வெளியானது மகளிர் டி20 அட்டவணை!

கிரிக்கெட் ரசிகர்களுக்கு ஒரு குஷியான செய்தி! 2026-ஆம் ஆண்டு இங்கிலாந்தில் நடக்கவிருக்கும் மகளிர் டி20 உலகக் கோப்பைத் தொடருக்கான அட்டவணையை சர்வதேச கிரிக்கெட் கவுன்சில் (ICC) அதிகாரப்பூர்வமாக வெளியிட்டுள்ளது.

இந்தத் தொடரில் ஒட்டுமொத்த உலகின் கவனத்தையும் ஈர்க்கப்போகும் இந்தியா – பாகிஸ்தான் இடையிலான விறுவிறுப்பான ஆட்டம் ஜூன் 14-ஆம் தேதி நடைபெற உள்ளது.

தொடர் எப்போது? எங்கே?

பெண்களுக்கான 10-வது டி20 உலகக் கோப்பைத் தொடர், வரும் ஜூன் 12-ஆம் தேதி முதல் ஜூலை 5-ஆம் தேதி வரை இங்கிலாந்தில் நடைபெறுகிறது. இந்த முறை மொத்தம் 12 அணிகள் களமிறங்குகின்றன. 33 போட்டிகள் கொண்ட இந்தத் திருவிழா, லண்டனின் புகழ்பெற்ற லார்ட்ஸ் மைதானத்தில் நடக்கும் இறுதிப் போட்டியுடன் நிறைவடையும்.

இந்தியா – பாகிஸ்தான் மோதல்

இந்திய அணி தனது முதல் போட்டியிலேயே பரம எதிரியான பாகிஸ்தானை எதிர்கொள்கிறது. ஜூன் 14, ஞாயிற்றுக்கிழமை அன்று பர்மிங்காமில் உள்ள எட்ஜ்பாஸ்டன் மைதானத்தில் இந்தப் போட்டி நடைபெறுகிறது. இந்திய நேரப்படி இரவு 7:00 மணிக்கு (மாலை 6:30 மணி என்றும் சில தகவல்கள் கூறுகின்றன) இந்தப் போட்டி தொடங்கும். பரம எதிரிகளுக்கு இடையிலான ஆட்டம் என்பதால் இப்போதே எதிர்பார்ப்பு எகிறியுள்ளது.

இந்திய அணியின் மற்ற போட்டிகள்

குரூப்-A பிரிவில் இடம் பிடித்துள்ள இந்தியா, பாகிஸ்தான் தவிர ஆஸ்திரேலியா, தென்னாப்பிரிக்கா, வங்கதேசம் மற்றும் நெதர்லாந்து ஆகிய அணிகளுடன் மோதவிருக்கிறது.

• ஜூன் 14: இந்தியா vs பாகிஸ்தான் (எட்ஜ்பாஸ்டன்)

• ஜூன் 17: இந்தியா vs நெதர்லாந்து (ஹெடிங்லி)

• ஜூன் 21: இந்தியா vs தென்னாப்பிரிக்கா (ஓல்ட் ட்ராஃபோர்டு)

• ஜூன் 25: இந்தியா vs வங்கதேசம் (ஓல்ட் ட்ராஃபோர்டு)

• ஜூன் 28: இந்தியா vs ஆஸ்திரேலியா (லார்ட்ஸ்)

அணிகளின் பிரிவுகள்

இந்தத் தொடரில் பங்கேற்கும் 12 அணிகள் இரண்டு பிரிவுகளாகப் பிரிக்கப்பட்டுள்ளன:

முக்கியத் தகவல்கள்

• தொடக்க ஆட்டம்: ஜூன் 12-ல் இங்கிலாந்து மற்றும் இலங்கை அணிகள் மோதுகின்றன.

• அரையிறுதி: ஜூன் 30 மற்றும் ஜூலை 2 ஆகிய தேதிகளில் ‘தி ஓவல்’ மைதானத்தில் நடைபெறும்.

• இறுதிப்போட்டி: ஜூலை 5-ஆம் தேதி கிரிக்கெட்டின் தாயகமான லார்ட்ஸ் மைதானத்தில் நடக்கும்.

• புதுமுக அணி: நெதர்லாந்து அணி முதல்முறையாக மகளிர் டி20 உலகக் கோப்பையில் தடம் பதிக்கிறது.

கடந்த முறை 10 அணிகள் மட்டுமே பங்கேற்ற நிலையில், இந்த முறை 12 அணிகளாக விரிவுபடுத்தப்பட்டிருப்பது மகளிர் கிரிக்கெட்டின் வளர்ச்சியைப் பறைசாற்றுகிறது. நடப்பு சாம்பியனான நியூசிலாந்து தனது பட்டத்தைத் தக்கவைக்குமா அல்லது இந்தியப் பெண்கள் முதல்முறையாகக் கோப்பையை ஏந்துவார்களா என்பதைப் பொறுத்திருந்து பார்ப்போம்.

தனுஜா