, கடுமையான சட்டமாக நடைமுறைக்கு வரும் என எதிர்பார்க்கப்படுகிறது.

இளம் வயதிலேயே சர்க்கரை சேர்ப்பதால் ஏற்படும் ஆபத்துகள்

ஆறு மாதங்கள் வரையிலான குழந்தைகளுக்கு தாய்ப்பால் மட்டுமே முழுமையான உணவாகும். அதற்குப் பதிலாக அல்லது அதனுடன் வழங்கப்படும் மாற்று உணவுப் பொருட்களில் சேர்க்கப்படும் சர்க்கரை, அவர்களின் வளர்ச்சிக்கு பெரும் அச்சுறுத்தலாக மாறுகிறது.

உடல் பருமன் மற்றும் வளர்சிதை மாற்றக் கோளாறுகள்

இளம் வயதிலேயே சர்க்கரை கலந்த உணவுகளை உள்கொள்ளும் குழந்தைகளுக்கு பிற்காலத்தில் உடல் பருமன் (Childhood Obesity) ஏற்படும் அபாயம் பல மடங்கு அதிகரிக்கிறது. மேலும், கணையம் சிறுவயதிலேயே அதிக அளவு இன்சுலினைச் சுரக்க வேண்டிய கட்டாயத்திற்குத் தள்ளப்படுவதால், எதிர்காலத்தில் நீரிழிவு நோய் உருவாகவும் இது வழிவகுக்கிறது.

இயற்கையான சுவையை அறியும் திறன் பாதிப்பு

குழந்தைகளின் நாவிலுள்ள சுவை மொட்டுகள் ஆரம்பத்தில் மிகவும் மென்மையாக இருக்கும். இந்தச் சமயத்தில் செயற்கைச் சர்க்கரையைக் கொடுக்கும்போது, குழந்தைகள் அந்த அதீத இனிப்புச் சுவைக்கு அடிமையாகி விடுகிறார்கள். இதனால் காய்கறிகள், பழங்கள் மற்றும் தானியங்களின் இயற்கையான சுவையை அவர்கள் விரும்புவதில்லை.

பல் ஆரோக்கியம் மற்றும் செரிமானக் கோளாறுகள்

சிறு வயதிலேயே சேர்க்கப்படும் சர்க்கரை குழந்தைகளின் பற்களின் எனாமல் பகுதியைப் பாதித்து சொத்தைப் பற்கள் உருவாகக் காரணமாகிறது. மேலும், அவர்களின் குடலில் உள்ள நன்மையளிக்கும் பாக்டீரியாக்களின் சமநிலையைச் சீர்குலைத்து செரிமானக் கோளாறுகளையும் ஏற்படுத்துகிறது.

பெற்றோர்கள் கவனத்தில் கொள்ள வேண்டிய முக்கிய விஷயங்கள்

ஆறு மாதம் வரையிலான குழந்தைகளுக்குத் தாய்ப்பாலில் உள்ள லாக்டோஸ் மட்டுமே போதுமானது. கூடுதல் இனிப்பு தேவையில்லை.

சந்தையில் வாங்கும் குழந்தை உணவுகளின் பாக்கெட்டுகளுக்குப் பின்னால் உள்ள விவரப் பட்டியலை (Ingredients) கவனமாகப் படிக்க வேண்டும்.

சர்க்கரை, பிரக்டோஸ், சுக்ரோஸ், கார்ன் சிரப் போன்ற பெயர்களில் மறைமுகமாகச் சேர்க்கப்படும் இனிப்புகளையும் தவிர்க்க வேண்டும்.

ஆறு மாதங்களுக்குப் பிறகு திட உணவுகளைத் தொடங்கும்போதும், சர்க்கரை அல்லது உப்பு சேர்க்காமல் இயற்கையான முறையில் வேகவைத்த பழங்கள் மற்றும் காய்கறிக் கூழ்களைக் கொடுப்பதே சிறந்தது.

எதிர்காலத் தலைமுறையைக் காக்கும் முன்னெடுப்பு

FSSAI எடுத்துள்ள இந்த நடவடிக்கை, இந்தியக் குழந்தைகளின் ஊட்டச்சத்து முறையில் ஒரு மிகப்பெரிய நேர்மறையான மாற்றத்தை ஏற்படுத்தும் என்பதில் சந்தேகமில்லை. வெறும் சட்ட விதிகளால் மட்டுமே இதைச் சாத்தியமாக்கிவிட முடியாது; பெற்றோர்களும் விழிப்புணர்வுடன் செயல்பட்டு, விளம்பரப் பூச்சுகளைக் கண்டு மயங்காமல் குழந்தைகளின் இயற்கை உணவுக்கு முன்னுரிமை அளிக்க வேண்டும்.

ரமாபிரபா