உலக மூங்கில் தினம்!

ஆண்டுதோறும் செப்டம்பர் 18ஆம் தேதி, உலக மூங்கில் தினம் கொண்டாடப்படுகிறது. இது மூங்கிலின் முக்கியத்துவத்தையும், அதன் பல்துறை பயன்பாடுகளையும் பற்றிய விழிப்புணர்வை உலகெங்கிலும் ஏற்படுத்துகிறது. மூங்கில் உற்பத்தியில் சீனா முதலிடத்திலும், இந்தியா இரண்டாவது இடத்திலும் உள்ளன. எனினும், உலக வர்த்தகத்தில், சீனா 10 பில்லியன் டாலர் மதிப்பில் சுமார் 50% பங்கைப் பெற்று முன்னணியில் உள்ளது. இது, மூங்கிலின் பொருளாதார முக்கியத்துவத்தை உணர்த்துகிறது.

மூங்கில் – ஒரு பல்லுயிர் வளம்

மூங்கில் “பச்சைத் தங்கம்”, “ஏழைகளின் மரம்”, மற்றும் “வனவாசிகளின் வாழ்வாதாரம்” என பல்வேறு பெயர்களால் அழைக்கப்படுகிறது. இதன் வளர்ச்சி விரைவானது மட்டுமல்ல, சுற்றுச்சூழலுக்கும் பெரிதும் உதவுகிறது. மற்ற மரங்களை ஒப்பிடும்போது, மூங்கில் அதிக அளவிலான கரியமில வாயுவை (கார்பன் டை ஆக்சைடு) உறிஞ்சி, அதிக பிராணவாயுவை (ஆக்ஸிஜன்) வெளியேற்றும் தன்மை கொண்டது. இதனால், மூங்கில் அதிகம் வளரும் பகுதிகள் குளிர்ச்சியாகவும், தூய்மையாகவும் இருக்கும்.

இந்தியாவின் மூங்கில் நிலை

இந்தியாவில் மூங்கில் வளர்ப்பில் மக்கள் ஆர்வம் காட்டுவதில்லை என்பது வருத்தமான உண்மை. நமது நாட்டில், மூங்கில் பெரும்பாலும் கூடை, ஏணி, மற்றும் தற்காலிக தடுப்புகள் போன்ற சாதாரண பயன்பாடுகளுக்கு மட்டுமே பயன்படுத்தப்படுகிறது. எனினும், சில மாநிலங்களில், நாற்காலி, மேசை, ஒட்டுப் பலகை மற்றும் ஜன்னல் மறைப்புகள் போன்ற பொருட்களின் தயாரிப்பில் மூங்கில் பயன்படுத்தப்படுவது ஒரு சிறிய முன்னேற்றத்தைக் காட்டுகிறது.

வடகிழக்கு மாநிலங்களில் மூங்கிலைக் கொண்டு பள்ளிக்கூடங்கள் கட்டப்படுவது போன்ற புதுமையான பயன்பாடுகள், மூங்கிலின் வலிமை மற்றும் நீடித்த தன்மையை எடுத்துக்காட்டுகின்றன. இது மூங்கிலை கட்டுமானப் பொருட்களாகப் பயன்படுத்தும் ஒரு சிறந்த உதாரணம்.

தேசிய மூங்கில் இயக்கம்

மூங்கில் இந்தியாவிற்கு இயற்கை கொடுத்த ஒரு அரிய கொடையாகும். இதன் முக்கியத்துவத்தை உணர்ந்து, இந்திய அரசாங்கம் “தேசிய மூங்கில் இயக்கம்” (National Bamboo Mission) என்ற திட்டத்தை தொடங்கியுள்ளது. இத்திட்டத்தின் மூலம், மூங்கில் வளர்ப்பு மற்றும் அதன் பயன்பாடுகள் குறித்த விழிப்புணர்வு ஏற்படுத்தப்படுகிறது. இதன் மூலம், விவசாயிகள் மற்றும் பொதுமக்கள் மூங்கில் வளர்ப்பில் ஈடுபட ஊக்குவிக்கப்படுகிறார்கள்.

மூங்கில், ஒரு பொருளாதார வளம் மட்டுமல்ல; அது சுற்றுச்சூழலைப் பாதுகாக்கவும், கிராமப்புற பொருளாதாரத்தை மேம்படுத்தவும் உதவும் ஒரு முக்கிய ஆதாரம். இந்த உலக மூங்கில் தினத்தில், நாம் மூங்கிலின் முக்கியத்துவத்தை உணர்ந்து, அதை வளர்த்து, அதன் பன்முகப் பயன்பாடுகளை ஊக்குவிப்போம்.

மூங்கில் வளர்ப்போம், சுற்றுச்சூழலைப் பாதுகாப்போம்!

நிலவளம் ரெங்கராஜன்