சர்வதேச கிரிக்கெட் வாழ்க்கையில் இருந்து ஓய்வு; ஸ்டூவர்ட் பிராட் அறிவிப்பு!

சர்வதேச கிரிக்கெட் வாழ்க்கையில் இருந்து ஓய்வு; ஸ்டூவர்ட் பிராட் அறிவிப்பு!

லக அளவில் மேட்ச்-வின்னிங் ஸ்பெல்களை புகழ் பெற்ற ஸ்டூவர்ட் பிராட் இதுவரை 20 முறைக்கும் மேல் ஐந்து விக்கெட்களை வீழ்த்தியுள்ளார். அதேபோல் டெஸ்ட் கிரிக்கெட்டில் மூன்று முறை 10 விக்கெட்டுகளை எடுத்துள்ளார். ஆனால் இந்த இங்கிலாந்து அணி வேகப்பந்து வீச்சாளர் ஸ்டூவர்ட் பிராட் பெயரை கேட்டாலே நினைவிற்கு வருவது, 2007ஆம் ஆண்டு உலகக் கோப்பையில் இவருக்கு எதிராக யுவராஜ் சிங் 6 பந்துகளில் 6 சிக்ஸர் அடித்ததுதான். ஆனால், பிராட் இதெல்லாம் தாண்டி நினைவு கூறத்தக்க தரமான பௌலர்தான். அப்படியில்லை என்றால், 37 வயதுவரை இங்கிலாந்து அணிக்காக பந்துவீசி வர முடியுமா? சக வேகப்பந்து வீச்சாளர் ஜேம்ஸ் ஆண்டர்சனுடன் இணைந்து டெஸ்டில் 1000 விக்கெட்களை வீழ்த்தி உலக சாதனையை படைத்துள்ளார். இப்படியொரு அரிதான சம்பவம், இனி வருங்கால கிரிக்கெட் உலகில் நடக்குமா என்பது சந்தேகம்தான். வாய்ப்பு மிகமிக குறைவு. இவரும், ஆண்டர்சனும் இணைந்து பலமுறை மேட்ச் வின்னர்களாக இருந்துள்ளனர். 2008ஆம் ஆண்டிற்கு பிறகு, இந்த இருவரையும் இங்கிலாந்து டெஸ்ட் கிரிக்கெட்டையும் பிரித்து பார்க்கவே முடியாது. அந்த அளவுக்கு தன் தாய் நாட்டிற்காக பிராட் அற்பணிப்பு உணர்வோடு விளையாடி வருகிறார். அப்பேர்பட்ட ஸ்டூவர்ட் பிராட் ஓய்வு பெறுவதாக அறிவித்துள்ளார்.

ஸ்டூவர்ட் பிராட் 2006ஆம் ஆண்டில் பாகிஸ்தானுக்கு எதிராக ஒருநாள், டி20 தொடர் மூலம் இங்கிலாந்து அணிக்கு அறிமுகமானார். அடுத்த ஆண்டே இலங்கைக்கு எதிரான டெஸ்ட் மூலம் பிராட் டெஸ்ட் கிரிக்கெட்டிலும் அறிமுகமானார். அப்போதிருந்து தற்போதுவரை 156 டெஸ்ட், 288 இன்னிங்ஸ்களில் 552 விக்கெட்களை குவித்துள்ளார். ஒரு சதமும், 13 அரை சதங்களையும் அடித்துள்ளார். 121 ஒருநாள், 56 டி20 போட்டிகளில் தலா 178, 65 விக்கெட்களை சாய்த்துள்ளார்.

37 வயதிலும் பிராட், உலகத்தரமிக்க பந்துவீச்சாளராகத்தான் திகழ்ந்து வருகிறார். இவர் இங்கிலாந்து டெஸ்டிற்கு வந்தப் பிறகு பல நட்சத்திர வீரர்கள் அறிமுகமாகி, ஓய்வும் பெற்றுள்ளனர். அந்த அளவுக்கு உடற்தகுதியை கட்டுக்கோப்பில் வைத்துள்ளார். இந்நிலையில், அவர் தனது உடற்தகுதியை கட்டுக்கோப்பில் வைக்க எவ்வளவு சிரமப்படுகிறார் என்ற தகவலுடன் பத்திரிகை ஒன்றுக்குப் பேட்டிகொடுத்துள்ள பிராட், ‘‘நான் பிறக்கும்போது, மிகச்சிறியவனாக இருந்தேன். மரணத்தின் வாசலில் இருந்தேன் என்றே சொல்லலாம். காரணம், எனக்கு அனைவரைப் போலவும் நுரையீரல் அமையவில்லை. இரண்டில் ஒரு நுரையீரல் முழு வளர்ச்சியடையாமல்தான் இருந்தது. இதனால்தான் நான் ஆஸ்துமா நோயாளியாக இருக்கிறேன். இன்ஹேலரை எங்கும் எடுத்துச் செல்வேன். எல்லோரையும் விட பாதியளவு வேலை செய்யும் நுரையீரல்தான் எனக்கு இருக்கிறது’’ என்று சொல்லி இருந்தார். இப்பேர்பட்ட குறையை வைத்துக்கொண்டு பேட்டராக இருப்பதே மிகமிக கடினம். ஆனால், பிராட் பௌலராக அதுவும் 17 வருடங்கள் சர்வதேச கிரிக்கெட்டில் தாக்குப்பிடிப்பது என்பது நிச்சயம் வியக்கத்தக்க ஒன்றுதான்.

ஸ்டூவர்ட் பிராட் டெஸ்டில் 602 விக்கெட்டுகள் எடுத்துள்ளார். இது வேகப்பந்து வீச்சாளர்களில் இரண்டாவது அதிகபட்ச டெஸ்ட் விக்கெட் ஆகும். சர்வதேச டெஸ்டில் அதிக விக்கெட்டுகள் எடுத்தவர்களின் வரிசையில் பிராட் 5வது இடத்தில் உள்ளார். 37 வயதான பிராட் இந்த ஆஷஸ் டெஸ்ட் போட்டியுடன் ஓய்வு பெருவதாக நேற்றிரவு அறிவித்தார். இவரை விடவும் 41 வயதான ஆண்டர்சன் விளையாடிக் கொண்டிருக்கும்போது பிராட்டின் இந்த முடிவு ரசிகர்களிடையே சோகத்தை ஏற்படுத்தியுள்ளது.

தனது ஓய்வு குறித்து பிராட் பேசிய போது, “இது ஒரு அற்புதமான பயணம், நாட்டிங்ஹாம்ஷயர் மற்றும் இங்கிலாந்து பேட்ஜ் அணிந்திருப்பது ஒரு பெரிய பாக்கியம். மேலும், நான் எப்போதும் போல் கிரிக்கெட்டை நேசிக்கிறேன். தற்போதைய ஆஷஸ் தொடர் ஒரு அற்புதமான தொடராக இருந்தது. இத்தொடரில் ஒரு பகுதியாக நானும் இருந்ததில் மகிழ்ச்சி. ஆஷஸ் தொடர் மிகவும் சுவாரஸ்யமாகவும் பொழுதுபோக்காகவும் இருந்தது. சில வாரங்களாகவே ஓய்வு குறித்து யோசித்துவந்தேன். எனக்கு ஆஷஸ் தொடர் மீது தீராக்காதல். அதனால்தான் எனது கடைசி போட்டி ஆஷஸில் இருக்க வேண்டும் என்று நான் விரும்பினேன். நேற்று இரவு ஸ்டோக்ஸ், ஜேம்ஸ் ஆண்டர்சன் மற்றும் ஜோ ரூட் ஆகியோரிடம் எனது ஓய்வு முடிவை கூறினேன். உண்மையைச் சொல்வதானால், இது சரியான நேரம் என்று உணர்ந்ததால் இப்போதே ஓய்வு பெற விரும்புகிறேன்” என்று தெரிவித்தார்.

error: Content is protected !!